1 Hadì 4:27-34

²⁷Is menge gubirnedur ziyà te menge distritu, iyan ebeǥey ki Hadì Solomon te keenen wey te langun he menge etew ziyà te turuǥan din. Is kada sevaha kandan midtendek he vulan is kebeǥey zin. Ebpeniguru sikandan he ikeveǥey zan is menge kinahanglan ni Solomon.

²⁸Ebeǥey zaan sikandan te barli wey kumpey he para te menge kudà he para te kerwahi wey te zuma pa he menge kudà. Ed-uwiten dan heini ziyà te lugar he ereg he ed-uwitan kayi zutun te midtendek he timpu te kebeǥey zan.

²⁹Mibeǥayan te Megbevayà si Solomon te nekeviza he ketau, kedsavut, wey keuluwanen he kenà egketegkad.

³⁰Is ketau zin lavew pa te ketau te langun he uluwanen diyà te edsilaan wey ziyà te Ehipto.

³¹Iyan sikandin kinemeteuwan te langun. Edhuna pa sikandin he metau ki Etan he Ezranhon, wey te menge anak ni Mahol he ensi Heman, Calcol, wey si Darda. Ne nevantug sikandin diyà te nekeelingkus he menge nasyun.

³²Mibaal sikandin te 3,000 he menge erubasa wey 1,005 he menge kanta.

³³Igkeseysey zin is mehitenged te ebpemenuvù, puun te zezekelà he menge kayu pehendiyà te utew zezeisey he ebpemenuvù. Ebpekepenudtul zaan sikandin bahin te minsan hengkey he klasi te: ebpemenhipanew, ebpemenanap, ebpemenlayang, wey is ebpenlayewlayew.

³⁴Nezineg te langun he menge hadì kayi te kelibutan is ketau ni Solomon, umbe zuen menge etew he midsuǥù dan te kebpemineg te ketau ni Solomon.