1Kiŋi Dapiti baa ando emo ingiyamo dokopa banya kendemande akali dupwame porangelye yambe piyaminyipape baa mee kupwame kumuoko palyuo siya.
2Dokopa banya akali mupwa dupwame baa lamaiyuo dopa leyami. Emba kiŋi andake doko, namwame enda mapwae mende embapa role pyao palyuo emba rapu pira kotakamanale. Kota kando nyakaramano dokopa wanake dokome emba kupyaro paliramo emba kupwa nao paliri, leyami.
3Lapala nakamame Isaraele yuu muu dupwa peparaena enda mapwae keyange mende petape lao koto kareyami. Koto karo yuu Suneme lenge dokona wanake mende kingi Apisake lenge peteyamo kando nyiyami. Nyepala baa lanyuo kiŋi peteyamo dokona peyami.
4Peyaminyipa enda mapwae ama keyange wakasa dokome kiŋi baa iso rapu piya. Dopa piyamopape enda dokopa angi nyii nao mee palyuo kareyambi.
5Dokopa akali Epesalome baa kumuyamo dokopa akali Atonainja lenge Dapiti Akitipana ikinyingi doko wane mupwa doko baa kuma nao mee lete ando kareya ingiya. Baa akali elyape ingyuo ando kareya Dapitimi wane doko pyalana pyuo laa nange. Dokona Atonainja baa kiŋi karapuli lao suu pyao kareya. Baame mename uliuli ipyuo pengepe mena osepe dupwa baa rangena lao reteya. Dee baa rapu pirami akali dupwa akalisa kingi paki karo piyami.
7Baamoo akali Joape enda Seruyana ikinyingimoo purisi akali Apiatamoo role pyao pii lao kareyami. Kareyaminyipa nakamba pipya lao banya yulu dokona renge palyuo poraiyuo lakamiramba, leyambi.
8Dopa leyaminyipape purisi akali Satokomoo Benaya Jiyoatana ikinyingimoo dee poropeta Netanemoo Simaimoo Oraimoo dee Dapiti banya yongo rapu pyuo karaminyi akali dupwamepe Atonainja banya pii leyamo dorena kara nayami.
9Yuu mendepa Atonainjame bange mena sipisipipi bulamakaope dee mena bulamakao yakane rondo lasipi lapo Kau Kana lenge dokona ipwa Enerokele guu lenge doko repeta kiso maiya. Maipala baame kiŋi Dapitinya ikinyingi menge dupwape dee kiŋi Dapiti banya akali mupwa yuu Juta range dupwape nenge malu palyuo kisiyamo dokona epena leya.
10Leyamopape banya yangonge Solomonemoo poropeta Netanemoo Benayamoo dee kiŋinya yongo rapu pyakamyuo karenge dupwape epena laa naya.
11Enakana Netane baa Solomonena endangi Betesepa lenge peteyamo dokona papala baa piso soo dopa leya. Emba Akitinya ikinyingi Atonainja baa rangeme kiŋi karalana lao rombo palyapya doko see napisi? Dokopa kiŋi Dapiti pii dokona mendepe ama see nalyamo, leya.
12Embame embapa embena ikinyingi Solomonepa range lete kyawa doko kame pyuo minyaramba lao masiyambi kande doko nambame pelapa lao langirunuli pyuo pelapape, leya.
13Yuu gii aopa dakepa kiŋi Dapiti petamo dokona papala piso soo lao, Emba kiŋi andake doko, embena panda doko nambana ikinyingi Solomoneme nyepala baa kiŋi ingyuo karara lao lalu lao lao namba langya naese? Dokona lao, Akipamo akali Atonainja baa kiŋi karase? leya.
14Dopa lapala dokopa Netaneme konda pyuo lao dopa leya. Emba kiŋi Dapitipa pii lao kararambi dokopa nambame epapala embame pii letene dokonako lareneli pyuo kamba laokondali pyuo lakaro, leya.
15Dokona lao Betesepa baa kiŋi banya luu palenge panda paleyamo dokona kandala peya. Peyamo dokopa baa ama alemo ingyuo oteya. Dokopa yuu Suneme range wanake dokome kandokondali pyuo rapu piya.
16Dokopa enda Betesepa baa kiŋi paleyamo dokona lenge kambusa pangu siya. Dokopa kiŋi dokome baa piso soo lao, Emba aki nyerese? leya.
17Enda dokome isingi lamaiyuo dopa leya. Emba kiŋi andake, embame embena Kamongo Anatunya kingi lao lalu lao lapala nambana ikinyingi Solomone baa embena mata kiŋi ingyuo karara lao namba kando lee kande leya.
18Dopa leenepape Atonainja baa kiŋi karo otapya dokona mendepe emba see nalene kande.
19Baame mena bulamakao kali malupi mena sipisipipi dee mena bulamakao ikyane rondo lasipi lapo pyao yangapala embena ikinyingi dupwape purisi akali Apiatamoo dee Joape embena yanda singi ami dupwana mupwa ingyuo karenge dokomoo epena lapala embena ikinyi Solomone iki epena laa napyapya, leya.
20Emba kiŋi andake doko Isaraele wambu peparaeme apimi embena panda nyuo kiŋi karena lao langilipi lao embako isaro karaminyi.
21Embame laa nare ramo doko emba kumaparene dokopa nambana ikinyingi Solomonepa nambapa emba mata kando lao kararambi lao wambu dupwame suu pyarami, leya.
22Enda doko mee pii lao kareyamopako akali Netane baa kiŋinya anda dokona epeya.
23Epeyamo doko dopa pyuo poropeta doko epo karamo lao kiŋi doko lamaiyami. Dokopa Netane baa andakare papala kiŋinya lenge kambu dokona isa pangu siya.
24Sepala baame lao, Emba kiŋi andake doko akali Atonainjame doko embena panda nyuo kiŋi ingyara, lapisi?
25Yuu gii mendaki dokopako baa mena bulamakao kali malupi sipisipipi mena bulamakao yakane rondo lasipi pyao yango maiyala paamo. Papala baame embena ikinyingi dupwa peparae epena lapya. Lapala Joape embena ami yanda singi dupwana mupwa dokope Apiata purisi akali dokope pipala epena lapya. Lapyamopa epapu dakepa nakama baamoo pipya role pyao piso nenge nao pii ketae palyuo poraiyuo lao Atonainja emba kiŋi ingyuo palyuo karalu karape, letaminyi.
26Dopa pipyamopape nambamoo purisi akali Satokomoo Benayamoo dee Solomonemoo nenge nala ipupwa laa napya.
27Embame yulu doo pipyamo dupwa kando kapa lao suu pyapala embena akali mupwa dupwa kando lamaiyuo, Embena kiŋi yulu doko apimi nyera lao lamai naese?
28Kiŋi Dapitimi enda Betesepa baa dee kapu kyuo epena leya. Dopa leyamosa enda baa epapala Dapitinya lenge kambu siyamo dokona kareya.
29Epo kareyamo dokopa Dapitimi enda lamaiyuo dopa leya. Nambame Kamongo lete karalu karenge dokome namba randa malu nao kareyonopa kiiramo nyiyamo dokona kingi lao lalu lao lao,
30Epapu nambame emba kando Isaraele wambunya Kamongo Anatunya kingi dokona lao embena ikinyingi Solomone baa nambana panda nyuo kiŋi ingyuo karara lao lalu lao leyo kande doko alowa pii naro, leya.
31Leyamo dokopa Betesepame pangu sepala lao, Nambana kamongo baa karalu karena leya.
32Leyamo dokopa kiŋi Dapitimi akali Satoko Netane dee Benayamoo epena leya. Nakama epeyaminyi dokopa baame akali dusipa lamaiyuo dopa leya.
33Nakamame nambana yulu pyakange akali mupwa dusipa nyuo lanyuo nambana ikinyingi Solomone baa nambana mena ose matana piso papingi dokona petena lapala lanyuo ipwa guu lao epenge yuu Giyone dokona pupwape.
34Yuu dokona Satoko Netanepame baa Isaraele wambunya kiŋi karena lao kyawana mamba kisakamirambi. Dopa pirambinyi dokopa bikuli poo lao pii poraiyuo lao lao, Kiŋi Solomone doko palu karalu karara lena, leya.
35Lapala baa anda kapu kyuo nambana kiŋi ingyuo petenge seya dokona pisa epeya kande dokopa baa eparamuli pyuo ipupwape. Nambame Solomone baa mupwa ingyuo nambana panda nyepala Isaraele wambupi dee Juu wambupi iso karara lao rombo palyiyu dokona baa nambana panda alowa pyuo nyera, leya.
36Benayame isingi lao, Embame letenyili pyuo pirama. Dokona Kamongo Anatumi emba letene doko kapa lena, leya.
37Emba kiŋi andake doko, yulu pyuo karene dokopa Kamongo baa emba nyiso role kareya dopako pyuo Solomone nyiso kararamopa emba kiŋi yulu piinyi andanyi pyambuyamopape banya yulu pyuo wambu isaramo doko kamame ulipili ingyuo ando para, leya.
38Lapala Satoko Netane Benayamoo dee akali kiŋi rapu pyuo karenge dusipame Solomone baa kiŋi Dapitinya mena osena mata dokona petena lapala rapu pyuo lanyuo ipwa guu lao epenge yuu Giyone dokona peyami.
39Papala Satokome olipi ipwange petenge penge Kamongona komau anda dokona nyuo minyuo peyamo doko nyepala Solomone kiŋi ingyuo karena lao mamba kisakamiya. Kisakamipala dokopa nakamame bikuli pii poo lao wambu peparae pii poraiyuo lapala Solomone baa kiŋi ingyuo karalu karena leyami.
40Lapala nakama peparae Solomone epeyamuli pyuo kapu kyuo epo rae maiyuo pii ketae palyuo lao kurulu dupwa lao pii poraiyuo lao epeyaminyisa yuu dupwa pyuku pyuku leya.
41Atonainjamoo dee banya upunili wambu dupwa peparaepe nenge nao oteyami dokopa pii poponge doko siyami. Dokopa Joapeme bikuli pii leyami doko sepala dopa leya. Aki rengendena yuu taone dokona pii palase? leya.
42Pii lao otapa nayamopa Jonatane purisi Apiatana ikinyingi doko epeya. Epeyamo dokopa Atonainjame baa lamaiyuo lao, Akali keyange doko, pii keyange mende minyuo epenge epeleneŋe andakare ipu, leya.
43Dokopa Jonataneme isingi lamaiyuo, Kondo. Nambame pii angi mende minyuo epa nalyoŋo. Doko kiŋi Dapitimi banya kiŋi yulu Solomone nyinya lao rombo palyapya, leya.
44Kiŋi Dapitimi akali Satoko Netane dee Benayamoo dee banya akali baa rapu pyuo karenge dupwape pipala Solomone rapu pyuo iso nyela pena lapya. Lapyasa akali dusipame baa kiŋinya mena osena mata dokona petena lapala lanyuo pumi, leya.
45Papala Satoko Netanepame kiŋi karena lao ipwa guu lao epenge yuu Giyone dokona kiŋi wasambipya. Dopa pipala dokopa baa lanyuo yuu taone dokona rae maiyuo pii poraiyuo lao pumisa dokome yuu doko wambu dupwa kilyipu kilyipu karaminyi doko emba selenelyamo.
46Solomone baa epapu kiŋi ingilyamo, leya.
47Dee mende palamo. Dapitinya yulu pyakamingi akali mupwa dupwame kiŋi Dapiti baa ketae pyambwala papala dopa leyami. Embena Kamongo Anatumi Solomone embapa manda manja naramopa baa mupwa wakasa ingyuo karena lena. Baame iso kararamo dokopa elyape wakasa ingyuo pena, leyami. Dokopa kiŋi Dapitimi banya luu palenge panda dokona pangu soo Anatu ketae pyambuo lakando ateŋa leya.
48Lapala nakama lamaiyuo, Kamongo Isaraele wambunya Anatumi nambana ikinyingi dokona mende kiŋi karena lapala nambame kando karape letamo dokona baa lakandamana, leya.
49Dokopa Atonainjana upunili wambu dupwa pakapala nakama sipuro yoko lapala kata wakale wakale dupwana peyami.
50Atonainja baa kiŋi Solomone kando pakapala Kamongona komau anda dokona konando papala Anatu mena pyao kiso maingi kana pyare laro karenge dokona papala pinjingi dusipa minyaro kareya.
51Karapala baame dopa leya. Kiŋi Solomone namba pyao kumasa naro lao wambo lalu lao lena lao karamo leyami doko kiŋi Solomoneme soo kareya.
52Sepala Solomoneme isingi lao, Baa kapa warombo soo rape rape lao karara ramo doko banya kyawasi dokona kuki mendepe minyanda narami. Dopa pii nara ramo doko baa kumara, leya.
53Lapala dokopa kiŋi Solomoneme akali Atonainja lanyuo lano epena leya. Dopa leyasa Atonainja baa kiŋi kareyamo dokona epapala wapambu pii pyao pangu siya. Dopa piyasa kiŋi Solomoneme baa anda pena leya.
