Epeso 2

1

2

3

4

5

6

¹Omi hinage i hemaurimiu, laugagaeo au utusidi eo emi baaea debadi eai aue mate;

²nabada wa omi teina tanoubu laulaudi au lauwataidi, eo malagaibu gigiborina ena wasawasa debana eai, earua wa teina huia ta i paipaisoa awayagara nanatunayao nuadi eai.

³Boeadi eai ita nabada wa ta mimia, bulumada gadosisidi eai, tauda eo nuada lelehidi ta laulauwataidi, arinai ita hinage ouyalayala nanatunayao, doha tatao gamagari.

⁴Na Eaubada ia nuatoatoa ana gogo, ena gadosisi lailai arinai i gadosisieda,

⁵ita baaea boeana eai ta mamate wa, maeda Keriso i hemauriesegaida (ainauia debana eai au mauri),

⁶maeda i hetoroesegaida, i hebawabigabiga‐esegaida Keriso Iesu boeana eai, galewa dimodi eai.

⁷Isidi matada eai ena ainauia, nige aba nonoina wa, bena i heitadi, ena abilolo arida eai, Keriso Iesu boeana eai.

⁸Paana ainauia debana eai au mauri, sunuma debana eai; hinage omi emi abiabi eai nige’e, Eaubada ena ainauia ede.

⁹Nige laulau debadi eai, ata tau esau i ribapasipasiei.

¹⁰Paana ita ia nimana ginaurina, Keriso Iesu boeana eai i hetubuda bena paisoa lolodi ta paisoaidi, Eaubada i nuatu nonohaidio enada, aridi eai bena ta laulau.

¹¹Arinai abo au henuaisini, omi nabada wa murimuritataomiu, bulumamiu eai, isi tau‐peritome, iaede tatao nimadi eai se ginauri wa, omi esamiu se ribaei nige‐peritome,

¹²hage au henuaisini, nei huiana ne omi Keriso au miamurimuriei, Isaraela edi miagogo eai omi taowawa udodoi, eo ribahesunuma ribadi aridi eai omi dagodagora, nige emi sunuma eo tanoubu eai ta nige emi Eaubada.

¹³Na Keriso Iesu boeana eai omi nabada wa eaaawamiu se loha ariri, huia ta au hanahanauma Keriso osinana debana eai.

¹⁴Paana ia eda loni ede, ia labui wa i heoiesegaidi, eo gana wa duaduarida eai i peilabuieda i hetatagorigorio;

¹⁵ia bulumana eai eda hewaiunu nuatudi i helautomdi, lauhesom laugagaeodi edi uriuri eai se uridi; iabom mo boeana eai wau labui wa aridi eai tau harihariuna esega i hetubu, loni ena abatubu meta

¹⁶Taudi labui ia abo Eaubada arinai i laubiriedi se hemala tau esega mo satauro debana eai, hewaiunu nuatudi wa arinai i helautomyao.

¹⁷Eo i laoma loni lauguguiaeyawa omi eaaawamiu se loha arimiu eai, eo isi hinage se hanahanau aridi eai.

¹⁸Paana ede ia debana eai, tauda labui, Earua esegana debana eai, ta lulage Tamada arinai.

¹⁹Na huia ta omi nige taowawa eo omi nige dagodagora, na hetabu tataodi au hepatuesegaimiu maidamiu, omi edi eanua tataomiu ede, eo omi Eaubada ena numa tataomiu,

²⁰aposotolo eo peroveta paana eai se hetoromiu, Iesu Keriso iabom we’u saesaena kona eai,

²¹ia boeana eai numa se tubei komakomani se toreesegai abo ie tubu i hemala numa tabuna Guiau boeana eai,

²²arinai hinage omi se hetoroesegaimiu Eaubada ena abamia ede, Earua debana eai.