1Kũ ò zɛ̀o ò da Itali zɛ́n, akũ ò Pↄlu kũ purusuna kpara kenↄ nà soza bàde kũ òdi pinɛ Yuliunɛ a ↄĩ. À de soza gã̀ kũ òdi pi Siza sozanↄ don'arɛdenↄ do ũ.
2O gɛ̃ gó'itɛ kũ à bò Adaramitiumu gũn, àtɛn bↄtɛ kũ Asia bùsu wɛ̃tɛnↄ, akũ o da zɛ́n. Masedonia bùsu gbɛ̃ Arisitaku Tɛsalonika kú kũoo.
3Kũ gu dↄ̀ o ka Sidↄ̃. Yuliu Pↄlu kũna kũ nɛ̀sɛdoo, akũ à a gbà zɛ́ à gɛ́ a gbɛ̃nↄ gwa, de ò kpái.
4Kũ o bo gwe, o ka í dagura. Kũ ĩa tɛn daólɛ yãi, akũ o do Sipiru bùsuui kpɛ kpa.
5Táa'ona ísira dagura o do Silisia kũ Pamfilia bùsunↄi, akũ o ka Mira, Lisia bùsun.
6Gwen soza bàde pì Alɛsandaria gó'itɛ kũ àtɛn gɛ́ Itali lèn, akũ à ó kán.
7Gↄrↄ kenↄ gũn ó tá bùsa. O ↄsi kà ari o ka Sinidu lɛ́a. Kũ ĩa dí wewɛrɛ ò gɛ́ súsuro, o pãnɛ o bo Kɛrɛti bùsu kpɛ kpa Salamↄnɛ sarɛ.
8Ɔsikanaa gũn ótɛn pã Kɛrɛtinɛ, akũ o ka gu kũ òdi pi Gódↄki Manan. A kãni kũ wɛ̃tɛ kũ òdi pi Laseao.
9Lákũ o gìi kɛ̀ zɛ́n nà, ó gɛna arɛ gↄ̃̀ kari yã ũ, zaakũ Yudanↄ lɛ́yĩgↄrↄ gɛ̃̀ kↄ̀. A yã mɛ́ à tò Pↄlu lɛ́ dàḿma
10à pì: Gbɛ̃nↄ, ma è tá dí ni su kũ ásaru zↄ̃kↄ̃ↄo kũ kisirao. Adi kɛ gó pì kũ a asonↄ adonlo, kũ ókↄ̃nↄmɛ se.
11Ama soza bàde gódↄdↄri kũ gódeo yã sì de Pↄlu pↄ́la.
12Gu pì mana ò gó dↄn ò bunsirɛ blenlo, akũ gbɛ̃nↄ zɛ̀ dasi kũ ò ɛra ò da zɛ́n ò tá. Ò ye ò ká Fenisi, wɛ̃tɛ kũ à kú Kɛrɛti ifãlɛtɛ kpa, tó ani sí kɛ ò bunsirɛ ble gwe.
13Kũ ĩa busɛ fùtɛ gɛ̀nↄmidↄki kpa, òtɛn da ò fↄ̃ ò ń pↄyeina kɛmɛ. Akũ ò ń gó pòro ò dà zɛ́n òtɛn pã Kɛrɛtinɛ kãnikãni.
14Adi gì kɛro zàga'ĩa gbãna kũ òdi pi ĩa pãsĩ bò Kɛrɛti kpi kpa.
15À gó lìtɛ, ódi fↄ̃ ò arɛ dↄa doro, akũ o gↄ̃ tɛ́i.
16Kũ à ó kpá luan fítinna kũ òdi pi Kodai, à kɛ̀wá sã̀na fíti. Ɔsikanaa gũn o ó gó fítinna surababↄↄ lè o kũ̀ gwe.
17Kũ ò sɛ̀ ò gɛ̃̀o gó zↄ̃kↄ̃ↄ gũn, akũ ò kɛ̀kɛ ò bàa dↄ̀ gó zↄ̃kↄ̃ↄ pìia. Kũ òtɛn vĩna kɛ Libia bùsu í sàrara gɛ̃nanɛ yãi, akũ ò gó kúra gbàrɛ ín ò gↄ̃̀ tɛ́ ĩai.
18Kũ gu dↄ̀, lákũ zàga'ĩa kpɛ́ àtɛni ó gó yĩpayĩpa gbãngbãn nà, akũ ò nà asonↄ zuzunaaa í gũn.
19A gↄrↄ aakↄ̃de zĩ ò ń gó zĩkɛbↄnↄ bↄ̀tɛ ò kↄ̀tɛ ń zĩda.
20À kà gↄrↄ ũgbangba ifãntɛ̃ kũ susunɛnↄ dí boro, ĩa pãsĩ pìi kũ legũo dí kpátɛro. Surabana tãmaa kũ ó vĩ yã làkawá pínki.
21O gↄrↄ pla kɛ̀ ódi le o pↄ́ blèro, akũ Pↄlu fùtɛ à pìńnɛ: Gbɛ̃nↄ, tó a ma yã màmɛ yã, de ódi futɛ Kɛrɛti, kisira kũ ásaru dínↄ gbasa à ó léro.
22Ari tera matɛn lɛ́ daáwa à laakari kpátɛ! Á gbɛ̃ke ni garo, sé gó pìi yaka.
23Gĩa gwãani Luda kũ má de a pↄ́ ũ matɛn doi malaika bò à sùma
24à pì: Ǹsun vĩna kɛro, Pↄlu. Séde ǹ Siza arɛ le. Luda gbɛ̃ kũ ò kú kũńwo gó gũnnↄ bònnɛ aafia ń pínki.
25A yã mɛ́ à tò gbɛ̃nↄ, à laakari kpátɛ! Má Luda náani vĩ kũ ani kɛ lákũ à òmɛnɛ nà.
26Séde ò ká luan ke í sàraran.
27A gↄrↄ gɛ̃ro donsaride zĩ gwãani ĩa pãsĩ pì tɛni ó gátɛ Adariatiki íla ari tera. Akũ lizãndo gó gbɛ̃nↄ tɛn da o ka kãni kũ í baraomɛ.
28Akũ ò bà ílↄgwabↄↄ gbàrɛ ín, ò è gã̀sãkuru basiikↄ̃. Kũ à kɛ̀ saa fíti ò gbàrɛ dↄ, ò lè a lòkotoo kà gã̀sãkuru baaakↄ̃.
29Òtɛn kpana gbɛ̀la vĩna kɛ, akũ ò kúra mɛ̀n siikↄ̃ gbàrɛ gó pↄ̀rↄ kpɛ, akũ òtɛn adua kɛ de gu dↄḿma.
30Gó gbɛ̃nↄ tɛn zɛ́ wɛtɛ ò bↄtɛ gó gũn ò bàa lɛ́, akũ òtɛn gó surababↄↄ pìi kipa ò da íla, òtɛn kɛ lákũ ò ye ò kúranↄ gbarɛ gó arɛ bà.
31Akũ Pↄlu pì soza bàdenɛ kũ a bàsaridenↄ: Tó gbɛ̃ birenↄ dí gↄ̃ gó gũnlo, áni fↄ̃ à boro.
32Akũ sozanↄ gó surababↄↄ bànↄ zↄ̃̀zↄ̃ ò tò à lɛ̀tɛ ín.
33Kũ gu ye à dↄ, Pↄlu kútɛ kɛ̀ńnɛ ń pínki ò pↄ́ ble à pì: A gↄrↄ gɛ̃ro donsarin gbãra a gↄ̃ lokona pↄ́ble sari.
34Matɛn kútɛ kɛárɛ à pↄ́ ble de à gbãna le à bo aafia. Bee á mìkã mɛ̀n do ni lɛ́tɛro.
35Pↄlu yã bire onaa gbɛra à burodii sɛ̀ à Luda sáabu kpà gbɛ̃ sĩnda pínki wára, akũ à ɛ̀ àtɛn só.
36Ń gbɛ̃ sĩnda pínki laakarii kpàtɛ, akũ ò pↄ́ blè sà.
37Ókↄ̃nↄ kũ ó kú gó gũnnↄ ó pínki o ka gbɛ̃nↄn wàa do kpɛ́ baaakↄ̃ akuri awɛɛsuddo.
38Kũ ò pↄ́ blè ò kã̀, ò pↄ́blewɛ bↄ̀tɛ ò kà ín, de gó le à kɛ futa yãi.
39Kũ gu dↄ̀, ò sĩ̀sĩaa lè odi dↄ̃ro. Kũ ò luankore è kũ bùsu'atɛ̃ sàraao, akũ ò zɛ̀o ò gɛ́ kũ góo í sàraran gwe, tó oni fↄ̃.
40Ò kúranↄ pòro ò dà í gũn, akũ ò báli gódↄdↄbↄnↄ bàa pòro gↄ̃̀nↄ. Ò gó arɛ biza pòro ĩanɛ, akũ ò mìi pɛ̀ gu sàraa pìia.
41Akũ ò sì bùsu'atɛ̃n dↄ̃naa sari, akũ gó zɛ̀ gwe. Bùsu'atɛ̃ pì gó arɛ kũ̀ gíngin adi fↄ̃ à yĩgãro, akũ ísↄ̃kɛna kũ àtɛn káka kũ gbãnao tɛn gó pↄ̀rↄ kpɛ yaka.
42Sozanↄ zɛ̀o ò purusunanↄ dɛdɛ, de ń gbɛ̃ke sún í kpá ò pitiḿmaro yãi.
43Ama soza bàde ye à Pↄlu mì sí, akũ à gìńnɛ ò ń pↄyeina kɛ. À pì íkparinↄ dońnɛ arɛ ò kusi ía ò bikũ,
44gbɛ̃ kparanↄ gↄ̃ tɛ́ ń kpɛ lí lɛ̀kɛtɛnↄ ke gó kasonↄ musu. Lɛn gbɛ̃ sĩnda pínki í bara lè aafia lɛ.
