Zĩnaↄ yãkɛaↄ 2:12-22

¹²Yã́pi ń kṹ gbãa, aa bílikɛ̀, aalɛ kↄ̃ lala aa mɛ̀: Yã́pi dɛ kpelewan wei?

¹³Gbɛ̃eↄ sↄ̃ aalɛ ń láanikɛ aa mɛ̀: Í mɛ́ ń kã́.

¹⁴Ɔ̃ Piɛɛ fɛ̀lɛ zɛ̀ ń a gbɛ̃́ kĩni gbɛ̃ↄn kuɛdoↄ, à yã'ò gbã́ugbãu à mɛ̀: Á Yudaↄ ń gbɛ̃́ pↄ́ kú Yelusalɛũↄ píi, tó á ye yã́pi dↄ̃, à swã́kpa ma yã́i.

¹⁵Í i gbɛ̃́piↄ kã lá álɛ ewao, asa kↄↄ mↄ̀ kɛ̃okwiɛ.

¹⁶Ãnabi Yoɛli dↄ̀aa yã́ɛ bee ò à mɛ̀:

¹⁷Lua mɛ̀ gↄↄgbɛzãzĩ má a Nisĩna pisi gbɛ̃́piiɛ, á nɛgↄ̃ɛↄ ń á nɛnↄɛↄ i ãnabikɛkɛ, á ɛ̀waasoↄ i wɛ́pungu'e, á maezↄ̃ↄↄ i yã́ↄ e iu.

¹⁸Gↄↄbeezĩ má a Nisĩna pisi ma zↄ̀blenaↄnɛ gↄ̃ɛↄ ń nↄɛↄ píi aai ãnabikɛkɛ.

¹⁹Má seelaↄ kɛ musu, má yãbↄnsaɛↄ kɛ dṹniau, au ń tɛ́o ń tɛluo aↄ ku.

²⁰Ĩatɛ̃ a siakũ, mↄvua a tã lán auwa e Dii mↄgↄↄ zↄ̃ↄ gawide àↄ mↄ́,

²¹Dii sìsinaↄ i bↄ píi.

²²Isailiↄ, à yã́ɛ bee ma. Lá á dↄ̃ ázĩawa, Lua tò a Yesu Nazalɛti dɛa a gbɛ̃́ ũ seela è dabudabuↄ ń yãbↄnsaɛ pↄ́ a tò Yesupi kɛ̀ á guuↄ yã́i.