Óosana 27

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Isakeefa máriiufanoo doo asooqáqoofanóo áfu mandáikinau. Máriiufanoo moó kári narí indaarúqaa fáiqi Eesáuna áaroofanoo Eesáufa foó qinau.

²Fóo qímasoofanóo Isakeefa Eesáuna qímaminoo qinau. Doo qinée asooqá márida, qeeqá kúqira áukuana sía qáfaida, minára ani qímamiqa.

³Aneenná durú féefa máreenana nándaki aandáù aru máree qiní dídi márina míni suqá qíminaqa námseeqa ani afaaqóoqa qímamaqáseeqa kúqua.

⁵Isakeefa Eesáuna faqa ufa qíqiisoofanóo Reebeeka námmarifa iriséenoo qáfoofanoo Eesáufa nándakinai uaqárara fufanóo quandá fufanóo Yakooboona qumeé kai qímaminoo qinau.

⁷Dóo maqee aní ákoofa Eesáuna maaqí qímasee qímaminoo, anée aandáù arumáree míni suqá qíminaqa qinée námasee Karaambáiqa áfusaa aní afaaqóoqa amisée kúqua.

⁸Qiní qímaaku doo anée qiní ufa írisee qinée qíanandee ía.

⁹Aneé doo fúà óonu mimmí ánaaqiuqa márianakinaana afaaqa faqáana qaaraqánda míni sáinaqa qinée aní ákoona áidi márina suqá sáanana múnu ámià.

¹⁰Múnu áminano námaseenoo narí afaaqóoqa amiséenoo kúquani.

¹¹Yakooboofa iriséenoo narí ánoona qímaminoo qinau. Qiní qífasaafa asausí faqáafa máridanoo asausí aadaikí marífa máridanoo. Qiní qifaaqa qisausí sía máridanoo umooqu kámmidanoo.

¹²Ábee qini qíkoofa qiní qifaaqa dúqama qáfamaseenoo íriannoo. Qiníara qíkaru qídanoo fee qíannoo. Miqíqa qinée rairaiqírana qeeqá qifaaqaí qifaaqóoqara foorá mara quqáanaura.

¹³Miná ánoofa mi ufána iriséenoo qinau. Aní áqira úfa fánnoo qinísaa kaí máriannoo, sía anee minára írià, sandéenana óonu mimmí ánaaqi káqi máree míni qímia.

¹⁴Miqí qíma soofanóo Yaakooboofa eedóo qímasee mara máree míni soofanóo miná ánoofa maraséenoo narí afaaqi Isakeena áidira nárana suqánau.

¹⁵Reebeeka námmarifa aandáu suqáseenoo Eesáuna ámiqira qámunna narí máaqaki quqáqoona maraséenoo Yakooboona afisú ámaqanau.

¹⁶Afisú ámaqaseenoo mimmí ánaaqi apata qumáreenoo Yakooboona áfaarinni faqa ásauku faqa asausí sía máruqoo afisú ámaqanau.

¹⁷Miqí mándeenoo mi adiafaaira naranná féemu námu faqa suqáqoona ámufanoo narí ákoo funnái máree finau.

¹⁸Óonuréenoo narí ákoona maaqí qímasee qímaminau. Qípoo dóo qinee aniréeqa, qufanóo Isakeefa qinau. Qiní faiqi námukiqari anee yáfee máridanee qinau.

¹⁹Yakooboofa qinau. Qineé aní indaarúqaa fáiqi Eesáusa máridaqa. Doo anée aandáura qíannana arusée suqámaree aniréeqa doo anee fíndi fínana námasee qifaaqóoqa qímia.

²⁰Miqí qufanoo Isakeefa qinau. Óo qiní qímaaku anee náqaa fee máseenanee kái káqi paqúrinanee qufanóo Yakoobofa qinau. Karaambáiqa aní Ánutufa qiní dadaaqí paqúrimma qíminoo.

²¹Isakeefa minára iriséenoo Yakoobona áaramaseenoo qinau. Anée qiní daaqá adeedí ani ráinaqa qinée aní áuqama qáfàa. Kuqáa anee Eesáu fee máridanee.

²²Miqí qufanóo Yakooboofa narí ákoona óorinni óonu kikíqamma fufanóo Isakeefa áuqama qáfamaséenoo qinau. Qinée írunanoo anée ufa qíanáfa aní Yakooboona áunda máridanoo aní ásauku áuqamásee qáfaunanoo Eesáuna ásauku máridanoo.

²³Yakooboofa mimmí asausí afisúqoofanóo Eesauna ásaukuara foorá asausí ánaaqi márufanoo Isakeefa sía irinau. Isakeefa narí afaaqóoqa miná ámirarammáseenoo kaifáa irámirinoo qinau. Anée kúqaa Eesáu fee máridanee. Miqí qufanóo Yakooboofa qinau. Eeóò qinée Eesáusa máridaqa.

²⁵Miqí qufanóo Isakeefa qinau. Doo aneenná aandáù míni qíminaqa námaseeqa afaaqóoqa qímamaqaanaura. Yakooboofa írinoo aandáù aina fáqa úainna nammari faqa míni ámufanoo nanau.

²⁶Námaseenoo Yakooboona maaqí qímasee qímaminoo qinau. Qiní qímaaku maaqóo adeedí ani réenana qiní qímooqaa.

²⁷Qufanóo Yakooboofa adeedí aaqá ani réenoo narí ákoona ámooqée márufanoo ándanda únda afaaqaindári ufanoo udiráma qáfamaseenoo maaqí qímasee afaaqóoqa qinau. Qiní qímaaku afaaqaí ámiqira únda fannoo Karaambáiqa afaaqóoqa qímamaqáqai máqana áfundara foorá ídanoo.

²⁸Ánutufa innaarúnaindaraa qifí fáramu quqásainanoo aní maqá áinoo ainoommáseenoo moómoo nárana ámiani.

²⁹Moó ánaamuru márinausa aní ainaínira fáiqi kámmambi fáranoo. Máaqanna máaqanna máriasa misá aní ani qáfeeqa nóorindari maqásaa kummáree fáranoo. Anée aneenná ákaqaafasáauqa firaafái kiná márinnaranoo. Aní ánoona faiqi námu aní ani qáfeeqa nóorindari maqásaa kummáree fáranoo. Moó fánnoo aní áqinafa mi ufáfa naríki kaí máriannoo. Moó fánnoo aní ámiqi amiqimma ámaqainafa naríki faqa máriani.

³⁰Miqí qímasee Isakeefa Yakooboona afaaqóoqa qímami soofanóo Yakooboofa narí ákoona máaqakiqári ráudamakúfanoo díndanai fufanóo dóo Eesáufa díndanai uaqánoo níniiufa aniranau.

³¹Eesáufa aniréenoo ádiafaa íra áandau áina suqá máreenoo narí ákoofuqóo óonu réenoo qinau. Qípoo dóo fíndi fínana námasee qifaaqóoqa qímia.

³²Miná ákoofa qinau. Anee yáfee. Miqí qufanóo mifá qinau. Qinée Eesáusa indaarúqaa fáiqi máridaqa.

³³Isakeefa minára iriséenoo bóo qímasee tautú máseenoo áindiri áindiri ímarufanoo qinau. Yáfee moó fánnoo aandáù arusée míni qímifaqa, námasaunana anee aniraananoo. Qinee námaseeqa dóo qeeqá taikára áfaaqooqa qímamaqásaunanoo náaru náaru mináindi máriannoo.

³⁴Eesáufa miná iriséenoo firaaqóo aundurái sukáqoofanóo qinau. Óo qípoo qiní faqa qifaaqóoqa qímia.

³⁵Qufanóo Isakeefa qinau. Aní ákaqa fannoo qíkaru qímaseenoo dóo aní afaaqóoqa máree fífinoo.

³⁶Eesáufa minára írufanoo Yaakooboonara árana qoofanóo qinau. Óo miná áuqu Yakooboofa máridanoo narí áuqu mau káimbinoo qiní aináina qaara karí qiní qíkaru qímasee máreenoo. Indaarú mifá qinée indaarúqaa fáiqi úriqararausa máraani qíafanna áinaina mároofa maqee miqí kai ínoo qiní qifaaqóoqa qírana dóo máree finoo. Miqí qímaseeno Eesáufa narí ákoona qímaminoo qinau. Anée afaaqóoqa sia fee qiní faqa qíseenanee.

³⁷Miqí qufanóo Isakeefa qinau. Doo qinee aní úriqararafa márianifee áfaaqooqa amiséeqa. Kaifa miná áinaina miná aináinira fáiqi kiaqée afaaqooqa faqa ámiqa. Qinee óosana óosana nárana fáqa nammári faqa ámiqa. Qiní qímaaku, maqee sía moó áinaina márinaqa aní ámianauranoo.

³⁸Eesáufa narí ákoona kafáa kafáa ikí ráqaidanoo iranau. Moodáa áfaaqooqa márinee áminanee sía fee moó qiní faqa qíminnaree.

³⁹Isakeefa minára írinoo maaqí qímasee Eesáuna qímaminau. Sía innaarúnaindaraa qífi faramu aníndi máriannoo. Sía áinoo faqáa máqa aníndi máriannoo.

⁴⁰Anee durú sáamu uqéerasaidana aneenná ámiqira márirana paqúrinnaranoo. Miqídana anée aneenná ákaqa aináinira fáiqikina máriinana rakéemmaki áaduma finnáranoo.

⁴¹Yakooboofa Eesáuna afaaqóoqa máree fífufanoo Eesáufa narí ákaqara ákoo qáidanoo fídiaqaammí márinau. Miqí márufanoo maaqí qímasee narí kai óonu máfi íriséenoo qinau. Káqi kaaqóo maasá qíkoofa kuqu fínaqa soofaara taikáseeqa mikarí qeeqá qíkaqa kuqámma áruanaura.

⁴²Reebeeka námmarifa mi ufána iriséenoo Yakooboona áaramaseenoo aaqu qimamaqeenoo qinau. Íria aní áfasaafa Eesáufa afaaqóoqara qímammareenoo aní áruannoo.

⁴³Qiní faiqi qinee qímamíanandee ía. Anée quqásee sandéenana Qaraana máqusai qiní qísookifa aní anaufá Rábannafa márinnai fúà.

⁴⁴Anée óoru miqóo márinanoo ani áfasaana árana qárafa asooáinana qúmua.

⁴⁵Anee miná mandáikamma ámaqaannanara qaunúsainaqa qinée akaqáusa niiqáanaqa aní óoru áfiqee qúmuaqa. Qinée qíkoo ínneeqara moodáafa kúqiranara írunanoo qaifaqa doo quqásee fúà.

⁴⁶Miqandá nínoofa Reebeeka námmarifa óonu réenoo narí afaaqi Isakeena qímaminoo qinau. Qinée maa Qeeta maqannaa anaasee qandára Eesáuna ánaaqa qarara qíkoo uqanna fídiaqáammidaqa. Yakooboofa Qeeta máqannaa ánaasee maaqírana moó márainaqa qinee kúquanauranoo.