1. King 16:16-30

¹⁶Lupwen ekei sounfiu ra rong pwe Simri a rawangaei ewe king o niela, ir meinisin ra seikätä Omri nöür we meilapen mwichen sounfiu, pwe epwe king lon Israel, lon ewe chök ränin me lon lenier we.

¹⁷Mürin, Omri me nöün kewe sounfiu meinisin ra feila seni Kipeton o pwelifeili Tirsa fän pisekin maun.

¹⁸Nge lupwen Simri a küna pwe ra liapeni ewe telinimw, a tolong lon ewe leni mi pöchökül me lon ewe imwen king, a kenala ewe imwen king i a nom lon o mäla.

¹⁹Ei a fis pokiten än Simri tipis, pwe a föri mine a ngau me fän mesen ewe Samol mi Lapalap usun Jeropoam a föri, pwal pokiten an emweni chon Israel ngeni tipis.

²⁰Nge lusun pworausen än Simri föför me an rawangau a mak lon puken uruwon ekewe kingen Israel.

²¹Mürin, ekewe aramasen Israel ra aimwüfesen lon ruu mwich. Esopun ekewe aramas ra tipeni Tipni nöün Kinat we mwän, pwe repwe seikätä lon wisan wisen king. Nge esopun ekewe aramas ra tipeni Omri.

²²Nge ekewe aramas mi tipeni Omri ra akufu chokewe mi tipeni Tipni. Iwe, Tipni a mäla, nge Omri a king.

²³Lon ilik me euin ierin mwün Asa ewe kingen Juta, Omri a tolong lon wisan wisen king o nemeni Israel. A nemenem lon ükükün engol me ruu ier, nge wonu ierin an nemenem a nom lon Tirsa.

²⁴Iwe, Omri a möni seni eman mwän itan Shemer ewe chukun Samaria won ükükün wonungeröü föün silifer. Mürin, a aüetä eu telinimw won ewe chuk o apöchöküla tittin. A aita ngeni ewe telinimw Samaria seni iten Shemer, ewe mi fanüeni ewe chuk me mwan.

²⁵Iwe, Omri a föri mine a ngau me fän mesen ewe Samol mi Lapalap, nge a fen föföringau lap seni chokewe meinisin mi akom mwan.

²⁶A föri ekewe föför mi ngau meinisin Jeropoam nöün Nepat we mwän a föri, a tipis usun Jeropoam o emweni chon Israel ngeni tipis. Iwe, ra asonga ewe Samol mi Lapalap ren ar fel ngeni ekewe uluulun anümwäl.

²⁷Nge lusun pworausen än Omri föför, pwal an föför mi pwora, a mak lon puken uruwon ekewe kingen Israel.

²⁸Iwe, Omri a mäla, nge ra peiaseni lon Samaria. Nge Ahap nöün we mwän a siwili lon wisan wisen king.

²⁹Iwe, lon ilik me waluen ierin mwün Asa ewe kingen Juta, Ahap nöün Omri we mwän a tolong lon wisan wisen king o nemeni Israel. Iwe, a nom lon Samaria o nemenem lon ükükün rüe me ruu ier.

³⁰Nge Ahap a föri mine a ngau me fän mesen ewe Samol mi Lapalap lap seni chokewe meinisin ra akom mwan.