Aposel 2:12-22

¹²Pa la kulkulan, pa i loklokron a nuknukinla, pa la deken artalai la mang, “Dalar tasman mangmangasa a utna ne?”

¹³Ika dingla na tarai la morot onla, pa la atongi mang, “La gang a wain pa la laulau ono.”

¹⁴Lamur e Pita i tur taum ana ning a bonot pa pisir takai aposella, pa i warwara kol tetek a taraila mange, “Mulo a tarai Juda, pa mulo rop ning mulo kes te Jerusalem, ar atalapor a utna ne ta mulo, pa mulor longor wakaki.

¹⁵Mulo atongi mang la sipak. Ika bel, anasa i 9 kilok ot ne ana kobot.

¹⁶A utna ne mulo oroi, a propet Joel ka warwara nigo tar onoi mang,

¹⁷‘E God i atongi mange: Ana ararop a pukakiarla ar saran purum a Inguk tetek a taraila rop. A natnatumulola, a taraila pa gurarala, lar warwara na propet. Anumulo na barmanla lar oroi a tatataila, pa anumulo na bun lar resnan a reresala.

¹⁸Ana pukakiarla ning, ar saran a Inguk tetek la otleng anuk na tena titol oros a taraila pa gurarala, pa lar warwara na propet.

¹⁹Par asangan a ututnala na kulkulan saot na langit, pa akinalangla te lapiu na rakrakan hanua, lar a suluk, a iah, pa a tnan sasawan.

²⁰A kamis ir mormorom, pa a kalang ir kubar, lar a suluk, pa lamur a pukakiar ana Leklek ir hanot, a tnan pukakiar ning, a pukakiar a matatar.

²¹Pa la rop ning la nunung tetek a Leklek, ir alaun la.’

²²“A tarai Israel, mulor longor iau. Ar atai mulo o e Iesu, a te Nasaret. Mulo ot mulo tasmani mang ana rakrakai e God, i tol a ututnala na kulkulan, pa rakrakai a titolla pa akinalangla. I toli na arpotor ta mulo, sur e God ir asangani tetek mulo mang i ot i sune seni.