Duku 23:2-54

²kɛ́ nhò wɑ́tìrì kɛ tú ò sukii bɛnìtìbɛ̀ mbɛ kɛ̀ bɛ̀ bo yetɛ okpɑ̀ɑ̀tì, kɛ bɛ̀ nɑ̀ɑ́ nkɛ tú bɛ̀ bɑ́ nyietì dɑ̀ḿpóò okpɑ̀ɑ̀tì diɛwè Sesɑɑ, kɛ yu omɑ́ɑ̀ kɛ tú Kirisi okpɑ̀ɑ̀tì.

³Kɛ̀ Pidɑtii ò bekɛ kɛ dɔ̀: Fɔ̃́ɔ̃̀ tu Sifubɛ kóò kpɑ̀ɑ̀tɑ̀ɑ̀? Kòo tɛ̃́nnɛ́ kɛ dɔ̀: A ti m̀bɛ́i.

⁴Kɛ̀ Pidɑtii nɑ́kɛ́ ditĩ̀nnì nɛ̀ ikuɔ́ nìùbɛ̀ kó bɛkótíbɛ̀ kɛ dɔ̀: N yí yɑ̀ onìtì yie nkó mɛyɛi.

⁵Kɛ̀ bɛ̀ nyetíróo kɛ tú: Ò sukii bɛnìtìbɛ̀ mbɛ kɛ̀ bɛ̀ bo yetɛ okpɑ̀ɑ̀tì. Ò dɛ̀ ketɛ́ Kɑdidee nwe kɛ tɑ Sudee omɔu kɛ tùɔkɛnɛ̀ní diɛ.

⁶Pidɑti kèè dìì mɔ̀nnì Kɑdidee kó diyètìrì kɛ́bekɛ kɛ dɔ̀: A tú Kɑdidee kou nweɑ̀?

⁷Ò kèè dìì mɔ̀nnì Yesu túmɛ̀ Kɑdidee kou kóò duɔ́nko Edɔti, kɛ sɔ̃́ nhEdɔti bo Sedisɑdɛmmu dɛ kó yɛwe.

⁸Kɛ̀ Edɔtii yɑ̀ Yesu kɛ̀ dɛ̀ɛ ò nɑrikɛ mɛdiɛ̀ nkɛ yɛ̃́ ò do yomɛ̀ o kɔ̃mɛ, kɛ́ndɔ́ wèe dɔɔ̀ tidiɛtì kòo yɑ̀.

⁹Kòo bíékɛ́ Yesu tinɑ́ɑǹtì pɛ́u ò mɛ nyí nhò tɛ̃̀ńnɛ́ tìmɑtì.

¹⁰Kɛ̀ ikuɔ́ nìùbɛ̀ kó bɛkótíbɛ̀ nɛ̀ ikuɔ́ wɑ̃ɑ̃̀bɛ̀ ncómmú kɛ wɑ́tìrì Yesu mɛdiɛ̀.

¹¹Edɔti nɛ̀ o kó bɛhɑ̃ɑ̃pɔ̀mbɛ̀ kɛ̀ bɛ̀ nhò dɑú, koò sɑ̃̀ɑ̃́, kóò dɑ̀tínnɛ́ diyɑɑ̀bòrì sɑ̀ɑ̀rì, kɛ́wɛ̃tɛ kóò duɔ́nko Pidɑti.

¹²Dɛ kó diyiè Edɔti nɛ̀ Pidɑti kɛ̀ bɛ̀ɛ nɑrikɛ kɛ do sĩ.

¹³Kɛ̀ Pidɑtii tíí nyikuɔ́ nìùbɛ̀ kó bɛkótíbɛ̀ nɛ̀ dihɛì kó bɛkótíbɛ̀, kɛ́ bɛ̀ nɑ̀kɛ́ kɛ dɔ̀:

¹⁴Di kɔ̀tɛnní onìtì yie m borɛ̀ kɛ tú ò sukii bɛnìtìbɛ̀ kɛ̀ bɛ̀ bo yetɛ okpɑ̀ɑ̀tì kpɛti, kɛ̀ nh ò bìékɛ́ di ììkɛ̀ m mɛ nyí yɑ̀ ò cɑ̀kɛ mù.

¹⁵Edɔti mɛ mmúnkɛ í yɑ̀ o yɛi mmɑmɛ̀ kɛ wɛ̃̀tɛ kɛ wè nni nduɔnní, ò tũ nyí dɔ̀ɔ̀ mɛyɛi mmɑmɛ̀ mɛ̀ɛ̀ bo nte kɛ̀ ti ò kùɔ.

¹⁶M bo duɔ́ nkɛ̀ bɛ̀ɛ ò puotí kɛ̀ nh ò fĩ́ĩ.

¹⁷Bɑ́ dìì yentɛ́bɑnni Pidɑti do ɔ̃ ndò nkɛ́ bɛ̀ fĩ́ĩ nkukpetínkù kùmɑ́ɑ̀ ndi.

¹⁸Kɛ̀ bɛ̀ɛ pĩɛ̃kɛ́ bɛmɔu kɛ dɔ̀: Kuɔ onìtì yie nkɛ́fĩ́ĩ Bɑrɑbɑɑsi.

¹⁹(Bɛ̀ do yetɛ okpɑ̀ɑ̀tì kpɛti nti kɛ̀ dikpɑ̀nnìi ɑ̃nnɛ́ kɛ̀ Bɑrɑbɑɑsi kuɔ onìtì kɛ̀ bɛ̀ nhò kpetí.)

²⁰Kɛ̀ Pidɑti ndɔ́ kɛ́fĩ́ĩ nYesu, kɛ yíɛ́ kɛ́bɛ́innɛ̀ ditĩ̀nnì.

²¹Kɛ̀ ditĩ̀nnì dɔ̀kɛ pĩɛ̃kɛ́ kɛ dɔ̀: Bɑɑkɛ́ we kudɑpɑ̃ɑ̃tí! Bɑɑkɛ́ we kudɑpɑ̃ɑ̃tí!

²²Kɛ̀ Pidɑtii wɛ̃tɛ kɛ́bɛ́i nkucɛ mɛtɑ̃ɑ̃́mmɛ̀ kɛ dɔ̀: Ò dɔ̀ɔ̀ ɔ̃̀mmɛ yɛi? N yí yɑ̀ ò cɑ̀ɑ̀rɛ̀mu mùù bo nte kɛ̀ ti ò kùɔ. M bo duɔ́ nkɛ̀ bɛ̀ɛ ò puotí kɛ̀ nh ò fĩ́ĩ.

²³Kɛ̀ bɛ̀ nyetíróo kɛ pĩɛ̃kù kɛ tú: Bɑɑkɛ́ we kudɑpɑ̃ɑ̃tí, bɑɑkɛ́ we kudɑpɑ̃ɑ̃tí! Kɛ̀ bɛ toweku dɔkɛ dɛ́ukú kóò nɑ.

²⁴Kɛ̀ Pidɑtii yóu kɛ́yie mbɛ kpɛti,

²⁵kɛ́fĩ́ĩ mbɛ̀ do yetɛ okpɑ̀ɑ̀tì kpɛti kɛ̀ dikpɑ̀nnìi ɑ̃nnɛ́ kɛ̀ wèe kuɔ onìtì kɛ̀ bɛ̀ nhò kpetí, kɛ́ bɛ̀ duɔ́ nYesu kɛ̀ bɛ̀ bo ò dɔ̀ɔ̀ bɛ̀ ò dɔ́nɛ̀mɛ̀.

²⁶Kɛ̀ bɛ̀ ńkɔrinɛ̀ Yesu kɛ bo bɑɑkɛ́, kɛ́conɛ̀ Simɔɔ Sidɛnni ɛì kóò nìtì mɔù kòò kũntiní kupɑku, kɛ̀ bɛ̀ɛ ò pĩ nkóò tou nkudɑpɑ̃ɑ̃tí, kòo nkù tɔ kɛ tũ nYesu.

²⁷Kɛ̀ ditĩ̀nnì ò urí, kɛ̀ bɛnitipòbɛ̀ mɛí mɛí kɛ kuɔ̀ nho kpɛ́í.

²⁸Kɛ̀ Yesu wɛ̃ɛ̃tɛ kɛ́ bɛ̀ nɑ̀kɛ́ kɛ dɔ̀: Sedisɑdɛmmu kó bɛnitipòbɛ̀ bɑ́ nkuɔ̀nnɛ̀ n kpɛ́í, pètìnkɛ ńkuɔ̀nnɛ̀ dimɑ́ɑ̀ kpɛ́í nkɛ nɛ̀ di bí kpɛ́í.

²⁹Kɛ yɛ̃́ yɛwe kpɑɑnímɛ̀mu kɛ̀ bɛ̀ bo yĩ́ dɛ̀ ńnɑɑti sihɑ̃ũnsi, bɛ̀ɛ̀ í piɛ́, bɛ̀ɛ̀ í yɑ̃ɑ̃́ nyibí.

³⁰Dɛ mɔ̀nnì bɛnìtìbɛ̀ bo nnɑ́ɑ́ nyɛtɑ̃rɛ̀ kɛ tú: Duónɛ̀ní kɛ́ ti yɑ̃kɛ! Kɛ nɑ́ɑ́ nsitɑ̃ɑ̃́ kɛ tú: Tí kɑ̃ɑ̃́nnɛ̀.

³¹Kɛ̀ bɛ̀ dɔ̀ɔ̀ri miɛ nkudɔú kusũ̀ũ̀kù, kukperíkù kpɛrɛ bo ndòmmɛ̀?

³²Kɛ̀ bɛ̀ɛ kɔtɛnɛ̀ní bɛnitikɔ̀ùbɛ̀ bɛ̀dɛ́bɛ̀, bɛ̀ yóó wɛ̃nnɛ́nɛ̀ bɛ̀ Yesu kɛ́kuɔ.

³³Bɛ̀ tùɔ̀kɛ dìì mɔ̀nnì dibòrì mɑrì bɛ̀ tu dì Kodikotɑɑ (dɛ̀ɛ̀ tu kuyukɔ̃́ṹ) kɛ́ dɛ mbɑɑkɛ́ Yesu nɛ̀ bɛnitikɔ̀ùbɛ̀ bɛ̀dɛ́bɛ̀, yie nho bɑkù yoú, otɔù kucɑ̃̀nku.

³⁴Kɛ̀ Yesu bɛ́i nkɛ dɔ̀: N cicɛ cĩ́ɛ̃́ mbɛ bɛ̀ í yɛ̃́ bɛ̀ dɔ̀ɔ̀ri dɛ̀. Kɛ̀ tihɑ̃ɑ̃pɔ̀ntìi tɑ̃ɑ̃́ tɛ́tɛ́ kɛ́totɛ́ o yɑ̀ɑ̀tì.

³⁵Kɛ̀ bɛnìtìbɛ̀ ńcómmú dɛborɛ̀ koò wùó nkɛ̀ Sifubɛ kó bɛkótíbɛ̀ nhò dɑú kɛ tú: Wenwe wèè dɛɛtɛ́ bɛtɔbɛ̀, kòò mɛ̀nkɛ tú Kirisi nwe, Kuyie ntɑ̃ɑ̃tɛ́ wè wèe dɛɛtɛ́ omɑ́ɑ̀.

³⁶Kɛ̀ tihɑ̃ɑ̃pɔ̀ntì múnkɛ nhò dɑú, kɛ tɔ́ɔ́nko kóò duɔ́ mmɛnɛ́yɑ̃ɑ̃́ nkɛ dɔ̀:

³⁷Kɑ̀ɑ mɛ̀nkɛ tú Sifubɛ kóo kpɑ̀ɑ̀tì nwe, dɛɛtɛ́ ɑmɑ́ɑ̀!

³⁸Kɛ̀ bɛ̀ɛ wɑ̃ri tɛdɑbɛɛtɛ̀ kɛ dɔ̀: Yie nweè tu Sifubɛ kóo kpɑ̀ɑ̀tì. Kɛ́dɑnnɛ kudɑpɑ̃ɑ̃tí yómmɛ̀.

³⁹Bɛɛ̀ nitikɔ̀ùbɛ̀ bɛ̀ ò wɛ̃nnɛ́nɛ̀ bɛ̀ kɛ bɑɑkɛ́ kɛ̀ bɛ kóò mɔù nhò dɑú kɛ tú: Fɔ̃́ɔ̃̀ bɑɑ tú Kirisɑ̀ɑ̀? Dɛɛtɛ́ ɑmɑ́ɑ̀ kɛ nɛ́ ti dɛɛtɛ́.

⁴⁰Kòo tɔùu ò kpɑnnɛ̀ kɛ dɔ̀: A bɑɑ dé Kuyie nɑɑ? Fɔ̃́ nnɛ̀ we di bo difɔ̃̀tìrì dimɑ́ɑ̀ ndi.

⁴¹Tínti dɔ̀ɔ̀ mɛ̀ɛ̀ yɛi mmɑ̀nnɛ̀ bɛ̀ ti kuɔmu, wenwe mɛ nyí dɔ̀ɔ̀ mɛyɛi mmɑmɛ̀,

⁴²kɛ́deè kɛ́nɑ́kɛ́ Yesu kɛ dɔ̀: Kɑ̀ɑ wɛ̃tɛní dìì mɔ̀nnì ɑ kpɑ̀ɑ̀tìyuu miɛkɛ ɑ nyɛ̃́ n kpɛ́í.

⁴³Kɛ̀ Yesu ò nɑ̀kɛ́ kɛ dɔ̀: N dɑ nɑ́ɑ́ mmɔ́mmuɔ nwe, ɑ bo nni mbonɛ̀ yíe ndiwɛ̀ìhɛì miɛkɛ.

⁴⁴Diyiè dɔ́ kɛ́cómmú dìì mɔ̀nnì yɛyɔ kɛ̀ dɛ̀ɛ biitoo kɛtenkɛ̀ kɛmɔu kɛ́mbi, kɛ́tuɔkɛnɛ̀ tɛwebiètɛ̀ mɛ̀tɑ̃ɑ̃ti.

⁴⁵Bɑ́ diyiè tɛ̃́nkɛ í nnɑ́ kɛ̀ Kuyie ncĩ́ɛ̃̀tɛ̀ kó kuyɑ̀ɑ̀kùu kɛ̃tɛ́ ku cuokɛ̀.

⁴⁶Kɛ̀ Yesu pĩɛ̃kɛ́ kɛ dɔ̀: N cicɛ nh ɑ̃nnɛ́ m mɑ́ɑ̀ ɑ nɔu miɛkɛ nkɛ. Ò bɛ́i mɛmmɛ kɛ́deè kɛ́tɔ̃tɛ.

⁴⁷Kɛ̀ Odommu kɔbɛ kó kuhɑ̃ɑ̃pɔ̀nkùu yɑ̀ dɛ̀ɛ̀ dɔ̀ɔ̀ kɛ́sɑ̃ntɛ Kuyie nkɛ dɔ̀: Onìtì yiè mmɛ̀nkɛ í dɔ̀ɔ̀ mɛyɛi mmɑmɛ̀.

⁴⁸Bɛ̀ɛ̀ do kɔ̀tɛní muwéìmù, bɛ̀ yɑ̀ dìì mɔ̀nnì dɛ̀ɛ̀ dɔ̀ɔ̀ kɛ̀ bɛ yɛ̀mmɛ̀ɛ cɑɑ̀rɛ̀ kɛ̀ bɛ̀ ncíɛ̀rì kɛ pĩ́ mpĩ́ mbɛ cĩ̀ncĩ̀rɛ̀ nɛ̀ mɛyɛncɑɑ̀rìmɛ̀.

⁴⁹Bɛ̀ɛ̀ yɛ̃́ Yesu nɛ̀ bɛnitipòbɛ̀ bɛ̀ɛ̀ do ò nɛitinɛ̀ nɛ̀ Kɑdideení kɛ̀ bɛ̀ ncómmú mɛkɛntímɛ̀ kɛ wúó ndɛ̀ɛ̀ dɔ̀ɔ̀ri.

⁵⁰Onìtì mɔù weè do bo dibeéntĩ̀nnì miɛkɛ kɛ̀ bɛ̀ ò tu Sosɛfu, kòo tú onitisɑ̀ù kɛ dɔɔri Kuyie ndɔ́ dɛ̀.

⁵¹Wenwe do í yie nho kɔbɛ kpɛti, ò mɛ nyí nkɔkɛ́ bɛ̀ tì dɔ̀ɔ̀ri dɛ̀, ò do tú Adimɑtee ɛì kou nwe, kɛ bɑɑ Kuyie nkpɑ̀ɑ̀tìyuu.

⁵²Kòo kɔtɛ kɛ́mɔɔ Pidɑti dinùù kɛ bo kũnnɛ́ Yesu,

⁵³kóò cṹũnní kudɑpɑ̃ɑ̃tí, kóò pɔ̃ṹ nkuyɑɑ̀sɑ̀ɑ̀kù, kɛ́dɔú nkufɔ̃ti miɛkɛ bɛ̀ do keú kù dipèrì ĩ́nkɛ̀, bɑ́ bɛ̀ mu nyí nkù kũnnɛ́ òmɔù.

⁵⁴Dɛ̀ do tú Sifubɛ kó tɛom̀pùtɛ̀ ketírí kùù yuoku nku, kɛ̀ dɛ̀ nɛ́ bo wentɛ́ kɛ̀ tɛ̀ ḿbo.