1 Kings 2:21-42

²¹Me fulweg, ni ga’ar, “Mu pag walagem i Adonijah nge fek Abishag nge le’engiy.”

²²Me fith fare pilung, ni ga’ar, “Mangfan ni ga be ning ngog ni nggu pi’ Abishag ngak? Ere kubfel’ ni kag ra ning ngog ni ngkug pi’ e liw ko pilung ngak. Yug rogon riy, ma ir walageg nib nganni’, me Abiathar ni prist nge Joab e yow bfol ngak!”

²³Ma aram me micheg Solomon bbugithin u fithingan SOMOL, “Gu be micheg ni nge yim’ Adonijah ni bochan e biney nike ning, fa’ara dabi yim’ ma gu be yibilay ni nge gechig nigeg Got!

²⁴I SOMOL e ke teg nri gub mudugil u daken e chiya ntagil’ e pilung rok e chitamag i David; ke tay e tin ni micheg nra rin’ nga tagil’ ma ke pi’ e gagiyeg ko pilung ngog nge ngak e pi’in owcheg. Kug micheg u fithingan SOMOL ni be par nib fos nra yim’ Adonijah ni ka rofen ney!”

²⁵Ma aram me yog Solomon ni Pilung e n’en ni nge rin’ Benayah, ni ir e yan nge yan i li’ Adonijah nge yim’.

²⁶Ma aram me ga’ar Solomon ni Pilung ngak Abiathar ni prist, “Mu sul ko nam rom nga tafnam u Anathoth. Gur e rib fel’ ni nga mum’, machane dab gog ni ngan thang e fan rom e chiney, ni bochan e gur e um gagiyegnag fare Kahol ko M’ag rok SOMOL nnap’an ni um moy rok e chitamag i David, mu um un i chibiy urngin e tin ba mo’maw’ ni i yib ngak.”

²⁷Ma aram me chuweg Solomon i Abiathar ko pigpig ni prist rok SOMOL, aram e ke yan i m’ug nib riyul’ e tin ni yog SOMOL u Shiloh ni murung’agen Eli ni prist nge pi’in owchen.

²⁸Me rung’ag Joab e n’en ke buch. (Ma ba fol ngak Adonijah, gathi Absalom.) Ma aram me mil nge yan ko fare Tent u p’eowchen SOMOL nge yan i kol tabthungen fare altar.

²⁹Nap’an ni taw e thin ngak Solomon ni Pilung nike mil Joab ke yan ko fare Tent ke yan i par nga cheren e altar, me l’oeg Solomon ba tamal’og nge yan i fith Joab ko mangfan nike mil ko fare altar. Me fulweg Joab nike mil i yan ngak SOMOL ni bochan e kerus ngak Solomon. Ma aram me l’oeg Solomon ni Pilung i Benayah ni nge li’ Joab nge yim’.

³⁰Me yan ko fare Tent u p’eowchen SOMOL me ga’ar ngak Joab, “Keyog e en ni pilung ni ngamub nga wean.” Me fulweg Joab, ni ga’ar, “Danga’, bay gum’ u roy.” Me sul Benayah ngak e en pilung nge yog ngak e n’en keyog Joab.

³¹Me fulweg Solomon, ni ga’ar, “Mu rin’ ni rogon ni keyog Joab. Mu li’ nge yim’ mag k’eyag. Ma aram e gag nge pi’in owchen David e dakriy rogmad ko n’en ni rin’ Joab ni thang e fan rok l’agruw i pumo’on ni dariy ban’en ni kar buchegew.

³²Bayi gechignag SOMOL i Joab ni bochan e mthang pogofan ni i tay, ni i rin’ nda i nang e chitamag i David. I Joab e li’ nge yim’ l’agruw i pumo’on nde buch e rorow ma yow ba manigil boch ngak Joab: Abner, nib ga’ ko salthaw nu Israel, nge Amasa, nib ga’ ko salthaw nu Judah.

³³Gechig ni fan ko pogofan rorow nthang e bayi aw ngak Joab nge nga daken e pi’in owchen ni dariy n’umngin nap’an. Machane SOMOL e gubin ngiyal’ ni bayi tay ni pi’in owchen David ngi i par ko pilung.”

³⁴Ma aram me yan Benayah ko fare Tent u p’eowchen SOMOL nge li’ Joab nge yim’, min k’eyag u tafen u daken e tfal’fel’.

³⁵Me tay e en pilung Benayah ni ir e ga’ ko salthaw nge fek luwan Joab me tay Zadok ni prist nga luwan Abiathar.

³⁶Me’ere me mol’og fare pilung ni nge yan ngak Shimei ni ngan ga’ar ngak, “Mu toy ba naun u roy u Jerusalem. Mu par riy ma dab mu chuw u lan e re binaw ney.

³⁷Fa’anra chey nim man nga ba’anem fachpa’ i lul’ ni Kidron, ma ga ra yim’ mak gur e yira tay e kireb riy nga dakenam.”

³⁸Me fulweg Shimei, ni ga’ar, “Gur Pilung, kefel’, bay gu rin’ e n’en kamog.” Ma aram me par u Jerusalem nib n’uw nap’an.

³⁹Machane nap’an nike chuw dalip e duw, me mil l’agruw e sib rok Shimei ngranow ngak Akish ni Pilung nu Gath, nib mo’on ni fak Maakah. Nap’an ni rung’ag Shimei ni yow bay u Gath,

⁴⁰me tay nga daken keru’ e dongki rok e n’en ni yima par nga daken nge yan ngak Akish ni Pilung nu Gath, ni be gay fagal sib rok. Me pir’eg row me fulweg row nga tabnaw.

⁴¹Nap’an ni rung’ag Solomon e n’en ke rin’ Shimei,

⁴²me mol’og nganyan nog ngak nge yib me ga’ar ngak, “Gog ngom faram ni ngam micheg u fithingan SOMOL ndab mu chuw u Jerusalem. Mu gu ta’chiylen ngom ni rofen i n’en ni ga ra rin’, ma ga ra yim’. Ma gathi mu pining e kefel’ ngay magog ni ga ra fol rog?