YAASINƆ 9:1-18

¹Ɔ̃ndↄ̃ a kpɛ́ bò, à a gbɛ̀gbanↄ à mɛ̀n suppla à pɛ̀tɛpɛtɛ,

²à nↄ̀bↄↄ dɛ̀ à sèwɛ̃ bà, à pↄ́blenↄ soru kɛ̀ à kàtɛ.

³À a nↄkpare zĩkɛrinↄ zĩ̀, àtɛn lɛ́ zu wɛ̃tɛ sĩ̀sĩ mìsↄ̃ntɛa à pì:

⁴Ákↄ̃nↄ fayasaridenↄ à ɛra à mↄ́ la! Àkↄ̃nↄ laasunsaridenↄ matɛn oárɛ,

⁵à mↄ́ à ma pↄ́ble ble, à wɛ̃ kũ ma bà mi.

⁶À á yↄ̃nkↄkɛ tó, anigↄ̃ kun wɛ̃̀ndiio, à táa o wɛ̃kɛ̃na zɛ́n.

⁷Gbɛ̃ kũ àtɛn lalandide da zɛ́a tɛn sↄ̃sↄ̃ wɛtɛmɛ, gbɛ̃ kũ àtɛn kpãkɛ̃ yãvãnikɛriii tɛn taari wɛtɛ a zĩdanɛmɛ.

⁸Ǹsun kpãkɛ̃ lalandideiro, ani kɛ kũnwo ĩni, ǹ ↄ̃ndↄ̃de da zɛ́a, anigↄ̃ yenyĩ.

⁹Ǹ yã da ↄ̃ndↄ̃denɛ, a ↄ̃ndↄ̃ nigↄ̃ din, ǹ yã o gbɛ̃ mananɛ, a dↄ̃na ni kara.

¹⁰Vĩnakɛna Dikirinɛɛmɛ ↄ̃ndↄ̃ naana ũ, Luda kũ à kú adona dↄ̃naamɛ wɛ́kɛ̃na zɛ́ ũ.

¹¹Zaakũ ĩni gì kɛ ma gãi, n wɛ̃̀ndi gbã̀na ni kara.

¹²Tó ń ↄ̃ndↄ̃, n zĩdanɛmɛ, tó lalandidemɛ n ũ, n mìi musu.

¹³Yↄ̃nkↄkɛ de lán nↄgbɛ̃ lɛ́de bàmɛ, à ↄ̃ndↄ̃ vĩro akũsↄ̃ à yãke dↄ̃ro.

¹⁴Àdi vutɛ gbàaa a kpɛ́lɛlɛa, a kpɛ́ kú wɛ̃tɛ sĩ̀sĩia,

¹⁵àtɛn lɛ́ zu gbɛ̃ kũ òtɛn gɛ̃tɛnↄi, àtɛn pi gbɛ̃ kũ ò tɛ́ zɛ́n súsunↄnɛ:

¹⁶Ákↄ̃nↄ fayasaridenↄ à ɛra à mↄ́ la! Ákↄ̃nↄ laasunsaridenↄ, matɛn oárɛ,

¹⁷í kpãni minaa dìgↄ̃ nna, pↄ́blenaa asiri gũn bi zↄ́mɛ.

¹⁸Gbɛ̃ pìnↄn dↄ̃ kũ abire bi gyãwãn zɛ́nlo, gbɛ̃ kũ yↄ̃nkↄkɛ ń sisinↄ sì gyãwãn tↄ̃̀nↄwɛɛn.