ZĨRINƆ 9:1-19

¹Gↄrↄ birea sↄ̃ Solu tɛn pↄ́ bo a yĩn, àtɛn yã pãsĩ o Dikiri ìbanↄ dɛdɛna yã musu. À gɛ̀ɛ sa'oriki kĩnaa,

²à gbɛ̀kaa à lá kɛ̃ Damasuku aduakɛkpɛdenↄnɛ à kpáawa, de tó à zɛ́ pì denↄ lè gwe, gↄ̃gbɛ̃nↄ kũ nↄgbɛ̃nↄ ń pínki, ani ń kũkũ à su kũńwo Yurusalɛmu.

³Kũ à dà zɛ́n, àtɛn gɛ́ à kà kãni kũ Damasukuo, akũ kãnto gupura bò ludambɛ à dàmala.

⁴À bò à lɛ̀tɛ, akũ à kòtoo mà à pìnɛ: Solu, Solu, bↄ́ mɛ́ à tò ntɛn wɛ́ tãmaa?

⁵Akũ à pì: Dímɛ n ũu, Dikiri? Akũ à wèa à pì: Makũmɛ Yesu kũ ntɛn wɛ́ tãa ũ.

⁶Ǹ futɛ ǹ gɛ̃ wɛ̃tɛ gũn, oni onnɛ yã kũ ĩni kɛ.

⁷Gbɛ̃ kũ òtɛn gɛ́ kãaonↄ gↄ̃̀ sã̀ii. Ò kòtoo pìi mà, ama odi gbɛ̃ke ero.

⁸Kũ Solu fùtɛ, à a wɛ́ wɛ̃̀, akũ adi gu ero. Akũ ò a kũ̀ a ↄa ò gɛ̀ɛ kãao Damasuku.

⁹À kɛ̀ gↄrↄ aakↄ̃ gu'enaa sari, adi pↄ́ blero adi í miro.

¹⁰Yesude ke kú Damasuku kũ òdi pinɛ Anania. Dikiri yã ònɛ wɛ́gupu'enaa gũn à pì: Anania. Akũ à wèa à pì: Makũn dí, Dikiri.

¹¹Akũ Dikiri pìnɛ: Ǹ futɛ ǹ da zɛ́ kũ òdi pi Súsun ari Yudasi bɛ ↄnn ǹ Taasu gbɛ̃ kũ òdi pinɛ Solu gbɛka. Àtɛn adua kɛ gwe.

¹²Wɛ́gupu'enaa gũn à n e, n su n ↄ nàa de à gu e.

¹³Akũ Anania pìnɛ: Dikiri, ma mà ò gbɛ̃ pì yã ò dasi, lákũ à yã vãni kɛ̀ n gbɛ̃ kũ ò kú Yurusalɛmunↄnɛ nà.

¹⁴Sa'orikinↄ a gbà zɛ́ à gbɛ̃ kũ òtɛni n sísi lanↄ kũkũ. Abire yãin à sù.

¹⁵Akũ Dikiri pìnɛ: Ǹ gɛ́, zaakũ ma gbɛ̃ pìi sɛ̀ à gɛ́ ma tↄ́ bo buri pãndenↄnɛ kũ ń kínanↄ kũ Isarailanↄomɛ.

¹⁶Lákũ ani wɛ́tãmma le ma tↄ́ yãi nà mani mↄnɛ.

¹⁷Akũ Anania bò à gɛ̀ɛ à gɛ̃̀ ↄn pìn, à ↄ nà Solua à pì: Solu ma gbɛ̃, Dikiri Yesu kũ à bò à sùmma zɛ́n gↄrↄ kũ ntɛn su la, àkũ mɛ́ à ma zĩ de ǹ gu e Luda Nini summa yãi.

¹⁸Gwe gↄ̃̀nↄ pↄ́ bↄ̀tɛ a wɛ́n lán kpↄ̀tɛkɛɛ bà ò lɛ̀tɛ, akũ à gu è. Akũ à fùtɛ à da'itɛ kɛ̀.

¹⁹Kũ à pↄ́ blè, à gbãna kũ̀. Solu gↄrↄ pla kɛ̀ kũ Damasuku Yesudenↄo,