Óosana 24

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Doo Abaraqaammáfa káaqa náuráiqi márinau. Karaambáiqa Abaraqaammáfa aiqáma áuqoo áinainna ámiqi ámiqimma ámaqee márinau.

²Abaraqaammáfa nári óosana maraséenoo nári aináiniranasaa kísaaqasaa rakísi marúna áaramaseenoo qímaminoo qinau. Anee aneenná ásauku qífundana ámeemaanai áusùsee afeekaiká másee qíma afeekaikía.

³Qinee aníara Karaambáiqa ínnaarúna faqa maqá faqa áuqu Ánutuna áuqusaa qíma afeekaikámasee sía qiní qímaaku Kannaana máqannaa ánaasee mara ámiannee qídaqa.

⁴Anee qinée kambíqaafanna máqusanai óonuree qiní átikinaa mánaaqa mara máree Isakeena múqu ámià.

⁵Miqí qímasoofanoo mi rakisiráfa maaqí qinau. Dóo amaná, óoru ráanaqa mindáraa mánaaqa iráifanoo narí máqa máaqa minnísee maí qúmirara ititínaqa amanée qinee aní ámaaku aiqáananoo anée qúmunna máqa máaqanai óoru fúannoo fée.

⁶Miqí qufanóo Abaraqaammáfa qinau. Óo sía uqanná anee qiní qímaaku aiqáinanoo minní óorufuani.

⁷Yáaweefa innaarúnaindaraa Anutúfa qeeqa qíkoona maqúsaindaraana faqa qeeqá ainaina maqásaaqaraana faqa mara máreenoo maa maqa maaqánasaa quqáqoosa máridaqa. Mifa qíma afeekaikámmasee qiní fáqa qiní qíku qísauku fáqa maa maqa maaqána nímianauree qinau. Mifa narí angiroo aiqainanoo aní áfunni fínana óoru qiní qímaaku ánaaqa áfiqee qúmi naránoo.

⁸Mindáraa mánaaqa fánnoo sía maí qúmiraree qínana miqóo kaí qíma afeekaiká máqaanna ufánakiqari idukúananoo. Qiní qímaaku sía minní áfiqee óoru fúà.

⁹Miqí qímasoofanóo mi ainainira fasiqáfa narí ásauku Abaraqaammána nari úriqararana áfundana ámeemaanai quqáseenoo qinau, doo qinée anee qíanandee ianáura.

¹⁰Miqí qímaseenoo ráudama kínoo Abaraqaammána kamméera, qóosa fooqáana, miná qísauku qára maraséenoo narí úriqararana aináina ámiqirana kaí maraséenoo kamméerasaa quqáseenoo máreenoo finau. Abaraqaammána ákaqa Náqoorafa Mesopotamia máqusai súani dínni átaaqeenni márunnai óoru fínau.

¹¹Aanái faiqanóo fífìiu fanóo eenée márufanoo ánaaseeuqa nammári sákee máruqoo óonu ranau. Óonuree qáfoofanóo maqúsa adeedí nammári sákee máruqoo óonu réenoo miqóo narí kamméerauqa quqásoofaqa máriqau.

¹²Narí kamméerauqa quqáseenoo mi fasiqáfa Yáaweenara innaaru qínoo qinau. Óo Ánutu qiní úriqararana Abaraqaammána Ánutufa anée qiní faqa máridana maqee qiní dadaaqíà. Anée qiní úriqararana Abaraqaammána faqa qíma afeekaiká máqoonafa maqee ánoonaikiani.

¹³Qinée nammári sákee máriana aaqá adeedí márunaqa, ánaaseeuqa nammári ani sákee máriafaqa máridaqa.

¹⁴Moó mánaaqa aniráinaqa qinee maaqí qímasee qímamianaura. Amanée aneenná táquki nammári saka qíminaqa naanáuree. Mifá qiníara námasainaqa aní kamméerauqa faqa nímianauree qínnanara minára aneenná aináinira fáiqi Isakeena útaaqama ámaqaqaanafee qianáura. Mi ainaináfa kambíqainaqa anee qiní úriqararanasaa qíma afeekaíkunna úfanara írianaura.

¹⁵Mifa miqí qímasee innaaru qímarufanoo moó mánaaqa Reebeeka námmarifa nammári táqu ákumáaqa aku máree aniranau. Mifa Abaraqaammána ákaqa Náqoorana faqa miná ánaaqa Mirikaa námmarina faqa faiqì Betueerana áraamuna marínau.

¹⁶Miná óori áfiri ámiqi ámiqi írafa sía áuqu márufa aniroofanóo qáfoofanoo óoqu nammári saka máree úrinau.

¹⁷Ururoofanóo Abaraqaammána aináinasaa rakísira fásiqá fánnoo mi fúnnai sandée óonureenoo maaqí qímasee qímaminau. Amanéè aneenná táqukinaa námmari káqikaana qiní qíminaqee naanáuree.

¹⁸Miqí qufanóo mi manaaqáfa qinau, eeóò faiqí firaafá, dóo náà qímaseenoo nammári táqu afiqú quqásoofanóo dóo nanau.

¹⁹Námasoofanóo mi manaaqáfa narí kaí qinau. Qinée nammári moó fáqa sakasée aní kamméeráuqa nímii sáanaqa náma sáifanoo nímuaqu íannoo.

²⁰Miqí qímaseenoo narí nammári táqu kái káqi difáaniki adíaseenoo sandéenoo óoqu moó fáqa saka máreenoo múru adía soofaqa kamméerauqa naqau.

²¹Kamméerauqa nammári ními márufanoo Abaraqaammána aináinira fásiqa fánnoo íreeda kai kásooinoo máridanoo qáfaidanoo maaqí qímirinau. Dóo féè Yáaweefa qineé kísaaqasaa ánunnanara ánoonai kídanoo féè.

²²Kamméerauqa nammári néeneesee nímuaqummásee márufanoo Abaraqaammána aináinira fásiqa fánnoo kóorannai áuqira qimmusa mi manaaqána aikikí qusamáqaseenoo kafa kóorannàí áuqira ísaaqama qaaraqánda ásaukuki usamáqaseenoo irámirinoo qinau.

²³Aneé yána áraamunee máridanee amanée qiní qímaqimia. Amaneé maasá námu aneenná ákoona máaqa kina nífiqee fínaqee faiqaanáuree.

²⁴Reebeeka námmarifa miná iriséenoo narí qímaminoo qinau. Qiní qíkoofa Beetueeráfa Náqoorana faqa Mirikaa námmarina faqa faiqì máridanoo.

²⁵Maasá máaqa nárana amaná máridanoo aní faqa ániasa fáqa aní kamméerauqa faqa nárana máaqa faqa nímifaránoo.

²⁶Miqí qímasoofanóo Abaraqaammána aináinira fásiqa iriséenoo maqásaa óorindari mapámu finoo Karaambáiqa narí úriqararana Abaraqaammána Anutuna amooqídanoo maaqí qinau.

²⁷Óo Ánutu Abaraqaammána Ánutufa, anée ámiqi ámiqi uqanná míananoo. Anée Abaraqaammána ámiqi ámiqi ímariannanara sía taikéenoo káqi fídanoo. Karaambáiqa fánnoo qiní úriqararana átiuqa iannái andeeqásee qífiqee áninoo.

²⁸Miqí qímasee innaaru qímasoofanóo Reebeeka námmarifa sandeenoo narí ánoona máaqai óonureenoo aiqáma mi ufáusa qímaminau.

²⁹Reebeeka námmarina áfasaafa Rábanafa Reebeeka námmarina ufa iriséenoo kóorannai áuqira qímmusa qusamáqóona faqa kóorannai áuqira ísaaqamá qusamáqóona faqa qáfamaséenoo ráudamaku fánoo óoquréenoo nammári sákee máru madikána áfainni qáfoofanóo Abaraqaammána aináinira fásiqa miqóo nammári áfainni narí kamméerauqa naaqá kikíqinoo márinau.

³¹Márufanoo qáfamáseenoo qímaminóo qinau. Qiní faqa áninaqa máaqai fua. Karaambáiqa fánnoo aní ámiqi ámiqimma ámaqee márifa máriananoo. Nánaree anee maaqóo maridanee. Qinee aní faiqára máaqa dóo deedaqammásee aní kamméerauqa márirana faqa deedaqíqa.

³²Abaraqaammána aináinira fásiqa fánnoo miná iriséenoo narí faqa márusa faqa narí kamméerauqa faqa nífiqeenoo doo máaqai finau. Máaqai óonu roofanóo Rábanafa kamméera saaqáraa qúmaara mara maqásaa quqáséenoo nárana nammári nimiséenoo Abaraqaammána faiqi námu nammari nímufaqa níku nammári úqiqau.

³³Níku nammári uqu soofanóo Rabanafa nárana níminau. Nímufánoo Abaraqaammána aináinira fásiqa fánnoo qáòò qímasee qinau. Sía qinée káqi naanáura. Qinée qíraree qúnna úfana qíma nimiséeqa miqóo naanáura. Rabanafa minára iriséenoo qinau. Doo qínaqa maasa írià.

³⁴Miqí qímasoofanóo Abaraqaammána ainaínira fásiqa qíma níminoo qinau. Qinée Abaraqaammána aináinira fásiqa máridaqa.

³⁵Karaambáiqa firaaqóo qiní úriqararana ámiqi ámiqimma ámaqaseenoo aináina faqáafáikamma ámaqeenoo. Karaambáiqa sipsípauqa fáqa burimakáuqa faqa siruáa fáqa kóora fáqa aináinira fásiqauqa fáqa mánaaqauqa fáqa kamméerauqa fáqa doonkíuqa fáqa moómoo áminoo.

³⁶Qiní úriqararana ánaaqa Saráqa námmarifa asooqásaa faiqì akoonaiqí maqasoofanóo qiní úriqararafa narí aiqáma áinaina miná kai áminoo.

³⁷Qiní úriqararafa qifaqa qinee afeeka ufannái qíma afeekaikámmaseeqa mina aamúaqira úfa qaindúsuanauree qíafananoo qinau. Anée maqóo qáraasa Kannaana máqannaa kínaa ánaasee sía uqanná maréeqee qiní qímaaku ámia.

³⁸Anée óoru qini qíkoona máqannaasaki qiní átikinaa mánaaqa mara máree múqusee qiní faiqi ámia.

³⁹Qinée mi ufána iriséeqa narí maaqí qímaseeqa qímamiqa. Mi manaaqáfa sía qiní faqa qúminaqa náqaa fée íanauree.

⁴⁰Qúnanoo mifá qínoo, qinee Karaambáiqa ufa aiqáma kári áfaqee márunausa máridaqa, mifá narí angiroo aiqáinanoo aní faqa fídanoo dadaaqínanoo ánoona kambíqaannoo. Anee qiní faiqì ánaaqa qiní máqannaasakinaana qiní qíkoona átikinaana máreennaranoo.

⁴¹Moodáa áana kái anée idukínna áanafa máridanoo. Óoru ráinaqa misa mánaaqa moó sía qímifanoo aní qíma afeekaikírafa taikáinana idukíra fásiqaikinnáranoo.

⁴²Qinée Abaraqaammána mi ufána iriséeqa nammári díkaanda máriqoo ururée maaqí qímasee innaaru qíqa. Óo Karaambáiqa qiní úriqararana Abaraqaammána Ánutufa máriananoo, qineé áuqaunna áinainna ánoona kambíqaani.

⁴³Qinée nammári díkaanda máriqoo márianaura. Máriananoo mánaaqa moó fánnoo nammári sákarara aniráinaqa qinée nammáriara innaaru qianáura.

⁴⁴Mifa eedóo qímaseenoo qiní faqa qiní kamméerauqa faqa nammári níminanoo mifá anée qiní úriqararana ámaaku útaaqama ámaqaqaanafa máriannoo.

⁴⁵Qinée qíreeda kaí innaaru qímarunanoo Reebeeka námmarifa maqúsaindari nammári táqu ákumaaqa akumáreenoo áiqareenoo nammári sákararee qímasee fifaqa qinee maaqí qímasee qímamiqa. Amanéè anee nammári qímina naanáuree.

⁴⁶Miqí qúnanoo mifá kái káqi narí nammári táqu ákumáaqa qáraana afaimmá quqáseenoo qinoo. Námasainaqá ani kamméerauqa faqa nímianaura. Miqí qifaqá qinee námasaunanóo mifá kamméerauqa faqa nímifaqa néeà.

⁴⁷Námaseeqa qinée maaqí qímasee irámiriqa ani ákoofa yáfee, qúnanoo mifá qímaqiminoo qinoo. Qiní qíkoofa Beetueeráfa Náqoorasa Mirikaa námmarisa faiqì máridanoo. Qinée mi ufána iriséeqa kóorannai áuqira qímmusa usuámaqaseeqa kafa kóora ísaaqama ásaukuki usuámaqeeqa.

⁴⁸Usuámaqaseeqa dóorindari maqásaa kummárama fifaqá qeeqá úriqarana Abaraqaammána karaambáiqa Ánutuna amooqíqa. Mifá qiní qífiqamareenoo andeeqásee qiní úriqararana atíuqa iannái múrusaifaqa qinee misá níraamuna qeeqá uriqararana ámaaku ánaaqa márianínnana paqúriqa.

⁴⁹Dóo maqee uqanná Rabanna aneé qíma qíminaqa íria. Anee qiní úriqararana andeeqá ámaqararee qínana qíma qímia. Anee sía andeeqá ámaqararee qínana minára faqa qíma qíminaqa qinee qeeqá ianná áinainara óonu máfi írianaura.

⁵⁰Rábanafa fáqa miná ákoofa Beetueeráfa faqa narí qímamíqa qiqau. Maa ufáfa Karaambáiqinaindari ani márifaqa maasá náqifee másee minára ufa qináuree.

⁵¹Máa Reebeeka námmarifa márinoo. Áfiqamaree fúa. Múnusainanoo mifá aní úriqararana ámaaku ánaaqaikinoo, Karaambáiqa narí qindée íani.

⁵²Abaraqaammána aináinira fásiqa mi ufána iriséenoo óorindari maqásaa áqufinoo Karaambáiqa amooqímamaqánau.

⁵³Amooqímaseenoo fíndifinoo qamunna faqa siruáa faqa kóora faqa firaa feefauru áqimaru oonísa Reebeeka námmarina áminau. Mifá firaa munnimma áqimaru ainaináusa miná áfasaana faqa miná ánoona faqa níminau.

⁵⁴Nimi séenoo narí fáqa ánusa sáimbaqa nárana fáqa nammári faqa neenee séeqa faiqaqau. Faiqée iáqoofanoo kanánaana Abaraqaammána aináinira fásiqa Reebeeka námmarina áfasaana faqa ánoona faqa qíma níminau. Amanée qinee maqee qeeqá firaa fínnai fuanáuree.

⁵⁵Miqí qufaqá miqandá qiqau, sáina Reebeeka námmarifa maasá faqa moodaa amaanaki fée, qísauku qára taikáseenoo áfuru fée faiqéenoo fuani.

⁵⁶Miqí qufanóo Abaraqaammána aináinira fásiqa fánnoo qinau. Doo sía maasá rafáaqa fúà. Doo qineé maqeé fídaqa. Karaambáiqa fánnoo qinée kísaaqasaa ánunna sáikana ánoona dóo kambíqasaifaqa qáfamáseeqa sáinaqa qeeqá úriqarara finnái fúa.

⁵⁷Miqandá minára iriséeqa qímamiqa qiqau. Sáina Reebeeka námmarina áaramásee qífanoo náqaa fee qíannoofee.

⁵⁸Miqí qímaseeqa Reebeeka námmarina áaramaseeqa irámiriqa qiqau. Anée maa fasiqána faqa maqee fée finnáree. Miqí qufanóo doo maqeé fuanáuree qinau.

⁵⁹Misa mi ufána iriséeqa Reebeeka námmarifa fáqa minásaa rakísi marú anaaseefá fáqa Abaraqaammána aináinira fásiqa fáqa miná fáqa ánusa faqa doo niqiqoofaqá fiqau.

⁶⁰Reebeeka námmarifa fírarufaqa maa ufánannoo miná afaaqóoqa qiqau. Óo maasá qísooki aníkíqari aruakínausa moómoo uqanná firaaqóo uqanná kambíqéefara aní áiku ásauku márinausa namuqáa nárí nífaqaaqa mándaida misá maqa máaqa námu fáqa misá aináina fáqa máree márifáranoo.

⁶¹Miqí qímasee afaaqóoqa qímasoofanóo Reebeeka námmarifa fáqa aináinira mánaaqauqa faqa kamméerasaa akarée fufaqá Abaraqaammána aináinira fásiqa námu faqa fiqau.

⁶²Isakeefa Neekeefa máqa máaqakiqari aadána máqa máaqai nammári díkaanda máruqoo óoqu márinau. Mi nammari dikaandána áuqu káqi márirafa qiní qíqafaidanoo fée qímariqau. Mifá Kannaana máqa máaqa qáannai súani áfu dínni átaaqeenni márinau.

⁶³Miqóo máridanoo Isakeefa moó éenoonnai aatáta nídanoo uqéera fufanóo mirínni qáfoofanóo kamméerauqa qúmiqau.

⁶⁴Reebeeka námmarifa kamméera saaqári uqéera fínoo Isakeena qáfanau. Reebeeka námmarifa qáfamaséenoo narí kamméera saaqári maqásaa áqufinau.

⁶⁵Áqufufanoo Abaraqaammána aináinira fáiqi irámirinau. Yá fasiqá fée maasá únannai ánidanoo fée. Miqí qufanoo Abaraqaammána aináinira fásiqa qinau. Qiní úriqararafa ánidanoommi qufanóo Reebeeka námmarifa nárì óosana máreenoo qamunna máfi óorisaa ititánau.

⁶⁶Isakeefa uru paqúrimmasoofanóo Abaraqaammána aináinira fásiqa fánnoo aiqáma áinaina áuqoonara Isakeena qímaminau.

⁶⁷Qímamisoofanóo Isakeefa Reebeeka námmarina maréeqeenoo narí máaqaki Saráqa nammarifa máriunaki quqásoofanóo miná ánaaqai kinóo márufanoo Isakeefa Rebeeka námmarinara áidi márufanoo mi aidiráfa Isakeefa narí ánoofa kúqunara ámuqusiufa doo asooanau.