Epeses 2

1

2

3

4

5

6

¹Numugu a niomot i mat, uni mot lakai a warkurai ma mot pam a kum sakino petutna.

²Mot mur a kum petutna tagun a rakrakon bual, ma mot mur o Satan, a mugumugu anun a matanitu tagun a maino, ra uniri a niono i papam un det ra det pitarngat.

³Numugu, dat kai dat laun elar nama taro na pitarngat. Dat kai dat ugasgasi kut a pinindat, ma dat mur a kum nemnem ina pinindat ma a nuknukin dat. Di usus pas dat kai a kum tene sakino ut, ma a kankan anun o God i kis un dat, elar nami ra i kis un det a taro na pitarngat.

⁴Ikut, o God i bukus nama marmaris! I ulaun pas dat uni i maris doko dat.

⁵Ra dat mat una nundat a kum sakino petutna, i ulaun pas dat tomo nam o Karisito. O God i sa ulaun pas mot, kibino kut una nun a marmaris.

⁶O God i ukatutur tomo dat nam o Karisito gusun a minat, ma i ukis dat tomo nami una nun a kinkinis na king sapat netes una langit, uni dat tagun o Karisito Iesu.

⁷O God i pami lenra, sur in ese anun a marmaris torom dat un o Karisito Iesu, sur anun a labino marmaris sakit in nanpat talapor torom a kum taun taro numur.

⁸O God i maris mot ra i ulaun pas mot ra mot nurnur. Awu sur mot ut mot kibino uni, a etabor kut anun o God torom mot.

⁹Awu sur i ulaun pas mot kibino una kum wakak na pinapam ra mot pami, sako taio in warango pasi ut nami.

¹⁰Dat a sap na laman o God. Dat tagun o Karisito Iesu, ma o God i ukis dat sur dat in pam a kum wakak na pinapam, ra o God i sa waninar tari sur dat in pami.

¹¹Mot in nuk pasi, di usus mot awu sur mot a taro Juda. Ma a taro Juda det ser tok talilis a pinindet, elar nama ukinalong lena det anun o God. A petutna ra det pami nama lamandet. Ma numugu det watung mot lena awu sur mot anun o God, uni ka di tok talilis mot.

¹²Mot in nuk pasi lena, numugu ra mot kis gisen utmakai gusun o Karisito, mot awu sur a taro Israel, ma a kum kunubus ra o God i uliliman taru nami, awu sur anumot. Ma una numot a nilaun nin una rakrakon bual ka mot tasman o God, ma katu wakak na utna ra mot in kis langlang suri nama nurnur.

¹³Numugu mot kis bakbak gusun o God, ikut uniri, ra mot tagun o Karisito Iesu, a gapino i sa ben milau pas mot torom o God.

¹⁴Uniri dat kis na malmal, kibino kut un o Karisito. I sa dat tomo pas met a taro Juda ma mot ra awu sur a taro Juda, sur dat in takai mukut. Numugu ka dat emarom, i elar namin noworo ra i kutus dat, ikut o Karisito i sa rege ru i.

¹⁵Ra i mat, i urop ru a kum Warkurai anun a taro Juda, sur in dat tomo aru kabotaro, sur ara matok na kabotaro mukut, sur dat rop dat in kis na malmal.

¹⁶Ra o Karisito i mat unin nanai kutus, i dat tomo dat sur dat ara kut, ma i umarom tomo dat rop nam o God, ma i rakon ru a kinkinis na ebar.

¹⁷I wanpat ma i warawai una malmal torom mot ra mot kis bakbak gusun o God, ma torom met kai a taro Juda ra met kis milau.

¹⁸O Karisito i papos a kisapi anundat rop torom a Tamandat, un ara Tokodos na Nion kut.

¹⁹I mo ra, mot awu melet mo sur a kum usiro, awu. Uniri mot takai mukut nama taro anun o God, ma mot a kabotaro mulus anun o God.

²⁰Mot a rumu anun o God, ra di uturi netes una kum aposel ma a kum poropet. Det a kibin a rumu, ma o Karisito Iesu i a wakak na wat, ra i udekdek a rumu.

²¹Una wat ri, a kudulano rumu i tugus tomo, ma i wanpat a rumu na etabor ra katu dur uni, a rumu anun a Labino.

²²Ma mot kai ra tagun o Karisito, o God i dat tomo mot, sur mot in nanpat a rumu ra a Niono i kis uni.