San Lucas 23:2-54

²Na' gulezú lawe̱' dxelagu zrie̱' Jesús, dxelenné̱': ―Ble'entu' benne' nigá dxegú'u xel-le̱' bénneache chee̱ xeledábague̱' xu'u lawe'. Dxenné̱' quebe dxal-la' quízrujntu' da dxuchizruj César, benne' Roma, na' cá'anqueze dxenné̱' naque̱' Cristo, Benne' Wenná Bea.

³Nadxa Pilato bche̱be̱' Jesús: ―¿Nacu' Lue' Wenná Bea chee̱ judío ca'? Na' beche̱be Jesús: ―Ca' naca na, ca ba gunnáu' lue'.

⁴Nadxa gunná Pilato, guzre̱' benne' xíchaje̱ ca' chee̱ bxruze ca', ne bénneache ca': ―Quebe bi da zrinnaj dxezrelda' nun benne' nigá.

⁵Benne' ca' belún chúchue̱' dizra' chee̱', gulenné̱': ―Dxegu'u xel-le̱' xúgute̱ benne' zaj zre̱'e̱ xe̱zre ca' zaj nababa Judea chee̱ xeledábague̱' xu'u lawe'. Guzú lawe̱' dxune̱' na naga nababa Galilea, na' na'a dxune̱' na nigá.

⁶Gate ben Pilato da nigá, na' bche̱be̱' che naca Jesús benne' Galilea.

⁷Gate gulé̱'e̱ le̱' naca Jesús benne' Galilea, na' Pilato gusél-le̱' Le̱' lau Herodes, benne' dxenná be'e̱ xe̱zre ca' zaj nababa Galilea, na' lu zra na' zue̱' Jerusalén.

⁸Gate ble'e Herodes Jesús, gubéle̱'e̱ne̱', lawe' da bátate̱ dxaca lazre̱' lé'ene̱' Le̱', lawe' da ba benne̱' dxuluchalaj bénneache chee̱ Jesús, na' guca lazre̱' lé'ene̱' gun Jesús tu xel-la waca da za xabáa.

⁹Da zante̱ da bche̱be̱' Jesús, na' Le̱' quebe bi beche̱be̱'.

¹⁰Zráqueze benne' xíchaje̱ ca' chee̱ bxruze ca' na', nen benne' ca' dxuluxuzájle̱'e̱ da nadxixruj bea na, na' belún chúchue̱' dizra' chee̱' da dxelagu zria Jesús.

¹¹Nadxa Herodes, ne benne' chee̱' ca' dxjaque̱' wedil-la buluzúe̱' Le̱' chalá'ala, na' chee̱ xelún le̱' chee̱', bulugácue̱' Le̱' ladxe' bzawe ca naca zra tu benne' wenná bea. Nadxa Herodes besel-le̱' Le̱' lau Pilato.

¹²Lu zra na' Pilato, ne Herodes belexaque̱' tuze, lawe' da belezrá'a ljwezre̱' nédxute̱.

¹³Nadxa Pilato bchague̱' benne' xíchaje̱ ca' chee̱ bxruze ca', ne benne' xu'u lawe' ca',

¹⁴na' guzre̱' benne' ca': ―Le'e guche̱le benne' nigá za'le naga zua', dxennale dxegú'u xel-le̱' bénneache chee̱ xeledábague̱' xu'u lawe'. Neda' ba bche̱ba' Le̱' laule le'e, na' quebe bi da zrinnaj dxezréleda' nune̱' ca naca da dxennale chee̱'.

¹⁵Cá'anqueze Herodes quebe bi da zrinnaj bzrélene̱' da nun Jesús, na' budée̱' Le̱' launtu'. Quebe bi ne gune̱' chee̱ chuga' chee̱' gatie̱'.

¹⁶Gudéa' Le̱' xel-la zi', na' gusánqueza' Le̱'.

¹⁷Dxácate̱ dxaca laní na', Pilato dxal-la' gune̱' tu da dxelezaca ba lazre' bénneache, gusane̱' tu benne' xu'e̱ lizre xia.

¹⁸Xúgute̱ benne' ca' gulezú lawe̱' dxelebezre xe̱'e̱, dxelenné̱': ―¡Gate benne' nigá! ¡Bsan Barrabás na'!

¹⁹Barrabás nigá gulegú'e̱ le̱' lizre xia lawe' da gudábague̱' xu'u lawe', na' be̱tie̱' tu benne'.

²⁰Pilato guca lazre̱' gusane̱' Jesús, na' bchálajle̱ne̱' benne' ca' xetú.

²¹Na' benne' ca' gulebezre xe̱'e̱ zízrajdxa, dxelenné̱': ―¡Bde̱'e̱ xaga béguaj! ¡Bde̱'e̱ xaga béguaj!

²²Da guxunne' lasa gunná Pilato: ―¿Bizra da zrinnaj nune̱'? Quebe bi dxezréleda' da gudé na Le̱' gatie̱'. Gudéa' Le̱' xel-la zi', na' te na' gusana' Le̱'.

²³Na' benne' ca' belún chúchue̱' dizra' chee̱' chee̱ te̱'e̱ xaga béguaj, ne gulebezre xá'atie̱', nen benne' xíchaje̱ ca' chee̱ bxruze ca', cadxa guca ca da gulaca lazre̱'.

²⁴Nadxa Pilato guchugue̱' chee̱ Jesús gaca chee̱' ca da dxelaca lazre' benne' ca'.

²⁵Na' bsane̱' bénnea' belenabe̱', xu'e̱ lizre xia lawe' da gudábague̱' xu'u lawe', ne be̱tie̱' tu benne', na' bdee̱' Jesús chee̱ gaca chee̱' ca dxelaca lazre' benne' ca'.

²⁶Gate zjaque̱' zaj naché̱'e̱ Jesús chee̱ xuludé̱'e̱ Le̱' xaga béguaj, na' gule̱le̱' tu benne' Cirene, le̱' Simón, zezé̱'e̱ le̱'e̱ xixre', na' bulugu'e̱ le̱' xaga béguaj chee̱ Jesús, na' zéaje̱' cuzru Jesús na'.

²⁷Na' xjácale̱ Le̱' benne' zante̱, ne nu'ula zan dxelebezre̱', na' dxelebezre xache̱' ne̱ chee̱ da dxaca chee̱ Jesús.

²⁸Nadxa Jesús gunné̱'e̱ nu'ula ca', na' guzre̱' le̱': ―Le'e, nu'ula Jerusalén, quebe cuézrele chia' neda'. Le cuezre cheé̱quezle, ne chee̱ zrí'inele,

²⁹lawe' da zrin zra gate xelenné̱': “Ba neza zren naca na chee̱ nu'ula wizre, ne nu'ula ca' cabata' gulezúe̱' zi'i, ne nu'ula ca' cabata' bulugazre̱' bidau'.”

³⁰Lu zra na' xelezú lau bénneache xelé̱'e̱ xi'a ca': “Le gugacu netu' xu.” Na' xelé̱'e̱ xí'adu ca': “Le gucache netu'.”

³¹Che dxelune̱' da caní chia' neda', naca' ca tu xaga ban, ¿gázradxa xelune̱' chee̱le le'e, nácale ca xaga bizre ca'?

³²Cá'anqueze guleché̱'e̱ chupa benne' we̱n da zrinnaj chee̱ xelútie̱' le̱' tu zren nen Jesús.

³³Gate belezrine̱' lataj na' nazí le na, Calavera, da zéaje̱ na, Xi'a Zrita Xíchajdxu, na' buludé̱'e̱ Jesús xaga béguaj, ne cá'anqueze belune̱' chee̱ benne' we̱n da zrinnaj ca', tue̱' cuite̱' xabe̱la, ne xetúe̱' cuite̱' xéglala.

³⁴Ca dxuludé̱'e̱ Le̱' xaga béguaj, na' gunná Jesús: ―Xrae, bnite lau chee̱ benne' caní lawe' da quebe zaj nézene' bi na' dxelune'. Na' benne' dxjaque̱' wedil-la gulebeje̱' da dxunna bea' chee̱ xelezí'e̱ late' weaj zra lana Jesús.

³⁵Benne' ca' zaj zre̱'e̱ na' dxelenné̱'e̱, ne benne' xu'u lawe' ca' belún le̱' chee̱', dxelenné̱': ―Bselé̱' benne' xula ca'. Na'a dxal-la' guselá cuine̱' che da li naque̱' Cristo, Bénnea' Gucá'a Dios.

³⁶Cá'anqueze benne' dxjaque̱' wedil-la belún le̱' chee̱', na' gulebigue̱' cuita Jesús, ne buluxí'aje̱' Le̱' nupe zichaj.

³⁷Gulé̱'e̱ Le̱': ―Che lue' nacu' Wenná Bea chee̱ judío ca', bselá cuinu'.

³⁸Zua xichaj Jesús tu da naxúaj nen dizra' griego, ne dizra' latín, ne dizra' hebreo, da dxenná na: ―Wenná Bea chee̱ judío ca'.

³⁹Tu benne' we̱n da zrinnaj, bénnea' de̱'e̱ xaga béguaj be̱n le̱' chee̱ Jesús, dxenné̱': ―Che Lue' nacu' Cristo, bselá cuinu', ne bselate̱ netu'.

⁴⁰Na' xetú benne' we̱n da zrinnaj na' gudil-le̱' ljwezre̱'. Guzre̱' le̱': ―¿Quebe dxezrebu' Dios? Lue' dxezácaquezu' ca da gulechugue̱' chee̱' Le̱'.

⁴¹Dxi'u dxezácadxu ca da dxál-la'queze sácadxu, lawe' da dxaca chee̱dxu da dxal-la' sidxu ca naca da zrinnaj da nundxu, san benne' nigá quebe bi da zrinnaj nune̱'.

⁴²Nadxa gunné̱': ―Jesús, xeajsá lazre' neda' gate su lau' nna be'u.

⁴³Na' beche̱be Jesús: ―Da li dxapa' lue', ná'ate̱la súale̱quezu' neda' lu lataj chawe' chee̱ Dios.

⁴⁴Guca ca wagubizra. Nadxa ca naca lu xe̱zr la xu guchul-la na cadxa bzrinte̱ na dxedá' chunna.

⁴⁵Gubizra guchul-la na, na' ladxe' ze̱ lu xudau' bdxuaj na chúpala.

⁴⁶Nadxa gudxezre xa'a Jesús, dxenné̱': ―Xrae, lu na'u dxegu'a be' xu'a. Ca gunné̱' ca', na' gutie̱'.

⁴⁷Gate benne' dxenná bé'ene̱' benne' dxjaque̱' wedil-la blé'ene̱' ca da guca, na' be̱ lá'ane̱' Dios, gunné̱': ―Da li, benne' nigá quebe bi da zrinnaj be̱ne̱'.

⁴⁸Xúgute̱ benne' ca' zaj zre̱'e̱ na', gate belelé'ene̱' ca da guca, na' besiá'que̱' na', dxelu'e̱ lachu'e̱.

⁴⁹Xúgute̱ benne' ca' zaj núnbe'e̱ Jesús, ne nu'ula ca' xjácale̱ne̱' Jesús gate bezé̱'e̱ Galilea, belexegá'ane̱' zítu'la dxelenné̱'e̱ da caní.

⁵⁰Zua tu benne' chawe' ne xrlátaje le̱' José, benne' xe̱zre Arimatea chee̱ xe̱zre ca' zaj nababa Judea. Nababe̱' xu'u lawe' blau chee̱ judío ca'.

⁵¹José nigá dxebeze̱' zra nna bea Dios, na' quebe be̱ne̱' tuze ca da belún benne' xu'u lawe' blau ca'.

⁵²Benne' nigá guxíaje̱' xeajchálajle̱ne̱' Pilato, na' gunabe̱' latja gucache̱' Jesús.

⁵³Ca bexuzre buluxulétaje̱' Le̱' xaga béguaj, na' buluxuchele̱' Le̱' tu ladxe', na' gulu'e̱ Le̱' tu lu xe̱dxu ba, da ba gude̱ne̱' tu le̱'e̱ xi'a xiaj, naga quebe nu ne gáchequeze.

⁵⁴Naca na zra dxulucueze̱' chee̱ zra dxulupá'ane̱', da ba zua su lau na.