Yɛbəc 9:1-19

¹Tɛm tatɔkɔ Sol pəc-beŋəsnɛ kədifət acɛpsɛ a Wəbɛ Yesu darəŋ, k’ɔŋkɔ ndena wəloŋnɛ wəpɔŋ wəka kəlɔ kəpɔŋ ka Kanu.

²Kɔ Sol ewer wəloŋnɛ wəpɔŋ reka teta wɔlɔ wa dəkətola Kanu da aSuyif nde Damas, ntɛ tɔŋsɔŋɛ k’ɛmbəp di akin akin-ɛ, pəyɔnɛ arkun pəyɔnɛ aran aŋɛ ŋaŋcəmɛ dɔpɔ da Yesu darəŋ mɔ, pətam kəsumpər ŋa pəkekərɛ Yerusalɛm.

³Dɔpɔ Sol ɛnayi pəc-lɔtərnɛ dare da Damas, gbəŋcana babɔkɔ kɔ pəmot pɛyɛfɛ dəkɔm, kɔ pɔsɔŋ pəwaŋkəra mpɛ pɛnakɛl kɔ mɔ.

⁴K’ɛntɛmpɛnɛ dəntɔf. K’ene dim ndɛ dɛnayif kɔ: «Sol! Sol! T’ ake tɔ məntɔrəs em-ɛ?»

⁵Kɔ Sol eyif kɔ, «Wəbɛ, məna an’ ɔfɔ-ɛ?» «Ina, Yesu iyɔnɛ, nwɛ məyi kətɔrəs mɔ.

⁶Mba məyɛfɛ, məbɛrɛ dare, aŋkɔ-lok’ əm tɔkɔ pəmar məyɔ mɔ.»

⁷Kɔ arkun aŋɛ ŋanasol kɔ nkɔn Sol mɔ ŋaŋcəmɛ, ta ŋantam kəlok-loku-ɛ kənesɛ disrɛ, ŋac-ne dim mba ta ŋaŋnəŋk fum-ɛ.

⁸Kɔ Sol ɛyɛfɛ dəntɔf pəmepi fɔr, mba ta ɛŋnəŋk paka o paka-ɛ. K’asumpər kɔ kəca, k’ambɛrsɛnɛ kɔ dare da Damas.

⁹K’eyi di mata maas ta ɛŋnəŋk-ɛ, ɔfɔdi peri, ɔfɔmun.

¹⁰Dəndo dare da Damas wəcɛpsɛ wəka Wəbɛ Yesu darəŋ wəlɔma ɛnayi di pac-we kɔ Ananiyas. Kɔ Wəbɛ oloku kɔ kənəŋk disrɛ: «Ananiyas!» K’owosɛ: «Iyi nnɔ, Wəbɛ!»

¹¹Kɔ Wəbɛ Yesu oloku kɔ: «Məkɔ dɔpɔ dɔkɔ aŋwe ‹Dolompu› mɔ, məkɔ mətɛn nde kəlɔ ka Yudas fum wəkɔ aŋwe Sol mɔ, wəka dare da Tarəs ɔyɔnɛ. Bawo ontola Kanu,

¹²kɔ Kanu kənamentər kɔ kənəŋk disrɛ fum nwɛ aŋwe Ananiyas mɔ pəbɛrər kɔ. K’endeŋər Sol waca, ntɛ tɔŋsɔŋɛ kɔ sɔ kənəŋk mɔ.»

¹³Mba Ananiyas oluksɛ: «Wəbɛ, inenɛ afum alarəm ŋac-lɔm pəlɛc mpɛ fum wəkakɔ ɔyɔ afum am acempi nde Yerusalɛm mɔ.

¹⁴Nnɔ kəfo kaŋkɛ yati kɔ aloŋnɛ apɔŋ aSuyif ŋanawurɛ Sol a pədesumpər nwɛ o nwɛ omboŋc tewe tam mɔ.»

¹⁵Mba kɔ Wəbɛ oloku Ananiyas: «Məkɔ! Bawo fum wəkakɔ paka pɔ mpɛ inayɛk-yɛk kəkɔtɛnɛ tewe tem nnɔ abɛ a tɔf ya doru kɔ aka Yisrayel fɔr kiriŋ mɔ.

¹⁶Ina yati in’ endementər Sol pəcuy fəp pɔkɔ pəmar pədecepərɛnɛ teta tewe tem mɔ.»

¹⁷Kɔ Ananiyas ɔŋkɔ. Ntɛ ɛmbəp kəlɔ kaŋkɔ mɔ, k’ɛmbɛrɛ, k’endeŋər Sol waca. K’oloku: «Sol Wɛŋc im, Wəbɛ Yesu, nwɛ ɛnawurər əm nde dɔpɔ ndɛ mənasolnɛ məc-der Damas mɔ, osom im ntɛ tɔŋsɔŋ’ am sɔ kənəŋk, a məlarɛ sɔ Amera Ŋecempi ŋa Kanu mɔ.»

¹⁸Gbəŋcana babɔkɔ, kɔ ca yoŋkoŋɛ kɔ dəfɔr pəmɔ wokwok, kɔ fɔr yɔn yɛntam sɔ kəc-nəŋk. Kɔ Sol ɛyɛfɛ, k’ɔsɔtɔ kəgbət dəromun teta Kanu.

¹⁹Ntɛ elip kədi yeri mɔ, k’ɔsɔtɔ sɔ fənɔntər. Kɔ Sol eŋcepərɛnɛ mataka mɔlɔma kɔ acɛpsɛ a Wəbɛ Yesu akɔ ŋanayi dare da Damas mɔ.