Óosana 25:11-34

¹¹Abaraqaammáfa kuqufufanóo miná ámaaku Isakeena Ánutufa ámiqi ámiqi ímarinau. Isakeefa káqi márira námmari dikaanda qiní qíqafaidanoo fee qímaru nammari dikaandána aaqá márinau.

¹²Qakaara námmarifa Saráqa námmarina aináinira mánaaqa Isipa máqannaa mánaaqa márufa mifá Abaraqaammána ámaaku Isamaeerána máqoofa márinau.

¹³Isamaeerána faiqi námu maaqímmiqa máriqau. Indaarúqaafa Neebaiootafá márinau, miná ánaaqianaafa Keedarafá márinau, misá nínaaqianaafa Adabeerafá márinau, misá nínaaqianaafa Mibasamafá márinau, misá nínaaqianaafa Misammafá márinau, misá nínaaqianaafa Dúmmaafa márinau, misá nínaaqianaafa Masafá márinau, misá nínaaqianaafa Qadadáfa márinau, misá nínaaqianaafa Teemafá márinau, misá nínaaqianaafa Yeeturafá márinau, misá nínaaqianaafa Nafisafá márinau, misá nínaaqianaafa uqanná Keedeemaafá márinau.

¹⁶Misa qísaukuqara taikásee qíkunnooqu qaara marasée máqannaasa níkausaikiqa máriqau. Miqíqa máridaqa náriqa núqu náriqa máqusa faqa náriqa úiqaana máqusa faqa qafaafaurée máriqau.

¹⁷Isamaeeráfa 137 áukuana maraséenoo kúqinau.

¹⁸Isamaeerána áiku ásauku Isipa máqusaindari súani óosana qáannai Sura máqa máaqa faqa, Qafiraa máqa máaqa faqa qámbaana Asiria máqa máaqai fímaruqoo máriqau. Misá Abaraqaamána áiku ásauku akaqáusa máruqooqari náaduma máriqau.

¹⁹Moó ufa Abaraqaammána ámaaku Isakeena ufá máridanoo.

²⁰Isakeefa qaara fasiqa níku nísauku taikásee 40 áukuana maraséenoo Beetueerána áraamuna Reebeeka námmarina máranau. Rábannana ásookina máranau. Beetueeráfa Arameeannaindáraafa Meesoopootamia máqa máaqaki ani márinau.

²¹Reebeeka námmarifa sía faiqì máqanau áafanaasee márinau. Isakeefa minára iriséenoo Yáaweenara innaaru qímarinau. Yáaweefa miná ufa iriséenoo dadaaqufanóo Reebeeka námmarifa ámuaqu qáikinau.

²²Ámuaqu qáikufanóo faiqì qaara qánda miná áranandaki máridaqa ráki máriqau. Ráki márufanoo Reebeeka námmarifa qinau, maa ainaináfa nánaree qiníki kambíqaidanoo fee qímaseenoo karaambáiqunnai óonuree ánoonufa qímamianifeera innaaru qínau.

²³Innaaru qufanóo Yáaweefa qímaminoo qinau. Qaara maqannaasá aní áranandaki máridaqa. Anée naríara naríara rairai qímariasa níkooqanda máqeennaránoo. Moó fánnoo moó úriqarara afeeka faqáafa márianno. Ákaqa fannoo áfasaana rafáaqa fúaninafa máriannoo.

²⁴Reebeeka námmarina faiqì máqarafa aniroofanóo qaara qánda máqanau.

²⁵Indaarúqaana afaaqa káaqa taatuqée árinoo márinau, miná afaaqasása asausí ánaaqi márinau. Miná áuqu Eesáu née qiqau. (Miná áuqu óosana asausí fee qiqau).

²⁶Ínaaqianaafa indaarúqaana áiku átaa rakisisimmá úqirafa qúminau. Minára miná áuqu Yakooboo neé qiqau. (Miná áuqu óosana áiku átaa fée qiqau.) Isakeefa qaaramoó fásiqa níku nísauku taikáséenoo 60 áukuana maraséenoo miqandá máqanau.

²⁷Miqandá innooqáfufaqá Eesáufa uaqárana akoofása máridanoo sía óoqu márufa káqi níranara áidimárufa márinau. Miqí márufanoo Yakooboofa sía miqí márinau. Fifírafa máridanoo maqúsasaa márufa márinau.

²⁸Isakeefa Eesáunara áidi márinau. Mifá aandáù arusoofanóo née márunara minára áidi marínau. Reebeeka námmarifa Yakooboonara rímarinau.

²⁹Moó kári Yakooboofa nárana suqásee áuqee márufanoo miná áfasaafa nándaki níniiufa áararoofanoo aniréenoo qinau.

³⁰Anee taatuqée nárana áuqee máriannana doo miná mara qíminaqa náa dáarandée márifaqee qinau. Miqi qímasoofaqá misa minára iriséeqa Eesaunara Eedoomeé qímariqau. Mi auqúna óosana taatuqée fée qímariqau.

³¹Yakooboofa iriséenoo qinau, anínidiri qíkoofa anée indaarúqaa fáiqi máriananoo ani afaaqóoqa qíma ámaqée márina qíminaqa nárana ani ámianauranoo.

³²Eesáufa qinau. Sáà qinée dáararai faqa kúqua qáammidaqa qiní mi ainaináusa sía qiní dadaaqífaranoo.

³³Yakooboofa iriséenoo qinau, aneenná ufa qímá afeekaiká mándee qímínaqa qinee nárana aní ámianaura. Qímasoofanóo Eesáufa Yakooboonara qímá afeekaíka mándee indaarú miná ákoofa qútaaqama ámaqoo ainainná ámiraree qinau.

³⁴Miqí qíma afeekaiká másoofanóo Yakooboofa quandá fufanóo féemu faqa nára áinaina faqa nammári fáqa Eesáuna ámufanoo námasee doo finau. Miqí máseenoo Eesáufa narí indaarúqaa fáiqi márunara ákooqoofanóo narí ákaqa amisée quqásee finau.