GENESE 25:11-34

¹¹Abraham ena mase murinai, Dirava ese natuna Isaak e hanamoa. Isaak na Bere-lahai-roi ranu gurina badibadinai e nohova.

¹²Ismael garana bini: ia na Abraham natuna, Sara ena hesiai hahinena Hagara, Aigupto hahinena, bogana amo.

¹³Ismael garana ladadia bini: natuna roboana na Nebaioto; ia murinai e vara taudia be Kedara bona Adabeel bona Mibisam

¹⁴bona Misima bona Duma bona Masa

¹⁵bona Hadad bona Tema bona Ieturu bona Nafisi bona Kedema.

¹⁶Ismael natudia bunu: ladadia bunu edia hanua bona edia taruha ladadia e hato; idia gwautararuosi na hanua ta ta e halohiadia.

¹⁷Ismael ena mauri laḡanidia na sinahuta toi-ahui hitu. E mase, varavarana ediai eha hebou.

¹⁸Edia tano na Havila ela bona Suru, Aigupto mairiveina kahana ai; tadikakadia iboudiai idia mo mairiveina kahana korikori ai e nohova.

¹⁹Abraham natuna Isaak garana bini:

²⁰Isaak ena vara laḡanidia na hari-ahui negana ai, ia ese Rebeka, Betuel tau Suria natuna, Laban tau Suria taihuna, e adavaia. Betuel na Padan-aram tauna.

²¹Isaak ese Iehova e noia, adavana dainai, badina ia na gabani. Iehova ese ena noinoi e kamonaia; bena Rebeka e rogorogo.

²²Hekapa na ia bogana ai e hedavelai; bena ia eto, Ini e karagu tomamu be ede baina heto? Bena Iehova enai e henanadai.

²³Bena Iehova ese e haere henia, eto, Iduhu rua na bogamu ai, Bese rua na oiemu amo bae vara; Ta ese ma ta baine hadarerea, Tau guna ese tau muritai isiaina baine lao heni.

²⁴Ena mara negana e gini dae, bena memero rarua e vara hekapa.

²⁵E vara guna merona na mia kakakaka, derana danu momo, dabua huika-huika na heto; ia ladana e hatoa Esau.

²⁶Gabeai tadina e vara, bena ia imana ese Esau aena geduna e dogoa tao; bena ladana e hatoa Iakob. Isaak ena mauri laḡanidia na tauratoi-ahui, idia raruosi e vara negana ai.

²⁷Memero raruosi na e bada oho bada oho. Esau na labana tauna mai aonegana, bona loaloa tauna; a Iakob na manada tauna bona konenoho tauna.

²⁸Isaak ese Esau e lalokau heniava, badina be ena labana damudia e aniva; a Rebeka ese Iakob e lalokau heniava.

²⁹Dina ta Iakob ese aniani e nadua; bena Esau na gunika amo e lasi mai manorina ida.

³⁰Esau ese Iakob e hereva henia, eto, Ena aniani kakakakana o naduamu na taina a henigu, aina ania, badina be e hitologu mase. Una dainai ia ladana ta e hatoa Edom.

³¹Iakob eto, Emu roboa ahuna na a henigu, aniani davana.

³²Esau eto, Be, mokona ba masemu, roboa ahuna ese ede baine hanamogu toma?

³³Iakob eto, A gwau hamata guna. Bena Esau e gwau hamata, roboa ahuna Iakob e henia, aniani davana.

³⁴Bena Iakob ese flaoa bona vasiahu e henia; bena ia na e aniani, e inuinu danu. Bena e tore isi, e raka lasi. Esau ese ena roboa ahuna unu e dadaraia toma.