Ŋicwofuŋ II 1:8-17

⁸Mume dâŋ ʒiŋuc bâtikiecnembiŋ: “E qizec susuc‐ticne ʒoricne, erâ umbika moc becsahaczi bakicne i ombâŋnao jomajec.” Iŋuc âzâcnepie muwec, “I Tisibe ŋic ʒâŋene Elia eki hâcne.”

⁹Ŋicwofuŋzi iŋuc murâ momori 50 jaŋere micne moc e momorifâc‐ticne 50 jaŋehec sorec‐jopawec. Eme Elia e tiki mocte botâŋnao ŋehame momori jaŋere micnezi fe fisirâ ʒiŋuc muhuc âzâcnewec: “O Anuture ŋic, go ŋicwofuŋzi hufâcmurâ mukac.”

¹⁰Iŋuc mume Eliazi momori 50 jaŋere micne dâŋ ʒiŋuc bâtikiecnewec: “No Anuture ŋic jukopacko sambâŋkonec ʒoc waharâ go gahacne â momorifâcge 50 ŋoŋe ʒâseŋ‐ŋopazejec.” Iŋuc muhame mi sambâŋkonec ʒoc waharâ micne e jahacne â momorifâc‐ticne 50 ʒâseŋ‐jopa‐fârezejec i.

¹¹Ehame ŋicwofuŋ e mocwâc momori 50 jaŋere micne moc e momorifâc‐ticne 50 jaŋehec sorec‐jopawec. Eme momori jaŋere micne e ferâ Elia ʒiŋuc muhuc âzâcnewec: “O Anuture ŋic, go ŋicwofuŋzi biac jâmbâŋ hufâcmurâ mukac.”

¹²E iŋuc mume Eliazi dâŋ ʒiŋuc bâtikiecnewec: “No Anuture ŋic jukopacko sambâŋkonec ʒoc waharâ go gahacne â momorifâcge 50 ŋoŋe ʒâseŋ‐ŋopazejec.” Iŋuc muha izia Anuture ʒoczi sambâŋkonec waharâ micne e jahacne â momorifâcne 50 ʒâtâmirec‐jopawec.

¹³Ehame ŋicwofuŋ e harierâ momori 50 moc jaŋere micne e momorifâcne 50 jaŋehec sorec‐jopawec. Eme momori 50 i jaŋere micne eki fe fisirâ Elia dieŋzi hecnewec. Ehuc mu wâwâsic ecnehuc muwec, “O Anuture ŋic, go sifu juju‐nane â kiŋaŋ qaqafâcge ʒi jaŋere juju i honetec wiac furi sâko ezejec.

¹⁴Manakic, sambâŋkonec ʒoczi waharâ momori 50 jaŋere micne jajahec â gurufâc‐jekic 50 guru jajahec jaha mâmâc ʒâtâmirec‐jopawec; nore juju ine sifu honetec furi sâko ezejec.”

¹⁵Iŋuc mume Wofuŋte aŋelozi Elia ʒiŋuc âzâcnewec: “Go ehec huc; go ere mi hâwicguoc.” Iŋuc mume Elia e faharerâ momori jaŋere micne ehec ŋicwofuŋtao hupic.

¹⁶Hu fisirâ ŋicwofuŋ ʒiŋuc muhuc âzâcnewec: “Wofuŋ e ʒiŋuc mukac: ‘Go Israe mâreŋko Anutu mi jume tinac Ekoroŋte nemu Baali‐Ʒebubu e mu wioc ecneniŋte kiŋaŋ sorec‐jopameŋte fofogaonec mi faharehuc hâmo‐jâmbâŋkecmu hâcne.’”

¹⁷Eme ŋicwofuŋ e Eliazi Wofuŋte dâŋ muwec irec sâc hâmowec. E hâmome ŋokâ‐ticne moc mi juwecte ɋaticne Jehoramzi tucticne qawec. I Josafata ere ŋokâ Joramzi Juda ŋicwofuŋ jume jara jajahec eha iŋuc fuawec.