ZABURA 35:6-20

⁶Ń zɛ́ gↄ̃ gusira ũ kũ guzãrɛɛo, Dikiri Malaika ↄ sↄ̃ńyĩ.

⁷Zaakũ ò wɛ̀ɛɛ yↄ̃̀mɛnɛ pã, mádi yãke kɛńnɛro, akũ ò bàa kpàkpamɛnɛ.

⁸Ǹ tó kisira ń le kãnto, ǹ tó bà kũ ò kpàkpamɛnɛ ń kũ de ò lɛ́tɛ wɛ̀ɛ kũ ò yↄ̃̀ↄ pìi gũn.

⁹Ma pↄ ni gbasa à kɛ Dikiria nna, mani pↄnna kɛ kũ à ma sura bà yãi.

¹⁰Mani pi kũ nɛ̀sɛdoo, Dikiri, dí mɛ́ à de lán n bàa? Ndì takasidenↄ sí gbãnamↄnnɛrinↄa, ndì wɛ̃ndadenↄ bo ń wɛ́tãmmarinↄ ↄĩ.

¹¹Sèeda ɛ́kɛdenↄ dì futɛmai, òdi yã kũ má a yã dↄ̃ro lalama.

¹²Òdi yã mana fĩna bomɛnɛ kũ yã vãnio, akũ ma gↄ̃ boado ũ.

¹³Tó ò gyã kɛ̀ sↄ̃, ma uta kasa dà, ma ma zĩda bùsa kũ lɛ́yĩnaao, ma adua kɛ̀ńnɛ lakanaa sari,

¹⁴lákũ ò de ma gbɛ̃nna ke ma danɛ ũ bà. Ma kure má mìpɛtɛna kũ pↄsirao, lákũ ma dan matɛn wɛ̃nda kɛnɛɛ bà.

¹⁵Ama kũ ma gɛ̃̀ɛ sì, ò lìkamai kũ pↄnnao, ò ma kɛ pã ò lɛ̀tɛma, ò ma yaka lakanaa sari.

¹⁶Ò ma fobò pãsĩpãsĩ, ò saka pìtima.

¹⁷Dikiri, ĩnigↄ̃ ma gwa lɛ ari bↄrɛɛ? Músu pìnↄ tɛni ma kɛ yákiyaki, ǹ ma síḿma màgↄ̃ kú wɛ̃̀ndiio.

¹⁸Mani n sáabu kpá pari kↄ̃kakarana gũn, mani n tↄ́ kpá gbɛ̃nↄ wára.

¹⁹Ǹsun tó ma ibɛrɛnↄ ma yáa dↄro, ǹsun tó gbɛ̃ kũ ò zã̀magu pãnↄ ma gwa kũ wɛ́ vãnioro.

²⁰Yã nna dì bo ń lɛ́nlo, òdi yã di yãketesaridenↄa.