1Yakooboofa narí ákoofa Isakeefa máriu maqa maaqána Kannaana máqa máaqaki miqóo kaí márinau.
2Maa ufáfa Yakooboona faiqi námu ufa máridanoo. Yóoseefaafa kumaaráa máridanoo qísauku qára taikásee qíku dínni taikásee dínni óonu qaara marasée 17 áukuana faqáafa máridanoo narí áfasausa faqa sipsípauqasáa faqa mimmíuqasáa faqa rakísimarinau. Narí ákoona aináinira ánaasee qara Biriqaa námmarisa Siripaa námmarisa faiqi námu fáqa nídanoo rakísi márinau. Miná áfasausamara mandá óosana áuqoonara narí ákoona qímami márinau.
3Yakooboofa aiqáma narí faiqì námuara áidimaruna úraaqaramáseenoo Yóoseefaanara áidi márinau. Mifá asooqá námuki máqoonara káaqa minára áidi márinau. Mifá kísaaqa qamunna kisaaqa ásauku faqáana áuqu áminau.
4Miná áfasausamara qáfoofanoo misá níkoofa Yóoseefaanara áidi márufa úriqaranoo márufaqa misá firaaqóo uqanná naundurá mandáiki márufaqa miná faqa ufa qímariqau.
5Moó éendaki Yóoseefaafa qainámmaseenoo qáfanau. Minára narí áfasausa mára qímannimufaqa firaaqóo uqanná fídiaqaamma ámaqaqau.
6Yóoseefaafa maaqí qímasee narí áfasausamara qímanniminau. Qiní maa qainnána íriaqa.
7Maasa aiqámausa qáfuqaki máridaqa ráisa fooqáairana ateekásee rumbásee narísaa narísaa mundíiqaunanoo ínnindi fannoo maqásaa áqufifanoo qiníndi fánnoo andeeqasee kikíqinoo máriinoo. Ínnindi fánnoo qiníndi óosanaki áqufifanóo fíqu fíqumma datímmafinoo ámmuqu namu rambáqaki óosanai qúminoo.
8Miqí qímasoofaqá miná áfasausamára áqiqa qiqau. Kásooaqee anee karaambáiqaika máfi maasa rakísiqimaqeennaree. Miqí qímaseeqa mifa qaínunara faqa misára qunára faqa iriséeqa firaaqóo fídiaqaamma ámaqaqau.
9Moó kári mifa kafáa qainá máseenoo narí áfasausamara qíma níminau. Ínnee íriaqa qínee qainá moómmiqa. Qinee qáfaunanoo súani fáqa uqoona fáqa qísaukuqára taikásee qíkunni óoqu moodáa marasée 11 fásau námu faqa qiní dáumooki anirée ninuka túqu náumoo amisée máriafaqa níqafeeqa.
10Mifa narí ákoona faqa mi qainufána qímamufanoo miná ákoofa áqinoo qinau. Náqaa íra qáina fee ínanee. Anee aneenná ánoonara faqa aneenná áfasausa márara faqa qiníara faqa aní áramandunnai ninuka tuqú náumoo amisée máriaqee fée qídanee.
11Yóoseefaana áfasausa mara nárì nikaqara nírana qéemarinau. Miqí márufanoo miná ákoofa aiqáma ufara káqi kai írimarinau.
12Moó kári Yóoseefaana áfasausa mára nárì níkoona sipsípa mara máree Seekeemma máqusai karása naaqéera nífiqee fiqau.
13Óonu márufanoo Yakooboofa Yóoseefaana qímaminoo qinau. Aní áfasausa mára Seekeemma máqusai máriannai fúà. Miqí qufanóo Yóoseefaafa qinau. Qinee fírara deedaqídaqa.
14Miná ákoofa maaqí qímasee qímamínau. Anee óonureenana qáfaa. Aní áfasausa mára káqi fée máridafee. Aandáuqa faqa ámiqiqa fée máridee. Níndafamásee aniréenana qímaqimia. Miná ákoofa Heebooroona nóopundukiqari aiqoofanóo finau. Yóoseefaafa doo fíndifufanoo fífiiufanoo Seekeemma máqusai óonuranau.
15Óonureenoo narí áfasausa márarara randánoo nídanoo óonuree anirée inóo nufanoo faiqí moó fánnoo qáfamasee miná irámirinoo qinau. Anee nánaree randáidanee.
16Miqí qufanoo Yóoseefaafa qinau. Qinée qeeqa qífasausa mara sipsípasaa rakísi maríasara randáidaqa. Amanée anée misá máriannaira qiní qíma qíminnaree.
17Miqí qufanóo mi fasiqáfa qinau. Misá dóo quqásee fiqau. Misá Dootana máqa máaqai fíraree qufaqá íriqiafana. Yóoseefaafa mi ufána iriséenoo narí áfasausa nínaaqíanna fífiufanoo Dootana máqa máaqai misá óonu paqúrinau.
18Mifá níanai áni márufaqa miná áfasausamara qáfamaseeqa miná árirara tipúndaariqau.
19Misa maaqí qímasee narí qímami narí qímami qímariqau. Dóo qáininóo nifá ánidanoo.
20Ánifaqa miná aruseeqa miná irí maréeqee maa sooráusaki moóki áqua. Miqímmáseeqa maasá minára káasau áandau áriifoo qianáura. Maasá miqímmasáananoo miná qainá fánnoo náqaa fee íannoo.
21Reeubeenáfa misá ufa iriséenoo Yooseefaana saa ititáidanoo qinau.
22Káqi maa kaasau maqa maaqánaki maa nammari madikánaki áqua. Sía áidafirana ámia. Mifa miqí qímasee narí kai qimiriséenoo qumee áfiqamaree narí ákoofunnai múnu áisarara miqí qinau.
23Yóoseefaafa narí áfasausamára máruqoo ururoofaqá qumárasee miná kisaaqa qámunna kísaaqa ásauku faqáana raipáqíqau.
24Miqímmaseeqa nammári aadána usufú mádikanaki áqiqau.
25Áquseeqa miqóo óoqu faqée nárana náidaqa tautúmmasee qáfoofaqa Isamaeerána áiku ásauku ániqau. Misá Kireeata máqa máaqaindari Isipa máqa maaqai fímariqau. Misá adíafaa ímarufaqa néemarú ainainná faqa áfundimaru saqári anoonnána faqa mara kamméerasaa quqéesee Isipa máqannaasa feefauríaqeera máree fiqau.
26Yúdafa narí ákaqaa fasáauqa qímanniminoo qinau. Ínni sáimbaqa qeeqá qíkaqa árusée miná fidíka rafáaqafusee nána dadaaqíranee máraanauree.
27Ánifaqa Isamaeerana áiku ásauku máà aniraasá nímianaqa feefaurú qímiaqa. Mifa maasá qíkaqa máridanoo maasá moodáa fidika márinara sía miná áidafirana ámia. Miqí qufaqá misa eedóo qiqau.
28Eedóo qímarufaqa Midianna máqusanaasa aináina feefaurí márusa aniroofaqá misa nárì níkaqa Yóoseefaana madikakínaana qubáqeeqee misá nimisoofaqá siruáa múnnimma moodáa fásiqa áiku ásauku taikásee 20 nimisée doo Yóoseefaana máree Isipa máqa maaqai fiqau.
29Misá Yóoseefaana nímuna Reeubeenafa sía qáfanau. Mifá aniréenoo madikakí óoqu qáfoofanoo sía márufanoo narí qamunna anaqáana qinau.
30Miqímmaseenoo Reeubeennáfa narí ákaqaafasaauqa unnái óonuree qímanniminau. Yóoseefaafa sía máridanoo qinée náqi fee ianáuree.
31Miqí qufaqá misá mimmí arusée Yóoseefaana kísaaqa qámmunna miná fidíkaki raaraa iqau.
32Miqímmasee misa mi qammunnána mara máree nárì níkoofunnai óonuree qímamiqau. Maasa maa qamunnána moosáa paqúriqa, qáfaa, aní ámaakundi fée máridanoo fée.
33Yakooboofa mi qamunnána qáfamaseenoo qinau. Qiní qímaaku qamunna máridanoo. Káasau áandau fánnoo qiní faiqì Yooseefaana arusée rakéekaammáseenoo fée qinau.
34Miqí qímaseenoo Yakooboofa narí qamunna anáqana qíiseenoo soofaara qámunna afisúseenoo kísaaqasaa narí faiqiara soofaarída márinau.
35Márufaqa miná faiqi námu fáqa áraamuqmaaka fáqa aniréeqa nári níkoona aundurá reendeénira ufa qufanóo misá níkoofa qáòo qídanoo qinau. Qinee qeeqá faiqiara ikí ráqaqa fúannaqbaqa kúqiqa kúqirausa máriannai fuanáura.
36Yakooboofa miqí márufaqa Midianna máqannaasa Yooseefaana áfiqamaree Isípa máqa máaqai Póotifaana aináinira fáiqi kíanífeera amiséeqa feefaurú máraqau. Isipa máqannaa kínna máaqasaa rakisi márusakiqari Pootifaafa úriqarara óofisáa márufaqa ámiqau.
