1 KING TAUDIA 4:27-34

²⁷Unai provins naria taudia 12 ese idia ta ta, lagani ta lalonai, hua ta lalonai king Solomona ena, bona king Solomona ena ruma dekenai idia ania taudia edia aniani idia henia. Inai provins naria taudia ese unai aniani henia gaukara be nega ibounai idia karaia namonamo, king ena ruma taudia ese aniani ibounai. hegeregere momokani, idia abia totona.

²⁸Bali bona rei kaukau danu, kariota hosi totona, bona guia hosi edia aniani totona gaudia, be unai provins naria taudia idia siaia lao, Solomona ia ura gabudia ibounai dekenai.

²⁹Dirava ese aonega bona diba bada herea Solomona dekenai ia henia, bona laloa dobu ena diba momo danu ia henia, kone ena miri idia momo bamona.

³⁰Unai dainai Solomona ena aonega ese dina daekau kahana taudia ibounai edia aonega bona Aigupito ena aonega ibounai ia hereaia.

³¹Solomona ena aonega ese taunimanima ibounai edia aonega ia hereaia, Etana, Eseraha tauna, bona Maholo ena natuna toi, Hemana, Kalakolo bona Darada, edia aonega danu.

³²Vadaeni idau bese taudia, Israela kahirakahira idia noho bese taudia, ese Solomona ena aonega sivarai idia kamonai. Solomona ese aonega hereva kwadogidia ibounai 3000 ia torea, bona ane ibounai 1000 mai kahana ia karaia.

³³Au bona ava namodia idauidau danu ia herevalaia, Lebanona sida audia dekena amo ela bona husopo avana, nadi magudia edia latanai ia tubu gaudia. Boroma idauidau, bona manu, bona idia rau noho gaudia, bona gwarume danu, ia ese ia herevalaia.

³⁴Vadaeni bese ibounai dekena amo taunimanima be Solomona ena aonega kamonai totona idia mai, bona king taudia ese edia hesiai taudia Solomona dekenai idia siaia, iena sisiba do idia kamonai totona.