1Wofuŋte dâŋ i Amoŋte ŋokâ Josiazi Juda ŋicwofuŋ erâ juhame Zefaniarao fuawec. Zefania e ine Kusire ŋokâ, Kusizi ine Gedaliare ŋokâ, Gedalia e ine Amariare ŋokâ, â Amariazi Hisikiare ŋokâ, iŋuc fuarâ jumbiŋ.
2“No mâreŋte faio wiac fofârekac i ʒeŋgoma bâsirowe‐jâmbâŋkepemu,” Wofuŋte dâŋ iŋuc.
3“No ŋic mecne, qowi mecne, sawa wipe mecne, â opâ qowi mecne jaŋe mâmâc sasawa omaec‐jopa‐fârepemu. Erâ ŋic hehesicne jopahuc mâreŋŋic ʒeŋgoma bâsirowec‐jopa‐fârepemu,” Wofuŋte dâŋ iŋuc.
4“No Judaŋic â Jerusalem ŋecjucfâc‐ticne mâmâc râsi ejarepemu, erâ Baali nemu araŋ babacne irec wiac i mâreŋ ʒirecnec ro bârâriec ehuc taha bapa burecne jaŋe omaec‐jopapemu wâc.
5Â wiac kecʒiŋuc eeŋgopieŋ ŋic i jaŋe mâmâc bâsirowec‐jopapemu: Ficbupuo ferâ mosa ʒoaŋ â bâpiŋ dape‐jareeŋgopieŋ, â fodaperâ Wofuŋtao ɋetickehuc dâŋnâŋec mupaŋkenʒepeneŋ, iŋuc muhuc burec erâ Milikom nemu erao mupaŋkeeŋgopieŋ.
6Erâ Wofuŋ bâjâpehuc juku râpeckembiŋ, ehuc wira basac me mu wioc mi ecneeŋgopieŋ.”
7Wofuŋ Anuture maio niniŋkeniŋ! Wofuŋte dameŋ maickekac hâcne. Wofuŋ e taha bâzi râe bâmoc ehuc hefârec‐jopakicne jaŋe biric‐jopakac.
8Wofuŋzi kecʒiŋuc mukac: “No taha bâzi dameŋ ira micne bapa â ŋicwofuŋte ŋokâfâc jaŋe katucne jarepemu, erâ ŋic jabane jaŋere eebapao raʒieŋgopieŋ jaŋe mâmâc.
9No dameŋ ira qâpuc mamanasiŋ bâjâpeeŋgopieŋ erâ eeatuc â bâbâʒâic gie bahuc fekicne‐jeŋicte fic hefuseeŋgopieŋ jaŋe okacne jare‐fârepemu.”
10Wofuŋzi ʒuhuckerâ ʒiŋuc mukac: “Dameŋ ira Jerusalem haere motâc moc ʒâŋene Opâ Qowi Motâc, irecnec kio owa moc fuame mananiŋmu, â hae ɋâricnaonec ki ojowa, â hae toŋnaonec wâc fânâŋ sâko fuaocmu.
11Âbârâ gie bapa ŋic jaŋe sipiric‐jopakicne, â siliwa moneŋ sigelio râe jumbieŋ ŋic i jaŋe wâc bâsirowec‐jopakicne, irec hae dâkâne mocte uuruŋnao ŋec juc eeŋgopieŋ ŋoŋe kio owa eniŋ!
12Eme no dameŋ ira hâcne Jerusalem haere fuŋne bajaŋgeŋkepemu, ehuc nânâ mafa wiac‐jeŋicko qohota sanaŋkeeŋgopieŋ jaŋe okacne bazu‐jarepemu, maŋjeŋiczi ʒiŋuc mueŋgopieŋ jaŋe hâcne: ‘Wofuŋ e wiac biaŋne mecne sâqocne mecne moc mi enâreocmu.’
13Moneŋ mafa wiac‐jeŋic i fiuc roro jaŋere biŋe ezejec, â hae‐jeŋic i niniŋ siarereŋ fuarâ fozejec. Eme fic wiac mocwâc bâpiaŋkerâ baniŋmuo ine sifu maŋnao ŋec foc mi enʒepieŋ, me waiŋ gie bapie fârine fuaocmuo ine wâc mi nânʒepieŋ.”
14Wofuŋte okac dameŋ maickehuc biac qândâŋke‐fârekac. Manaŋgopieŋ, Wofuŋte dameŋ i dameŋ hâtâne, irec ŋic qac momorihec jaŋe wâc kiohuc owa ruruckeniŋmu.
15Dameŋ i kimbeŋ aaric dameŋ, erâ wâc ʒârâ hâriŋ â ʒâic dameŋ, sisipiric â ima qaqa dameŋ, dapâc â dapâc siŋsiŋ irec dameŋ, erâ karorac â dapâc qisiric irec dameŋ.
16Dameŋ ira qeŋfânâŋ â ʒikare aŋara hehe fuame hae sanaŋ â fic hâŋ bakicne jaŋe wemocko sanaŋkerâ ŋeniŋmu.
17Ŋic jaŋe wiac hehesicne ehuc Wofuŋ no bunaneo bambiŋte hâhâwic hejarepe ŋic jaŋe ʒâŋe tiŋtuŋ iŋucne erâ qic qucne junʒepieŋ. Socjeŋic i rufe iŋucne hoŋkezo, â sahac biuc‐jeŋic i sohoŋ iŋucne âte dockezo.
18Wofuŋ kimbeŋ‐ticnere dameŋko siliwa â gol wiac‐jeŋiczi mi ŋezic‐jopaocmu, aricne. Mâreŋ sâko mâreŋ i kimbeŋ‐ticnere ʒocbâruŋzi ʒâseŋke‐fâreocmu. Ehame mâreŋte ŋecjucfâc jaŋe furu jaha ututuŋ hâmo miziec efâreniŋmu.
