Ŋicwofuŋ I 15:9-25

⁹Jeroboam e Israe ŋic jaŋere ŋicwofuŋ jume jara 20 eha Asazi fuŋkerâ Judaŋic qaŋeŋ‐jopahuc ŋicwofuŋ ewec.

¹⁰Ehuc Jerusalem haeo jara 41 ŋicwofuŋ juwec. E mimi‐ticne i Abisalom otâ‐ticne, ʒâŋene Maka.

¹¹Eme Asa e apa‐ticne Dawidizi ewec irec sâc jaha ehuc Wofuŋte maio wiac sasawa etiŋne‐fârewec.

¹²Ehuc mâreŋ ira sasec ŋic boe sau gie bahuc jumbiŋ jaŋe bârâriec‐jopawec, erâ mamac‐ticnezi ɋâŋ qâqâtâc barawec, i wâc iŋuc jaha bârârie‐fârewec.

¹³Erâ Asa e mimi‐ticne Makazi Asera nemure ɋâŋ qâqâtâc repicne barâ bajuwecte eki ŋokac wofuŋ mi juocte bârâriewec wâc. Ehuc ɋâŋ qâqâtâc‐ticne i hetâc qâtâcnerâ Kidoroŋ opâo rikewec.

¹⁴Erâ furu mâreŋ ine mi bârâriewec. Erâ sifu maŋticne i hâcbuc jaha Wofuŋtao râeme fowec.

¹⁵Erâ e mamac‐ticnere â e jahacne taha bâtirikicne siliwa â gol â râqâc wiac i bafisi Wofuŋte ufuŋko râewec.

¹⁶Asa â Israe ŋicwofuŋ Basa jahe jupic sâc ŋondeŋ‐jekicko ʒika fuahuc fowec.

¹⁷Eme Israe ŋicwofuŋ Basa e Judaŋic râsi rojarehuc ferâ Rama hae bawec. E ŋic i me i moczi Juda ŋicwofuŋ Asarao rac warec mi eniŋte iŋuc ewec.

¹⁸Eme Asa e Wofuŋ ufuŋ‐ticnere kânoŋko â ŋicwofuŋ ficte kânoŋko siliwa â gol gâcne fowec i rorâ kiŋaŋ qaqafâcne jarewec. Erâ Taberimoŋte ŋokâ Siria ŋicwofuŋ Beŋhada, Hezioŋ ŋosa‐ticne hâcne, e Damasko haeo juhame kiŋaŋ qaqafâcne dâŋ ʒiŋuc jazahuc erao sorec‐jopawec:

¹⁹“Mamac jahec‐nâhec jaherao ʒâʒâfic fowec irec sâc nâhâc ʒâʒâfic moc bâfuazeperec. Irec no bubiaŋte wiac siliwa â gol râe‐garekopac i honezemec. Erâ go rarâ Israe ŋicwofuŋ Basahec ʒâʒâfic‐ŋekic fokac i hetâcnezemec. Iŋuc etec no behecnuzejec.”

²⁰Iŋuc mume Beŋhada e ŋicwofuŋ Asare dâŋ manarâ Israe hae râsi rojareniŋte momorifâcne jaŋere micne sorec‐jopawec. Eme jaŋe rarâ hae ʒiŋuc ro rauc embiŋ: Ijoŋ, Daŋ, Abe‐Bete‐Maka, erâ Kinerote mâreŋ â Naftali mâreŋ sasawa i mâmâc.

²¹Eme Basa e biŋe i manarâ Rama hae bahuc juwec i beherâ Tiriza haeo ra juwec.

²²Ehame ŋicwofuŋ Asa e ŋic moc mi hetiric‐jopahuc dâŋ musaweme Juda mâreŋ sâcke‐fârewec. Eme jaŋe Basazi Rama hae bahuc qânâ â katapa rome fewec i ropie rawec. Rame ŋicwofuŋ Asa e wiac izi Benjamiŋ mâreŋko Geba hae â Mizipa hae bawec.

²³Eme Asazi wiac sasawa ebac ewec â tâpiri‐ticnere fuŋne, erâ hae barawec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne. Juku Asa e ŋicqizec jâmbâŋ ehame kike jahecne demba qawec.

²⁴Eme Asa e apa ŋosafâcne jaŋerao ʒuhuckehuc hâmome jaŋe fombiŋkoa apa‐ticne Dawidire hae qizecko duckembiŋ. Ehame ŋokâ‐ticne Josafatazi tucticne qarâ ŋicwofuŋ juwec.

²⁵Asa e Juda ŋicwofuŋ jume jara jajahec eha Jeroboamte ŋokâ Nadabazi fuŋkerâ Israe ŋic qaŋeŋ‐jopahuc ŋicwofuŋ juwec. Ehuc jara jajahec Israe ŋicguru ŋicwofuŋ ejarewec.