Ŋicwofuŋ I 2:21-42

²¹Iŋuc mume muwec: “Sunami ŋokac ʒâŋene Abisaga e hahacge Adoniare ŋonâŋ eocte sâcne râcnezo me mâcne?”

²²Eme ŋicwofuŋ Salomo e neŋgoc‐ticne dâŋ ʒiŋuc bâtikiecnewec: “Go Sunami ŋokac Abisagazi Adoniare biŋe eocte numu‐narekic, iŋuc jaha ŋicwofuŋ gie i erea eocte numu‐narenʒaŋ me! E hâcne hahac‐nane jukac, erâ taha bapa Abiata â Zerujare ŋokâ Joabe jahe wâc erao qohotakopirec.”

²³Ŋicwofuŋ Salomo e dâŋ iŋuc murâ Wofuŋte maio mupaŋkehuc kecʒiŋuc muwec: “Anutuzi baficnuhame Adoniazi dâŋ muwec irec okacne qape hâmozejec.

²⁴Anutuzi basanaŋnuhuc mamac‐nane Dawidire eri ŋeŋeo râecnurâ mupaŋkewec irec sâc uucmaŋ moc bâfua‐narewec ere maio musanaŋkekopac hâcne: Adonia e miŋecgac jaha hâmozejec.”

²⁵Iŋuc murâ ŋicwofuŋ Salomozi Jojadare ŋokâ Benaja soreme eki rarâ Adonia qâhâmowec.

²⁶Eme ŋicwofuŋ e taha bapa Abiata ʒiŋuc âzâcnewec: “Ajoc, go Anatoti hae mâreŋko giegaŋge fokac ira rac. Manakic, go hâmocte biŋe enʒaŋ. Eme sifu miŋecgac mi qâhâmocgupemu. Go mârâc jaha mamac‐nane Dawidire maio Wofuŋ Anuture katapa reŋkemeŋ, erâ ʒârâ hâriŋ faio juhame ehec mâmâc jumeŋ irec erâ akicgukopac.”

²⁷Salomozi iŋuc muhuc Abiata jâpeme Wofuŋte taha bapa ŋic mocwâc mi juwec. Ehame Wofuŋzi mârâc Silo haeo Elire kikefuŋfâc jaŋere findaŋdâŋ muwec i deŋkewec hâcne.

²⁸Eme Joabe e mârâc jaha Abisalomtao ine mi qohotaweczi irec biŋe mana‐fârerâ Adoniarao qohotawecte hâwickeme gasackehuc Wofuŋte qoruc bozeo raʒirâ alata ʒuŋenao menezi hehawickewec.

²⁹Eme ŋic jaŋe, “Joabezi wiserâ Wofuŋte qoruc bozeo raʒirâ alata heririŋnao domakac,” iŋuc muhuc ŋicwofuŋ Salomo mufuacnepie Jojadare ŋokâ Benaja sorehuc ʒiŋuc âzâcnewec: “Ajoc, go rarâ qâhâmoc!”

³⁰Eme Benajazi Wofuŋte qoruc bozeo fisirâ Joabe ʒiŋuc âzâcnewec: “Go wahacmurâ ŋicwofuŋzi mume gazakopac!” Eme muwec: “Mâcne, no ʒira hâmopemu.” Iŋuc mume Benaja e risierâ Joabezi dâŋ muwec irec binaŋ i ŋicwofuŋ bacne‐fârewec.

³¹Eme ŋicwofuŋzi ʒiŋuc âzâcnewec: “E gazajec sâc iŋuc qâhâmorâ duckec! E fuŋne tâmiricko soc kosa hoŋkewec irec kiŋ no â mamac‐nanere garikiŋfâc nâŋeraonec bârâriec.

³²E mamac‐nane Dawidizi mi manahame ŋic jajahec e jahacne sâc jâuruhuc tiŋne â pectâc jupic jahe ʒikazi qâhâmoc‐jofawec, moc Nerare ŋokâ Abene, Israere momori guru jaŋere micne, â moc ine Judare momori guru jaŋere micne Jetera ŋokâ Amasa. Jahe kosa jofahuc kiŋ hurewecte okacne fisicnezejec.

³³Ŋic jahere socte kiŋzi Joabe e jahacne â ɋâricfâc‐ticne jaŋerao fohuc juzejec; Dawidi â ɋâricfâc‐ticne erâ garikiŋfâcne jaŋerao â eri ŋeŋe‐ticnao ine Wofuŋte wama fohuc juzejec sanaŋ.”

³⁴Eme Jojadare ŋokâ Benaja e rarâ Joabe qâhâmome ficticne mâreŋ burocnao ŋewec ira duckembiŋ.

³⁵Eme ŋicwofuŋzi Jojodare ŋokâ Benaja e Joabere tuc qarâ momori jaŋere micne juocte âkendâŋnewec, â taha bapa Zadokozi Abiata âkehockeocte mucnewec.

³⁶Eme irec faicnao ŋicwofuŋzi Simei hefârerâ ʒiŋuc âzâcnewec: “Go Jerusalem hae ʒira fic moc barâ ira ŋeŋe juju ehuc ira me ira mi rajâmbâŋkezemec.

³⁷Go ʒoaŋ mocko hae beherâ Kidoroŋ opâ fotâcnerâ hae mocko racmuo ine hâmo‐jâmbâŋkecmu, i manapaŋkezemec. Bahacgere erâ hâmo‐jâmbâŋkecmu hâcne.”

³⁸Eme Simeizi ŋicwofuŋ dâŋ ʒiŋuc bâtikiecnewec: “Go dâŋ mukomec i manape sâckekac. Erâ ŋicwofuŋ‐nane, go kiŋaŋŋicge no dâŋ nazakomec irec sâc epemu.” Eme Simeizi Jerusalem haeo dameŋ ʒora jufewec.

³⁹Jufeme jara 3 tarahame Simeire kiŋaŋ motec jahec jahe wisecnerâ Makare ŋokâ Akisi, Gati haere ŋicwofuŋ erao rapic. Ehame ŋic jaŋe Simei ʒiŋuc âzâcnembiŋ: “Manakic, motec jahecge Gati haeo jukopirec.”

⁴⁰Simei e iŋuc manarâ doŋgi‐ticne sate râecnerâ kiŋaŋ motec jahec‐ticne basac‐jofaocte Akisirao Gati haeo rawec. Raku bâfuac‐jofarâ irecnec bârisiec‐jofawec.

⁴¹Eme Simei e Jerusalem haeonec Gati haeo rarâ risiewec irec biŋe i Salomo mufuacnembiŋ.

⁴²Eme ŋicwofuŋzi kiŋaŋ sorec‐jopame Simei ecnepie fisime ʒiŋuc âzâcnewec: “No Wofuŋte maio mupaŋkehuc uŋdâŋ ʒiŋuc gazapo: ‘Go ʒoaŋ mocko hae ʒi beherâ ira me ira racmuo ine hâmo‐jâmbâŋkecmu, i manapaŋkezemec.’ Iŋuc mupe go dâŋ ʒiŋuc bârisie‐naremeŋ: ‘Go dâŋ mukomec i manape sâckekac, no reŋkepemu.’