Än Salomon Fos 9:1-18

¹Tipachem a aüetä imwan o aütäi füfoch üran.

²A niela nöün man o nofiti ünüman wain ngeni nofitin mongö, a pwal fotuki an chepel.

³A tinala nöün kewe chon angang fefin pwe repwe kökkö me won ewe leni tekia seni meinisin me lon ewe telinimw,

⁴“Ämi mi wewemang, oupwe feito ikei.” Nge a apasa ngeni ewe mi tiparoch,

⁵“Kopwe etto o mongö seni enei mongö, kopwe ün seni ewe wain üa nofiti.

⁶Kopwe likiti ekewe chon wewemang pwe kopwe manau, kopwe pwal fefeitä lon om sile.”

⁷Eman mi aiti ngeni eman chon turunufas mine a pwüng epwe püsin säw, nge eman mi apwüngü eman aramasangau epwe püsin feiengau.

⁸Kosap apwüngü eman chon turunufas, pun epwe oputok. Nge kopwe apwüngü eman mwän mi tipachem, pun epwe echenuk.

⁹Kopwe öüröüra eman chon tipachem, pun epwe lapala an tipachem. Kopwe aiti ngeni eman chon pwüng mine a mürina, pun epwe fefeitä lon an sile.

¹⁰Ach niuokusiti ewe Samol mi Lapalap iei popun tipachem, nge ach silei Ewe mi Pin iei popun ach weweöch.

¹¹Pun tipachem epwe achomongala ränin manauom, pwe ierin manauom repwe wattela.

¹²Are ka tipachem, en kopwe püsin feiöch ren. Nge are ka eman chon turunufas, kopwe püsin feiengau ren.

¹³Tiparoch a usun chök eman fefin a akürang, a lüangau o säwemang.

¹⁴A mot ünükün asamen imwan, ika won eu leni mi tekia seni meinisin me lon ewe telinimw.

¹⁵A kökköla mürin chokewe mi feila seni, chokewe mi chök ekiekin föri ar angang,

¹⁶“Iö kana mi wewemang repwe feito ikei.” A pwal apasa ngeni ewe mi tiparoch,

¹⁷“Koluk eman a soläni a fokun arar, nge pilawa eman a eni le monomon a fokun annö.”

¹⁸Nge ekewe aramas resap silei pwe chokewe mi tolong lon imwen neminewe repwe mäla, nge chokewe mi wasöla ren ra fen nom epin ewe lenien sotup.