Óosana 29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Miqí qímaseenoo innaaru qímaseenoo Yakooboofa súani óosana qáannai máriasa, misá máqa máaqai óonu ranau.

²Óonureenoo qáfoofanoo nammári mádika qúsau sáqanna márufanoo qaaramoóki sipsípauqa mi nammari madikána áfainni faiqaqéeufaqa misásaa rakísirausa miqóo rakísimáriqau. Sipsípauqa mi madikánakinaa námmari néemariqau. Firaa ooninnóo mi madikána rafáaqafúqoofanoo márinau.

³Sipsípauqa aiqáma moodáa qoo aniroofaqá sipsípasaa rakísirausa mi oonína quanda quandammá áqusee nammári nimisée kaifáa mi oonína quanda qundammá máfi rafáaqafi máriqau.

⁴Yakooboofa sipsípasaa rakísi marúsa óonu níndafeenoo qinau. Qiní qíkaqaafasaa, ínnee yáindaraasee máridaqee. Misá qiqau, maasá Qaraana máqusaindaraasa máridaqa.

⁵Yakooboofa iriséenoo qinau. Ínnee Náqoorana ánaiqi Rábannanara íridee qufaqá misá qiqau. Eeóo maasá minára íridaqa.

⁶Miqí qufanóo Yakooboofa qinau. Rábannafa ámiqisaa féè máridanoo féè. Misá qiqau. Eeóo ámiqisaa máridanoo. Miná qáfaa, dóo miná áraamuna Raseera námmarifa miná sipsípauqa nífiqee ánidanoo.

⁷Yakooboofa misá sipsípa óosana qáfeenoo qinau. Ínnee náqifee ifaqée sipsípa súani qámbaana mara quqáqaafaqee máridee. Dauní nammári nimiséeqa mara quqásaifaqá misa fída qúsaù néeqa nifaaqa máraaqa.

⁸Mi maqannáasa iriséeqa qiqau. Maasá sía miqíanaura. Aiqáma sipsípa maaqóo aniráifaqa óoni quanda quandammá áqusee nammári nímifaranoo.

⁹Yakooboofa misá fáqa ufa qímarufanoo Raseera námmarifa narí ákoona Rábanna sipsípauqa nífiqee aniranau.

¹⁰Yakooboofa narí ánoona Reebeeka námmarina ásookina áraamuna qáfamaseenoo Rábanna sipsípa faqa qáfamaseenoo fíndifinoo nammári mádikaki rafáaqafúqoo óonina quanda quandammá máfi quqáseenoo Raseera námmarina sipsípauqa nammári níminau.

¹¹Nammári nimiséenoo Raseera námmarina óoriki ámooqaidanoo asasírafa firaafa minakí márufanoo ikí ráqanau.

¹²Ikí ráqaséenoo Raseera námmarina qímaminoo qinau. Qinée aní ákoona áti Reebeeka námmarina ámaaku máridaqa. Raseera námmarifa miná ufa iriséenoo sandéenoo óonuree narí ákoona qímaminau.

¹³Rábannafa narí ánauqi Yakooboona ufa iriséenoo sandéenoo óonu máfi káqaramma qumáreenoo ámooqáseenoo sukudaakútamásee áfiqeenoo narí máaqai áninau. Miqóo óonu máridanoo Yakooboofa Rábanna aiqáma áinaina kambíqoonara qímaminau.

¹⁴Rábannafa iriséenoo maaqí qímasee qímaminoo qinau. Anee qiní moodáa fidíka máriananoo. Miqí qímasoofanóo Yakooboofa moodáa úqoona miná faqa miqóo márinau.

¹⁵Rábannafa maaqí qímaseenoo Yakooboona qímaminoo qinau. Kúqaa anée qiní qinauqí máriananoo, sía fífau qiní aináina kai innáranoo. Maqee óosana araséeqa feefaurú ámiqambuanaura. Aní náqifee mandee feefaurú ámianauree.

¹⁶Rábanna áraamuna qára qaaraqánda máriqau, indaarúqaafa Reeaa námmarifa márinau ínaaqíanaafa Raseera námmarifa márinau.

¹⁷Reeaa námmarifa indaarúqaafa ámiqira óori áfiri faqáafa márinau. Raseera námmarifa miná faqa arusée káaqa ámiqirafa uqanna márinau.

¹⁸Yakooboona írirafa Raseera námmarinara kai íri marúfa márinau. Minára iriséenoo Yakooboofa Rábannana narí aináini máruna ákiiqara qímaminoo qinau. Amanée qinée Raseera námmarina máraanaurée. Anee eedóo qínaqa qinee miná ákiiqara qísauku dínni taikásee dínni ani qaara marasée 7 áukuana aní aináina ianáura.

¹⁹Qufanóo Rábannafa qímaminau. Qinee amaná aní ámianaura, moó óosana nímiranara qíkooqaidanoo. Dóo anée qiní fáqa máridana aináinia.

²⁰Rábannafa miqí qímasoofanóo Yakooboofa Raseera námmarina márararee qímaseenoo qísauku dínni taikáseenoo dínni ani qaara maraséenoo 7 áukuana miná aináina máìsee márinau. Yakooboofa Raseera námmarinara áidi márufanoo mi aukuanna namúfa qaaramoó fáasaanara foorá áiqaranau.

²¹Dínni taikásee dínni ani qaara marasee 7 áukuana taikásoofanoo Yakooboofa Rábanna qímaminoo qinau. Dóo qini mánaaqa qímiraree qunná áukuanafa áiqareenoo. Doo Raseera námmarina qíminaqa máraa.

²²Rábannafa eedóo qímaseenoo narí áraamuna amundáida oomáqa sakasée aiqáma náaroofaqa ani naqau.

²³Mi eendánaki Rábannafa narí áraamuna indaarúqaana Reeaa námmarina qumeé Yakooboona máaqaki quqásoofanoo Yakooboofa áuna Raseera námmarifa mifoo qímaseenoo miná faqa sakasée faiqanau.

²⁴Rábannafa miqóo qáraasa óosana máreeno narí aináinira mánaaqa moó mináuqu Siripaa námmarina maréeqee narí áraamuna Reeaa námmarina aináina máìsáanifeera áminau.

²⁵Iáqoofanoo fíndifinoo Yakooboofa qáfamaseenoo, boo Reeaa námmari fee qinau. Yakooboofa Rábanna funnai óonureenoo áqinoo qinau. Anée náqifee ífanee qiní miqímma qímaqeenee. Qinée Raseera námmarina márararee qímasee aní aináina máìséeqa. Aneé nánaree qiní qíkaru qínanee.

²⁶Rábannafa qinau. Maasá maaqóo qáraasa óosana sía miqínoo máridanoo. Indaarúqaana náaree amundáseeqa ínaaqiannáana kásooaqee inaaqíanna amundáidaqa.

²⁷Anée Reeaa námmarina fáqa káqi márinanoo miná oomáqirafa 7 fáasaana máriannoo. Taikáinaqa miqóo kafáa Raseera námmarina faqa ámianaura. Ámianana miqóoqari miná ákiiqara anée óosana araséenana kaifáa dínni taikásee dínni ani qaara marasee 7 áukuana qiní aináina innáranoo.

²⁸Yakooboofa minára iriseenoo eedóo qímaseenoo Reeaa námmarina fáqa máriufanoo qoomáqa nárana taikóofanoo Rábannafa narí áraamuna Raseera námmarina faqa áminau.

²⁹Kafaa Rábannafa narí aináinira mánaaqa miná áuqu Biriqaa námmarina maréeqeenoo Raseera námmarina aináinianífeera áminau.

³⁰Ámufanoo Yakooboofa Raseera námmarina fáqa sakasée faiqanau. Yakooboofa Raseera námmarinara áidi márufanoo Reeaa námmarinara sía ámiqimma áidi márinau. Miqídanoo Rábannana aináiniranaki kafáa qísauku dínni taikásee dínni ani qaara marasée 7 áukuanaki márinau.

³¹Yakooboona írirafa Raseera námmarinasaa kaí mundínoo márunara Reeaa námmarinara ákoo akáa mímárinau. Miqí márunara Karaambáiqa qáfeenoo dadaaqufanóo Reeaa námmarifa ámuaqu qáikinau.

³²Reeaa námmarifa ámuaqu qáikinoo máriiufanóo faiqì akoonaiqí máqanau. Maqaséenoo qinau. Karaambáiqa qiníara qímudáòo qinára qiní qifaaqi fannóo maqee qinísaa atooqéenoo fee qianáura. Mi irirána iriséenoo mi faiqína áuqu Reeubeená fée qinau.

³³Reeaa námmarifa marikínoo kaifáa ámuaqu qáikinoo máriiufanóo faiqì akoonaiqí moó máqanau. Maqaséenoo qinau. Qiní qifaaqi qiní ámeesuqi márinara Karaambáiqa írinoo qiníara qimudáòo qímaseenoo maa faiqína qíminoo. Minára miná áuqu Simeeooná fée qinau.

³⁴Reeaa námmarifa marikínoo kafáa ámuaqu qáikinoo máriiufanoo faiqì akoonaiqí moó maqaséenoo qinau. Dóo maqee uqanná qiní qifaaqi fannóo dóo qinísaa atooqáannoo, qinée qaaramoó ákoonaiqi maqaséeqa. Minára iriséeqa mi faiqína áuqu Reefi née qíqa.

³⁵Reeaa námmarifa marikínoo kaifáa ámuaqu qáikinoo máriiufanóo faiqì akoonaiqí moó máqanau. Maqaséenoo qinau dóo maqee qinée Karaambáiqa amooqídaqa, maa faiqína áuqu Yúda fee qídaqa. Reeaa námmarifa Yúdana kaí maqaséenoo mi kamúqoo kísaaqasaa márinau.