1Pↄlu kà Dɛbi kũ Lisitirao. Gwen Yesude ke kun a tↄ́n Timↄti. A da bi Yuda Yesudemɛ, a de sↄ̃ bi Girikimɛ.
2A tↄ́ nna Yesude kũ ò kú Lisitira kũ Ikↄniuonↄ kĩnaa.
3Pↄlu ye à gɛ́ kãao, akũ a tↄ̃̀ↄ zↄ̃̀nɛ Yuda kũ ò kú wɛ̃tɛ pìnↄ gũnnↄ yãi, zaakũ ń pínki dↄ̃ kũ a de bi Girikimɛ.
4Wɛ̃tɛ kũ ò gɛ̀ɛn pínki, ò yã kũ zĩ̀rinↄ kũ gbɛ̃ zↄ̃kↄ̃nↄ dìtɛ Yurusalɛmu ò sↄsi gbɛ̃nↄnɛ ògↄ̃ kũna.
5Akũ òtɛn gbãna kũ ń ludanaanikɛnaa gũn òtɛn dasi kũ lákũ gu dìgↄ̃ dↄ nà.
6Luda Nini gìńnɛ ò gɛ́ Luda yã o Asia bùsun, akũ ò gɛ̃̀tɛ Firigia kũ Galatia bùsunↄola.
7Kũ ò kà Misia bùsu lɛ́n, ò ye ò gɛ̃ Bitinia bùsun, akũ Yesu Nini dí weńnɛro.
8Kũ ò gɛ̃̀tɛ Misia bùsula, akũ ò kà Toroasi.
9Gwãani Pↄlu Masedonia bùsu gbɛ̃ke è zɛna wɛ́gupu'enaa gũn, àtɛn kútɛ kɛnɛ à pì: Ǹ bikũ ǹ su ó kĩnaa Masedonia ǹ kpawái.
10Kũ à wɛ́gupu è lɛ, akũ o Masedonia soru kɛ̀ gↄ̃̀nↄ, zaakũ o dↄ̃̀ sà kũ Luda mɛ́ àtɛni ó sísi ò gɛ́ baaru nna kpáńnɛ.
11Akũ o gɛ̃ gó'itɛn Toroasi o mìi pɛ̀ Samↄtarasia. Kũ gu dↄ̀ o ka Nɛapↄli.
12Bona gwe o gɛ Filipi. Àkũmɛ Masedonia bùsu kpado pì wɛ́ra ũ, kũ Romudenↄn vĩ. Akũ o gↄrↄ pla kɛ̀ wɛ̃tɛ pìi gũn.
13Kámmabogↄrↄ zĩ o bo wɛ̃tɛ kpɛ o gɛ swa sarɛ, gu kũ o mà aduakɛki kunwa. Akũ o vutɛ o yã ò nↄgbɛ̃ kũ ò kakarana gwenↄnɛ.
14Nↄgbɛ̃ ke kú gwe òdi pinɛ Lidia. Tiatira gbɛ̃mɛ, biza wɛ́ tɛ̃ra búgu yìariimɛ, akũsↄ̃ Luda donyĩriimɛ. Àtɛn yã kũ Pↄlu tɛn o ma, akũ Dikiri a swɛ̃̀ɛ wɛ̃̀nɛ à yã pìi sì.
15À da'itɛ kɛ̀ kũ a bɛdenↄ, akũ à wɛ́ kɛ̀wá à pì: Tó a ma Dikiri náanikɛnaa sì, à mↄ́ à kipa ma bɛa. Akũ o a yãze è.
16Zĩkea kũ ótɛn gɛ́ aduakɛkia, o dakarɛ kũ zↄ̀nↄgbɛ̃ kũ à mlɛ̃̀ tãna vĩo. A dikirinↄ dì ↄgↄ le manamana a ziayã'onnɛnaa musu.
17Akũ à bò à tɛ́wái, ókↄ̃nↄ kũ Pↄluo, àtɛn wiki lɛ́ à pì: Gbɛ̃ dínↄ bi Luda Musude zↄ̀blerinↄmɛ, òtɛn surabana zɛ́ kpàkpa kɛárɛ.
18Àdigↄ̃ kɛ lɛ lán gu dìgↄ̃ dↄ nà, akũ Pↄlu kpàsa kãao. À lìtɛ à pì tãna pìinɛ: Ma ònnɛ kũ Yesu Kirisi tↄ́o ǹ goa. Akũ à gòa gↄ̃̀nↄ.
19Kũ a dikirinↄ dↄ̃ ń àrelena a yã musu wɛ́dↄinaa làka, akũ ò Pↄlu kũ Silasioo kũ̀ ò ń gátɛ ò gɛ̀ɛ kũńwo gbãnadenↄ kĩnaa ɛtɛ gũn.
20Ò gɛ̀ɛ kũńwo yãkpatɛkɛrinↄ kĩnaa ò pì: Gbɛ̃ dínↄ bi Yudanↄmɛ, òtɛni ó wɛ̃tɛ yakawɛrɛ.
21Futɛokarayã kũ ókↄ̃nↄ Romudenↄ doka gìi ò sí ke ò kɛn òtɛn dańnɛ.
22Pari fùtɛńyĩ, akũ yãkpatɛkɛri pìnↄ pì ò ń pↄ́nↄ boḿma ò ń lɛ́lɛ gòoo.
23Kũ ò gbɛ̃na mana kɛ̀ńnɛ, akũ ò ń dá kpɛ́siran ò pì kpɛ́ pìi dãkpãriinɛ à ń dãkpã manamana.
24Kũ ò ònɛ lɛ, akũ à ń dá kpɛ́ tú à ń gbánↄ yĩ̀ lía gíngin.
25Lizãndo gũn Pↄlu kũ Silasio tɛn adua kɛ òtɛn lɛ̀ sí Ludanɛ, gbɛ̃ kparanↄ tɛn sã kpá ń yãi.
26Kãnto zĩtɛ yĩ̀gãyĩgã kũ gbãnao ari kpɛ́ pìi gbĩ̀nↄ kɛ̀ gìri. Gwe gↄ̃̀nↄ a gbànↄ wɛ̃̀wɛ̃ pínki, akũ purusunanↄ mↄ̀kakↄ̃ananↄ bↄ̀tɛḿma pínki.
27Kũ kpɛ́ dãkpãrii pìi vù, à gbànↄ è wɛ̃wɛ̃na pínki, akũ à a fɛ̃nɛda wòto à ye à a zĩda dɛ, zaakũ àtɛn da purusunanↄ bàa sìmɛ.
28Akũ Pↄlu pũ̀tã kũ kòto gbãnao à pì: Ǹsun n zĩda kari boro. Ó kú la ó pínki.
29Kpɛ́ dãkpãrii pìi pì ò mↄ́ fitilaao, akũ à sì ń tɛ́ kũ bàao à kùtɛ Pↄlu kũ Silasio arɛ àtɛn lukaluka.
30À bò kũńwo bàai, akũ à pì: Marenↄ, deran mani kɛ mà surabana lee?
31Ò pìnɛ: Ǹ Dikiri Yesu náani kɛ ĩni surabana le, mↄkↄ̃n kũ n bedenↄ á pínki.
32Akũ ò Dikiri yã ònɛ kũ a bedenↄ ń pínki.
33Lizãndo kũ̀a kpɛ́ dãkpãrii pì ń sɛ́ à gɛ̀ɛ à ń bↄ̀nↄ pìpińnɛ, akũ à da'itɛ kɛ̀ gↄ̃̀nↄ kũ a gbɛ̃nↄ ń pínki.
34Akũ à gɛ̃̀ kũńwo a bɛa à pↄ́ble kɛ̀ńnɛ. Àpii kũ a bedenↄ, ń pↄ kɛ̀ nna manamana kũ ò Luda náani kɛ̀ yãi.
35Kũ gu dↄ̀, yãkpatɛkɛrinↄ dogarinↄ zĩ̀ ò gɛ́ onɛ à gbɛ̃ pìnↄ gbarɛ.
36Akũ kpɛ́ dãkpãrii pìi pì Pↄlunɛ: Yãkpatɛkɛrinↄ gbɛ̃nↄ zĩ̀ma de mà á gbarɛ. À bↄtɛ à tá aafia.
37Akũ Pↄlu pì dogarii pìnↄnɛ: Ò ó gbɛ̃ gbɛ̃nↄ wára yãkpatɛkɛna kũoo sari ò ó dá kpɛ́siran, ókↄ̃nↄ kũ Romudenↄn ó ũ. Tera sà ò ye ò ó bↄtɛ asiri gũn yá? O'o! Oi! Séde ò su ò ó bↄtɛ ń zĩda.
38Dogarii pìnↄ yã pì gbã̀ yãkpatɛkɛrinↄnɛ. Kũ ò mà Romudenↄmɛ ń ũ, akũ vĩna ń kũ.
39Akũ ò sù ò kútɛ kɛ̀ńnɛ ò ń bↄ́tɛ kpɛ́siran, akũ ò wɛ́ kɛ̀ḿma ò bońnɛ ń wɛ̃tɛ gũn.
40Kũ ò bↄ̀tɛ kpɛ́siran, ò gɛ̀ɛ Lidia bɛa. Ò Yesudenↄ lè gwe, akũ ò ń nɛ̀sɛ yĩda kũńnɛ ò dà zɛ́n.
