1 KING TAUDIA 2:21-42

²¹Bataseba ia gwau, “Abisaga, Suneme hahine, be oiemu kakana Adonaisa dekenai do oi henia, ia ese do ia adavaia.”

²²Vadaeni king Solomona ese iena sinana ia haere henia, ia gwau, “Badina dahaka Abisaga, Suneme hahine, be Adonaisa do ia adavaia totona oi noinoi? Bema Abisaga be ia dekenai do lau henia, unai anina be, lau ese king dagi ia dekenai do lau henia danu, badina ia be lauegu kakana. Iena durua taudia danu idia noho, hahelagaia tauna Abiatara, bona Ioaba Seruia.”

²³Unai neganai king Solomona be Lohiabada ena ladana dekenai ia gwauhamata, ia gwau, “Adonaisa ese inai noinoi ia gwauraia dainai ia be kerere momokani. Unai dainai lau ese ia do lau alaia mase. Bema unai bamona lau karaia lasi, Dirava ese lau do ia alaia ore be namo.

²⁴Lohiabada ese lau ia durua vadaeni, bona ia ese egu tamana Davida ena king dagi dekenai lau ia haginia goada vadaeni. Lohiabada ese iena gwauhamata ia hamomokania vadaeni, bona basileia be lau bona egu bese taudia dekenai ia henia vadaeni. Unai dainai ia mauri noho Lohiabada ena ladana dekenai lau gwau, hari dina dekenai Adonaisa be do ia mase!”

²⁵Vadaeni king Solomona ese Benaia ia oda henia, bona Benaia ese Adonaisa ia alaia mase.

²⁶Vadaeni king Solomona ese hahelagaia tauna Abiatara ia hereva henia, ia gwau, “Oiemu tano Anatoto dekenai oi lao. Oi be mai kerere danu dainai, oiemu davana maorona be mase. To inai nega dekenai oi do lau alaia lasi, badina guna oi be egu tamana Davida danu oi noho, bona oi ese Lohiabada ena Taravatu Maua oi huaia. Bona oi be egu tamana danu umui hisihisi hebou, iena hisihisi ibounai lalonai.”

²⁷Unai dainai Solomona ese Abiatara be hahelagaia tauna ena dagi dekena amo ia lulua. Unai kara dekena amo, Solomona ese Lohiabada ena hereva, Silo dekenai Eli ena iduhu totona ia gwauraia hereva, ia hamomokania.

²⁸Unai kara ena sivarai be Ioaba ese ia kamonai. Ioaba ese Adonaisa ia durua, to ia ese Abesaloma ia durua lasi. Vadaeni Ioaba ese Lohiabada ena Palai Dubu ia heau vareai, bona boubou patana ena doana ia dogoatao.

²⁹Vadaeni tau haida ese king Solomona idia hamaoroa, idia gwau, “Ioaba ese Lohiabada ena Palai Dubu dekenai ia heau, bona ia be boubou patana ena badibadinai ia gini noho.” Vadaeni Solomona ese Benaia Iehoiada ia siaia, ia gwau, “Oi lao, oi alaia mase.”

³⁰Benaia be Lohiabada ena Palai Dubu dekenai ia ginidae, ia ese Ioaba dekenai ia hereva, ia gwau, “King ese oi dekenai ia oda, ia gwau, ‘Dubu dekena amo oi raka mai.’ ” To Ioaba ia gwau, “Lasi, iniseni do lau mase.” Vadaeni Benaia be king dekenai ia giroa lou, bona Ioaba ena hereva ia hamaoroa.

³¹Solomona ia gwau, “Iena hereva hegeregerena do oi karaia, alaia mase, bona guria. Ioaba ese mai edia kerere lasi taudia ia alaia kava, bona inai kara ena kerere be lau bona egu tamana ena bese dekenai do noho. Unai dainai, do oi alaia, unai kerere be ai dekena amo do oi kokia totona.

³²Lohiabada ese unai rara ia bubua kava karadia edia davana Ioaba dekenai do ia henia. Ioaba ese Abinere Nere, bona Amasa Ietere ia alaia kava. Abinere be Israela ena tuari biaguna badana, bona Amasa be Iuda ena tuari biaguna badana. Inai tau ruaosi be namodia, mai edia kerere lasi, edia kara ese Ioaba ena kara idia hereaia. Ioaba ese egu tamana ia hadibaia guna lasi, to ia sibona ena ura dainai unai tau ruaosi ia alaia.

³³“Unai dainai Lohiabada ese inai kerere ena davana be Ioaba bona iena natuna bona tubuna taudia edia latanai do ia noho ela bona hanaihanai. To Lohiabada ese Davida ena bese, bona iena natuna bona tubuna, king dagi idia abia taudia, dekenai iena maino do ia henia, ela bona hanaihanai.”

³⁴Vadaeni Benaia ese Lohiabada ena Palai Dubu dekenai ia lao, ia ese Ioaba ia alaia mase. Idia ese Ioaba ena tauanina idia abia, bona sibona ena ruma kahirakahira, tano kaukau dekenai, idia guria.

³⁵King Solomona ese Benaia Iehoiada be tuari biaguna badana ia halaoa, Ioaba ena gabuna dekenai. Bona king danu ese hahelagaia tauna Sadoka ia abia hidi, Abiatara ena gabuna ia abia.

³⁶Unai neganai king Solomona ese hereva ia siaia, Simei ia boiria mai, ia hamaoroa, ia gwau, “Oiemu ruma be Ierusalema dekenai do oi haginia, unuseni do oi noho. Bona unai gabu do oi rakatania lasi, gabu ta dekenai do oi lao lasi.

³⁷Badina bema nega ta Ierusalema oi rakatania, bona Kiderona Sinavai oi hanaia neganai, oi be do oi mase, bona oiemu mase be oi sibona oiemu kerere dainai.”

³⁸Simei ese king ia hamaoroa, ia gwau, “Egu lohia bona egu king e, oiemu hereva be namo, bona oiemu hereva hegeregerena do lau karaia.” Unai dainai Simei be Ierusalema dekenai nega daudau ia noho.

³⁹Lagani toi idia ore murinai, Simei ena hesiai taudia rua idia heau, Akisi Maka, Gata ena king dekenai idia lao. Tau haida ese Simei idia hamaoroa, idia gwau, “Oi kamonai, oiemu hesiai taudia be Gata dekenai.”

⁴⁰Vadaeni Simei ese maoromaoro ia toreisi, iena doniki ia guia, bona iena hesiai taudia tahua totona Gata dekenai ia lao, Akisi dekenai. Simei ese iena hesiai taudia ia abia, bona Gata dekena amo Ierusalema dekenai ia abidia lou.

⁴¹Tau haida ese Solomona idia hamaoroa, Simei be Ierusalema dekena amo Gata dekenai ia lao, ma ia giroa lou.

⁴²Vadaeni king ese hereva ia siaia, Simei ia boiria mai, ia gwau henia, ia gwau, “Lau ese oi lau hamaoroa, Ierusalema do oi rakatania lasi, ani? Bona oi ese Lohiabada ena ladana unai bamona oi gwauhamata, ani? Bona lau ese oi lau sisiba henia, ani? Lau gwau, bema Ierusalema oi rakatania, gabu ta oi lao neganai, oi be do oi mase, ani? Bona oi ese oi gwau, ‘Oiemu hereva be ia namo, lau ese oiemu hereva hegeregerena do lau karaia.’