18मेको आन सहर तेको तेको बाक्तेक्म देंशा हना, येज्रेल, केसुल्लोथ नु शुनेम, २राजा ४:८
19हाफ्राइम, शीओन नु अनाहारथ,
20रब्बीत, किश्योन नु एबेस,
21रेमेथ, एन-गन्नीम, एन-हददाह नु बेथ-पस्सेस बाक्तेक्म।
22मेको सांद ताबोर, शहसूमा नु बेथ-शेमेश सम्म जाक्दीश्शा, यर्दनमी नुप्शो बाक्त। मेको आन के बाक्तीक सहर नेल्ल पा १४ ओटा सहर नु मेकेर ङा गाउंपुकी बाक्तेक्म।
23इस्साकार आ खिं खिं ङा मुर आन सहर नु गाउंपुकी एकोन बाक्तेक्म।
24मिनु नोले योव़ङमेनु, आशेर आ खिं खिं ङा मुरपुकीमी आन रागी ताम्तेक्म। मेको आन रागी तेको तेको बाक्तेक्म देंशा हना, उत्पत्ती ४९:२०
25हेल्काथ, हाली, बेतेन नु आकशाफ,
26अल्लाम्मेलेक, अमाद नु मिशाल बाक्तेक्म। मिनु मेको सांद पच्छिममी कारमेल नु शीहोर-लिब्नाथ सम्म जाक्दीश्शो बाक्त।
27मिनु नोले पूर्ब गे बेथ-दागोन गे लशा, जबूलून नु इफ्ताह-एल ङा दिंम सम्म जाक्दीश्शो बाक्त। मेको उत्तर गे ङा बेथ-एमेक नु नेइल लशा, पेरा गे काबुल रागीमी ग्रूशो बाक्त।
28मिनु एब्रोन, रेहोब, हम्मोन नु कानाह सहर रे पा ठेयब सीदोन सम्म जाक्दीश्शो बाक्त।
29मिनु मेको सांद रामाह नु गारो पाइश्शो टायर सहर गे हिरशो बाक्त। मेको सांद लशा, होसाह गे समुन्द्र आ नेक्था ङा अकजीब सहरमी नुप्शो बाक्त। यहोसु १५:४४; न्यायाधीस १:३१
30उम्मा, अफेकाह नु रेहोब, नेल्ल पा मेको आन के २२ ओटा सहर नु मेकेर ङा गाउंपुकी बाक्तेक्म।
31आशेर आ खिं खिं ङा मुर आन सहर नु गाउंपुकी एकोन बाक्तेक्म।
32मिनु नोले योव़ङमेनु, नाप्ताली आ खिं खिं ङा मुरपुकीमी आन रागी ताम्तेक्म। उत्पत्ती ४९:२१
33मेको आन सांद हेलेफ, सा-अनानीममी बाक्शो ठेयब रवा, अदामी-नेकेब लाक्शा, यब्नेल रे लक्कुम सम्म लशा, यर्दनमी नुप्शो बाक्त।
34मेको सांद पच्छिममी अच्नोथ-ताबोर रे लाइश्शा, हुक्कोकमी ग्रूशो बाक्त। मिनु मेको दक्खिन गे जबूलून सम्म, पच्छिम गे आशेर सम्म, नु पूर्ब गे यहूदा आ यर्दन सम्म जाक्दीश्शो बाक्त।
35मिनु गारो पाइश्शो सहरपुकी चहिं सिददीम, सेर, हम्माथ, रक्कत, किन्नेरेथ,
36आदामाह, रामाह, हासोर,
37केदेश, एद्रेइ, एन-हासोर
38इरोन, मिग्दल-एल, होरेम, बेथ-अनात नु बेथ-शेमेश बाक्तेक्म। मेको नेल्ल पा मेको आन के १९ ओटा सहर नु मेकेर ङा गाउंपुकी बाक्तेक्म। न्यायाधीस १:३३
39मिनु मेको नाप्ताली आ खिं खिं ङा मुर आन सहर नु गाउंपुकी एकोन बाक्तेक्म।
40मिनु नोले योव़ङमेनु, दान आ खिं खिं ङा मुरपुकीमी आन रागी ताम्तेक्म। मेको आन रागी तेको तेको बाक्तेक्म देंशा हना, उत्पत्ती ४९:१६
41सोराह, एश्ताओल नु इर-शेमेश,
42शा-आलब्बीन, आइयालोन नु इथ्लाह,
43एलोन, तिम्नाह नु एक्रोन, यहोसु १५:१०
44एल-तेके, गिब्बेथोन नु बालाथ,