لُكِ 23:2-54

²عٍ نَشَ سٌ عَ كَلَمُقٍ، عٍ نُ عَ قَلَ، «مُشُ بَرَ يِ شّمّ لِ عَ نَ مُشُ شَ حَمَ رَ مُرُتَقٍ. عَ بَرَ عَ قَلَ عٍ بّ عَ عٍ نَشَ دُوتِ قِ رْ مَ مَنفّ شُنفبٍ مَ. عَ مَن نَشّ، عَ عَ تَن يّتّ قِندِشِ مَنفّ نَن نَ، عَلَ شَ مِشِ سُفَندِشِ.»

³ثِلَتِ نَشَ عِسَ مَشْرِن، «عِ تَن نَن قِندِشِ يُوِقِيٍ شَ مَنفّ رَ؟» عِسَ نَشَ عَ يَابِ، «عِ تَن نَن عَ قَلَشِ.»

⁴ثِلَتِ نَشَ قَ عَ قَلَ سّرّشّدُبّ كُنتِفِيٍ نُن حَمَ بّ، «ﭑ مُ قٍ كٌبِ يٌ تٌشِ يِ شّمّ شَ قٍ.»

⁵كْنْ حَمَ مَن نَشَ عَ كَرَشَن، عٍ نُ عَ قَلَ، «عَ بَرَ مِشِيٍ كُي عِسٌ عَ شَ شَرَنيِ رَ يُدَيَ بْشِ بِرِن مَ، كٍلِقٍ فَلِلٍ بْشِ مَ، هَن بٍ.»

⁶ثِلَتِ تٌ فَلِلٍ شِلِ مّ، عَ نَشَ مَشْرِنيِ تِ شَ عِسَ فَلِلٍكَ نَن عَ رَ.

⁷عَ تٌ عَ كٌلٌن عَ عِسَ نُ نَ فَلِلٍ مَنفّ هٍرٌدٍ شَ يَامَرِ نَن بُن مَ، عَ نَشَ عَ رَ سَنبَ هٍرٌدٍ مَ، نَشَن قَن نُ نَ دَرِ سَلَمُ تَا كُي نَ وَشَتِ.

⁸هٍرٌدٍ نَشَ سّيوَ عِسَ تٌقٍ رَ، بَرِ مَ كَقِ تّمُي شْنكُيٍ عَ نُ وَ مَ عَ تٌقٍ. عَ تٌ نُ بَرَ عَ شَ قٍ مّ، عَ شْلِ نُ عَ مَ عِسَ شَ تْنشُمَ مَكَابَشِ ندٍ رَبَ عَ يَ شْرِ.

⁹نَ كُي، هٍرٌدٍ نَشَ مَشْرِنيِ فبٍفبٍ تِ عِسَ مَ، كْنْ عِسَ مُ يَابِ كٍرٍن قِ.

¹⁰سّرّشّدُبّ كُنتِفِيٍ نُن سّرِيّ كَرَ مْشْيٍ نُ تِشِ نَا، عٍ نُ عِسَ كَلَمُ عَ حَاشِ رَ.

¹¹هٍرٌدٍ نُن عَ شَ سْورِيٍ قَن نَشَ عَ كٌنبِ عَ مَيَافِشِ رَ، عٍ نُ عَ مَيٍلٍ. عٍ تٌ فُبَ تٌقَنيِ رَفٌرٌ عَ مَ مَيٍلٍ سٍ رَ، هٍرٌدٍ نَشَ عَ رَفبِلٍن ثِلَتِ مَ.

¹²سِنفٍ، ثِلَتِ نُن هٍرٌدٍ دّ مُ نُ قَن، كْنْ نَ لْشْي بٌورٍحَ نَشَ لُ عٍ تَفِ.

¹³ثِلَتِ نَشَ سّرّشّدُبّ كُنتِفِيٍ، مَنفّيٍ، نُن حَمَ مَلَن،

¹⁴عَ عَ مَسٍن عٍ بّ، «وٌ بَرَ قَ يِ شّمّ رَ ﭑ شْن عَ كَلَمُقٍ رَ عَ عَ نَ مِشِيٍ بْحّ رَتٍقٍ. مُشُ بَرَ دّ مَسَرَ وٌ يَ شْرِ، كْنْ ﭑ مُ قٍ كٌبِ يٌ تٌشِ عَ رَ، وٌ عَ كَلَمُشِ نَشَن مَ.

¹⁵هٍرٌدٍ قَن مُ سٍ تٌشِ، بَرِ مَ عَ بَرَ عَ رَفبِلٍن وٌن مَ. عَ مَتٌ، يِ شّمّ مُ قٍقٍ رَبَشِ عَ لَنمَ عَ شَ قَشَ نَشَن مَ.

^16‏نَ كُي، ﭑ يَامَرِ قِمَ نّ عَ شَ بْنبْ، ﭑ قَ عَ رَبّحِن.»

¹⁸كْنْ بِرِن نَشَ سْنشْي رَتٍ، عٍ عَ قَلَ، «يِ شّمّ قَشَ! بَرَبَسِ رَبّحِن مُشُ بّ.»

¹⁹فٍرٍ سٌي ندٍ نَن نُ بَرَبَسِ رَ نَشَن نُ بَرَ سَ فٍيلِ عَ تٌ كٍلِ مَنفَسَنيِ شِلِ مَ. حَشَسِ تٌ بِرَ تَا كُي، عَ نَشَ قَشّ تِ.

²⁰ثِلَتِ تٌ نُ وَ مَ عِسَ رَبّحِنقٍ، عَ مَن نَشَ وْيّن حَمَ بّ،

²¹كْنْ عٍ نُ سْنشْقٍ نَن تُي، «عَ بَنبَن! عَ بَنبَن وُرِ مَفَلَنبُشِ مَ!»

²²ثِلَتِ مَن نَشَ وْيّن عٍ بّ عَ سَنمَيَ سَشَن ندٍ، «مُنقٍ مَ؟ عَ قٍ حَاشِ مُندُن نَبَشِ؟ ﭑ مُ سٍسٍ رَكْرْ سِشِ عَ شَ قٍ، عَ لَنمَ عَ شَ قَشَ نَشَن مَ. نَ كُي، ﭑ يَامَرِ قِمَ نّ عَ شَ بْنبْ، ﭑ قَ عَ رَبّحِن.»

²³كْنْ حَمَ نُ سْنشْي رَتٍقٍ نَن تُي، عٍ ثِلَتِ كَرَشَن، عِسَ شَ بَنبَن وُرِ مَفَلَنبُشِ مَ. نَ كُي، عٍ شُي نَشَ نْ مَنفّ رَ.

²⁴ثِلَتِ نَشَ نَتّ تٌنفٌ، عٍ وَشْنقٍ شَ رَبَ.

²⁵عَ نَشَ بَرَبَسِ رَبّحِن، نَشَن نُ نَ فٍيلِ كُي فٍرٍ سٌقٍ نُن قَشّ تِقٍ مَ، عَ قَ عِسَ سَ حَمَ سَفٌي.

²⁶عٍ تٌ نُ عِسَ شَنِنقٍ، عٍ نَشَ سِمْن سِرٍنِكَ لِ، عَ سٌقٍ تَا كُي كٍلِ دَاشَ. عٍ نَشَ عَ سُشُ، عٍ وُرِ مَفَلَنبُشِ سَ عَ قَرِ، عَ تَن شَ عَ شَنِن عِسَ بّ عَ شَنبِ رَ.

²⁷حَمَ فبٍفبٍ نُ بِرَشِ عِسَ قْشْ رَ. فِنّ ندٍيٍ قَن نُ نَ عٍ يَ مَ، نَشٍيٍ نُ وَقٍ عَ فبٍفبٍ رَ.

²⁸عِسَ نَشَ عَ يَ رَقِندِ عٍ مَ، عَ عَ مَسٍن عٍ بّ، «دَرِ سَلَمُ دِ فِنّيٍ، وٌ نَشَ وَ ﭑ تَن مَ قٍ رَ. وٌ وَ وٌ يّتّ نُن وٌ شَ دِيٍ نَن مَ قٍ رَ،

²⁹بَرِ مَ وَشَتِ قَقٍ، مِشِيٍ عَ قَلَمَ نّ، ‹سّيوّ نَ دِبَرِتَرٍيٍ بّ، نَشٍيٍ مُ شِحّ قِ دِيْرّ مَ.›»

³⁰«عٍ مَن قَمَ نّ عَ قَلَدٍ فٍيَيٍ بّ، ‹وٌ بِرَ مُشُ مَ!› عٍ عَ قَلَ تٍنتٍنيِيٍ بّ، ‹وٌ مُشُ مَكٌتٌ، مُشُ شَ رَفَتَ!›»

³¹«شَ يِ قٍ مْولِ نَن نَبَمَ وُرِ شِندٍ رَ، وُرِ شَرٍ تَن قَ لُمَ دِ؟»

³²عٍ نَشَ سُوتٍ قِرِن قَن شَنِن، عٍ شَ عٍ قَشَ عٍ نُن عِسَ.

³³عٍ تٌ يِرٍ ندٍ لِ، دّننَشّ شِلِ شُنكٌنكٌتَ يِرٍ، عٍ نَشَ عِسَ بَنبَن وُرِ مَفَلَنبُشِ مَ. عٍ نَشَ نَ فٍيلِمَنِ قِرِن قَن مَبَنبَن، عٍ كٍرٍن تِ عِسَ يِرٍقَنيِ مَ، عٍ بٌورٍ تِ عِسَ كْولَ مَ.

³⁴عِسَ نَشَ عَ مَسٍن، «ﭑ بَبَ، دِحّ يِ مِشِيٍ مَ، بَرِ مَ عٍ مُ عَ كٌلٌن عٍ قٍقٍ نَشَن نَبَقٍ.» عٍ نَشَ كَندَ بُن عَ شَ دُفِيٍ شَ قٍ رَ، عَلَكٌ عٍ شَ عَ كٌلٌن كَنكَن نَشَن سْتْمَ.

³⁵حَمَ نَشَ تِ نَا، عٍ نُ عٍ يَ تِ نَ قٍ بِرِن نَ. كُنتِفِيٍ قَن نُ نَ عِسَ مَيٍلٍقٍ، عٍ نُ عَ قَلَ، «عَ بَرَ مِشِ فبّتّيٍ رَكِسِ. عَ شَ عَ يّتّ قَن نَكِسِ، شَ عَ قِندِشِ عَلَ شَ مِشِ سُفَندِشِ نَن نَ!»

³⁶سْورِيٍ قَن نَشَ عَ مَيٍلٍ، عٍ قَ، عٍ وّنِ مُلُشُنشِ تِ عَ بّ،

³⁷عٍ عَ قَلَ، «شَ عِ قِندِشِ يُوِقِيٍ شَ مَنفّ نَن نَ، عِ يّتّ رَكِسِ!»

³⁸يِ سّبّلِ نَن نُ فبَكُشِ عَ شُن مَ، «يُوِقِيٍ شَ مَنفّ نَن يَ.»

³⁹سُوتٍ كٍرٍن نَشَن نُ بَنبَنشِ عَ قّ مَ، عَ نُ عِسَ مَكٌنبِقٍ، عَ نُ عَ قَلَ، «عِ مُ قِندِشِ عَلَ شَ مِشِ سُفَندِشِ شَ رَ؟ عِ يّتّ رَكِسِ، عِ مُشُ قَن نَكِسِ!»

⁴⁰كْنْ عَ بٌورٍ سُوتٍ نَشَ وْيّن عَ مَ، عَ عَ مَشْرِن، «وٌن بِرِن تٌ فبَلٌي نَن سْتْشِ يِ كِ، عِ مُ فَاشُمَ عَلَ يَ رَ؟

⁴¹عَ لَنشِ تَن وٌن قِرِن شَ يِ قٍ سْتْ، بَرِ مَ عَ قِندِشِ وٌن مَ كّوَلِ كٌبِيٍ سَرٍ نَن نَ. كْنْ يِ تَن مُ قٍقٍ كٌبِ رَبَشِ.»

⁴²عَ تٌ فّ نَ قَلَدٍ عَ بٌورٍ بّ، عَ نَشَ عَ قَلَ عِسَ بّ، «عِسَ، عِ شَ رَتُ ﭑ مَ عِ سٌمَ عِ شَ مَنفّيَ كُي تّمُي نَشّ.»

⁴³عِسَ نَشَ عَ يَابِ، «ﭑ شَ نْندِ قَلَ عِ بّ، تٌ يَتِ، عِ سٌمَ نّ ﭑ قْشْ رَ عَرِيَننَ.»

⁴⁴يَنيِ تَفِ حْندْن تٌ عَ لِ، دِ مِ نَشَ سِن بْشِ بِرِن مَ، لّيرِ سَشَن بُن مَ.

⁴⁵سٌفٍ نَشَ عِقْورْ. دُفِ شُنفبٍ نَشَن سِنفَنشِ هْرْ مْبَنشِ كُي، عَ نَشَ عِبْو قِرِن نَ.

⁴⁶نَ تّمُي عِسَ مَن نَشَ عَ شُي رَتٍ سّنبّ رَ، عَ عَ قَلَ، «ﭑ بَبَ، ﭑ بَرَ ﭑ نِي سَ عِ بّلّشّ.» عَ تٌ نَ قَلَ، عَ نَشَ لَاشِرَ.

⁴⁷سْورِ كّمّ شُنمَتِ نَشَن نُ نَ نَا، عَ تٌ عَ تٌ نَشَن نَبَشِ، عَ نَشَ عَلَ مَتْشْ يِ مَسٍنيِ رَ، «نْندِ نَ عَ رَ يَتِ، تِنشِنتْي نَن نُ يِ شّمّ رَ!»

⁴⁸حَمَ نَشَن بِرِن نُ مَلَنشِ نَ قَشّ مَتٌدٍ، عٍ قَن تٌ قٍ بِرِن تٌ نَشٍيٍ رَبَشِ، عٍ نُ فبِلٍنقٍ سُننُنيِ نَن كُي، عٍ بّلّشّ سَشِ عٍ شُنيِ.

⁴⁹كْنْ عِسَ كٌلٌنمَيٍ بِرِن نُن فِنّ نَشٍيٍ بِرَ عَ قْشْ رَ كٍلِ فَلِلٍ، عٍ تَن نُ تِشِ، عٍ نَ قٍ بِرِن مَتٌمَ، عٍ ندٍدِ نُ مَكُيَشِ نَا رَ.

⁵⁰شّمّ قَنيِ تِنشِنتْي ندٍ نُ نَ، نَشَن نُ شِلِ يُسُقُ. يُوِقِيٍ شَ كِيتِسَ ندٍ نَن نُ عَ رَ،

⁵¹كْنْ عَ تَن مُ تِن عَ بٌورٍ كِيتِسَيٍ شَ نَتّ كٌبِ رَ، عٍ قٍ نَشَن نِيَ عِسَ رَ. عَ نُ كٍلِشِ عَرِ مَتٍ نّ، يُدَيَ بْشِ مَ. عَ نُ نَ عَلَ شَ مَنفّيَ نِينِ مَمّقٍ.

⁵²عَ تَن يِ شّمّ نَشَ سِفَ ثِلَتِ يِرٍ، عَ سَ عِسَ قُرٍ مَشَندِ عَ مَ.

⁵³نَ تّمُي، عَ تٌ عِسَ قُرٍ رَفٌرٌ وُرِ مَفَلَنبُشِ كْن نَ، عَ نَشَ عَ كَسَنفٍ، عَ عَ بّلّ فَبُرِ، نَشَن نُ فٍشِ فّمّ كُي، قُرٍ يٌ مُ نُ رَفَتَ دّننَشّ.

⁵⁴يِ قٍ بِرِن نَبَشِ مَلَبُ لْشْي نَن يَ رَ.