Dagiti Proverbio 9:1-18

¹Impatakder ti Kinasirib ti bukodna a balay; nangaramid isuna iti pito nga adigi manipud kadagiti batbato.

²Nangisagana isuna kadagiti ayup a kukuana a maidasar a pangrabii; tinimplana ti arakna; ken insaganana ti lamisaanna.

³Nangibaon isuna kadagiti babaonenna a mapan mangawis ket umaw-awag isuna manipud iti kangangatoan a disso iti siudad:

⁴“Paumayenyo koma ditoy dagiti saan a nasursuroan!” kunana kadagiti awan ammona.

⁵“Umaykayo, kanenyo ti taraonko, ken inumenyo ti tinemplak nga arak.

⁶Ibatiyo ti kinaignoranteyo, ket agbiagkayo; magnakayo iti dalan ti pannakaawat.

⁷Siasinoman a mangbabalaw iti mananglais ket mangaw-awis iti mismo a pannakairurumenna, ken siasinoman a mangtubngar iti nadangkes a tao ket madangran.

⁸Saanmo a tubtubngaren ti mananglais, di la ket ta guraennaka; tubngarem ti nasirib a tao, ket ayatennaka.

⁹Isuroam ti nasirib a tao, ket ad-adda a sumirsirib pay isuna; isuroam ti nalinteg a tao, ket manayunanto pay ti ammona.

¹⁰Ti panagbuteng kenni Yahweh ket isu ti pangrugian ti kinasirib, ken ti pannakaammo iti maipapan iti Nasantoan ket pannakaawat.

¹¹Ta babaen kaniak ket mapaadunto dagiti al-aldawmo, ken manayunan ti tawtawen ti panagbiagmo.

¹²No nasiribka, nasiribka a maipaay met laeng kenka, ngem no manglaiska, baklayemto nga agmaymaysa.”

¹³Naariwawa ti maag a babai- awan sursurona ken awan ammona.

¹⁴Agtugtugaw isuna iti ruangan ti balayna, iti tugaw nga adda iti kangangatoan a disso iti ili.

¹⁵Aw-awaganna dagiti lumablabas, dagiti tattao nga agbibiag a sililinteg.

¹⁶“Paumayenyo koma ditoy dagiti saan a nasursuroan!” kinunana kadagiti awan ammona.

¹⁷“Nasam-it dagiti tinakaw a danum, ken naimas ti tinakaw a tinapay.”

¹⁸Ngem saanna nga ammo nga adda sadiay dagiti natay, a dagiti sangaili ti babai ket adda kadagiti yuyeng ti sheol.”