Hechos 9:1-19

¹Ekꞌu ri Saulo na karoqꞌotaj taj kuxibꞌij kipa rukꞌ kamik janipa ri kikojom rubꞌiꞌ ri Qanimajawal. Xeꞌek kꞌu rukꞌ ri kajawal raj chakunel pa Rocho Dios

²y xutzꞌonoj bꞌi uwujil chaꞌ kayaꞌiꞌ puqꞌabꞌ kok pa taq ri sinagogas re ri tinamit Damasco. Jekꞌulaꞌ, we keburiq achijabꞌ o ixoqibꞌ e kukꞌil ri kitaqem wa kꞌakꞌ Bꞌe, kꞌo kꞌu puqꞌabꞌ riꞌ kebꞌuyut loq y kebꞌukꞌam lo Jerusalem.

³Ekꞌu ri Saulo e riꞌ kꞌo pan chi bꞌe che uꞌanik waꞌ, katajin kꞌu roponik chunaqaj ri tinamit Damasco, echiriꞌ xaqikꞌateꞌt ruwonibꞌal jun aqꞌ xpe chilaꞌ chikaj, xwol kaꞌn puwiꞌ y xusut rij.

⁴Ri Saulo xtzaq pulew y xuta kꞌu jun qulaj, jewaꞌ kubꞌiꞌij che: —Saulo, Saulo, ¿suꞌchak katchꞌoꞌjin chwij? —xcha che.

⁵Ri Saulo xutzꞌonoj che: —¿Lal china rilal, Wajawal? —xchaꞌ. Jekꞌuwaꞌ xkꞌul uwach che: —Riꞌin in Jesús, ri Jun katchꞌoꞌjin chirij. Yey riꞌat, atukel nenareꞌ lik kaꞌan kꞌax che awibꞌ, jelaꞌ pachaꞌ juna bꞌoyex echiriꞌ kuya aqan che ri puya kachꞌik lo che —xuchixik.

⁶Kabꞌirbꞌot kꞌu ri Saulo y uxiꞌim ribꞌ, jewaꞌ xubꞌiꞌij che: —Wajawal, ¿saꞌ ri kaꞌaj la kanꞌano? —xchaꞌ. Ri Qanimajawal xukꞌul uwach: —Chatyaktajoq y jat chupa ri tinamit, ma chiriꞌ kabꞌiꞌx wi chawe saꞌ ri chirajawaxik kaꞌano —xchaꞌ.

⁷Ekꞌu rachijabꞌ e rachbꞌiꞌil ri Saulo lik kixiꞌim kibꞌ xetakꞌiꞌik; ma xkita ri qulaj, noꞌj na jinta junoq xkil uwach.

⁸Ri Saulo xyaktaj chwa rulew y xujaq kꞌu ruwach, pero na jinta chi kꞌo karilo ma xkanaj kan potzꞌ. Ewi xa xchꞌelex bꞌi che ruqꞌabꞌ kuma ri erachbꞌilam y xkꞌam bꞌi chupa ri tinamit Damasco.

⁹Xkꞌojiꞌ kꞌu chilaꞌ oxibꞌ qꞌij; e laꞌ na katzuꞌn taj, na xwaꞌ taj y na jinta ne umiqꞌinaꞌ xutijo.

¹⁰Chilaꞌ kꞌu riꞌ Damasco kꞌo jun achi Ananías rubꞌiꞌ; rire ukojom rubꞌiꞌ ri Cristo. Kꞌo kꞌu jun kꞌutubꞌal re ri Dios xqꞌalajisax chwach. Ri xrilo e ri Qanimajawal xukꞌut uwach chwach y jewaꞌ xubꞌiꞌij che: —¡Ananías! —xcha che. Rire xukꞌul uwach: —Riꞌ in kꞌolik, Wajawal —xchaꞌ.

¹¹Xubꞌiꞌij kꞌu ri Qanimajawal che: —Chatyaktajoq y jat chupa ri bꞌe kabꞌiꞌx “Jusukꞌ” che. Yey chirocho kꞌu ri Judas, chatzꞌonobꞌej puwi jun achi aj Tarso, Saulo rubꞌiꞌ. Rire katajin pa oración

¹²y qꞌalajisam chi kꞌu jun kꞌutubꞌal re ri Dios chwach. Chupa waꞌ xril jun achi Ananías rubꞌiꞌ, e riꞌ kok bꞌi y kuya ruqꞌabꞌ puwiꞌ chaꞌ jelaꞌ katzuꞌn tanchik —xchaꞌ.

¹³Xubꞌiꞌij kꞌu ri Ananías che ri Qanimajawal: —Wajawal, lik nutom ronoje ri na utz taj uꞌanom waꞌ waꞌchi chike ri kikojom ri bꞌiꞌ la chilaꞌ Jerusalem.

¹⁴Yey yaꞌtal ne lo puqꞌabꞌ kuma ri nimaq e aj chakunel pa Rocho Dios kebꞌukꞌam bꞌi pa cárcel konoje ri kikojom ri bꞌiꞌ la —xchaꞌ.

¹⁵Ekꞌu ri Qanimajawal xubꞌiꞌij che: —Jat chilaꞌ rukꞌ, ma Riꞌin nuchaꞌom rire chaꞌ kuꞌana jun waj chak re keꞌek che uqꞌalajisaxik ri nubꞌiꞌ chikiwach ri winaq na e ta aj judiꞌabꞌ, chikiwach ri e taqanelabꞌ y chikiwach ri e aj Israel.

¹⁶Yey kankꞌut kꞌu che, janipa ri kꞌaxkꞌolil chirajawaxik kikꞌow wi rire ruma kutzijoj ri nubꞌiꞌ —xuchix ri Ananías.

¹⁷Ri Ananías xeꞌek kꞌut y xok pa ri ja pa kꞌo wi ri Saulo. Xuya kꞌu ruqꞌabꞌ puwiꞌ y xubꞌiꞌij che: «Hermano Saulo, ri Qanimajawal Jesucristo, ri xuqꞌalajisaj ribꞌ chawach chupa ri bꞌe pa at petinaq wi, inutaqom lo awukꞌ chaꞌ kat-tzuꞌn tanchik y kakꞌul kꞌu ri Santowilaj Ruxlabꞌixel ri Dios» xcha che.

¹⁸Chupa kꞌu laꞌ la joqꞌotaj, kꞌo ri pachaꞌ soloꞌt xtzaq che ruwach ri Saulo y xtzuꞌn tanchik. Tekꞌuchiriꞌ, xyaktajik y xukꞌul ri bautismo.

¹⁹Ekꞌuchiriꞌ xwaꞌ ri Saulo, xkꞌojiꞌ tanchi uchuqꞌabꞌ y xkꞌojiꞌ jujun qꞌij kukꞌ ri kikojom rubꞌiꞌ ri Cristo chilaꞌ pa ri tinamit Damasco.