1 HANUA PAVAPAVADIA 16:16-30

¹⁶Tuari oreana na edia taruha ai harina e kamonai, Simiri ese hanua pavapavana ihadikana dalana e tahua, bona vada e alaia mase. Taunabunai, una dina ai Israel idoinai ese Omri, tuari oreana biaguna, e abia, Israel pavapavana ai e halaoa, taruha ai.

¹⁷Taunabunai, hari Omri na Gibeton amo e dae ela, bona Israel idoinai ia ida; bena Tirisa e koua heḡeḡe.

¹⁸Simiri ese e itaia, idia ese hanua vada e abia, bena ia ese hanua pavapavana ena ruma laloma daiutuna e haginia tutuka ḡauna lalonai e raka vareai, bena ia sibona daenai e doua, bena e mase.

¹⁹Una na ena kara dika daidiai, Iehova vairanai e kara havara bona Ieroboam ena dala ai e raka, kara dika e karava bona Israel danu e hakaraia dikava, daidiai.

²⁰Simiri ena kara orena, bona ena hahedika karana, sivaraidia na Israel Pavapavadia Sisigadia Bukana ai vada e hetore, ani?

²¹Bena Israel taudia na haheparara; kahana na Tibni Ginata murinai e raka, hanua pavapavana ai bae halaoa eto; ma kahana na Omri murina amo e raka.

²²A Omri murinai e raka taudia ese Tibni murinai e raka taudia na e hadareredia. Taunabunai, Tibni e mase, bona Omri na pavapava ai ela.

²³Asa, Iuda pavapavana, ena laḡani ihatoiahui-tana ai, Omri ese Israel e lohiaia matama; ena lohia laḡanidia na gwauta-rua. Laḡani tauratoi ia ese Tirisa ai e nohova.

²⁴Bena ia ese Samaria ororona na Semere ena amo e hoia; davana na silver talent rua. Bena ia ese maḡuna e karaia, bona hanua e hadaia, ladana e hatoa Samaria, ororo biaguna Semere inemaina.

²⁵Omri na Iehova vairanai e kara havara, e gunalaia taudia iboudiai edia kara havara ia ese e hereadia.

²⁶Badina be ia ese Ieroboam Nebata ena dala ai e rakava, bona kara dika ai, ia ese Israel taudia e hakaradia dikava, Iehova, Israel Diravana, e habadua, edia kaivakuku daidiai.

²⁷Omri ena kara orena, bona ena siahu e hahedinaraia, sivaraidia na Israel Pavapavadia Sisigadia Bukana ai e hetore ani?

²⁸Bena Omri na tubu tama dekediai e mahuta, Samaria ai e guria; bona natuna Ahaba ese ia gabuna ai e lohia.

²⁹Asa, Iuda pavapavana, ena laḡani ihatoiahui-taurahanina ai, Ahaba Omri ese Israel e lohiaia matama. Ahaba Omri ese laḡani ruahui-rua Israel e lohiaia, Samaria ai.

³⁰Ahaba Omri na Iehova vairanai e kara havara; e gunalaia taudia iboudiai na ia ese e hereadia.