waRoma 10:1-16

¹Wanduzangu, vinajibu pakulu mmoyo mwangu na niwanlebelela ka Mwenyezimungu Mayahudi wavushiwe.

²Omi niwa shahidi kuhusu ewo kuwa wanawo hamu pakulu na Mwenyezimungu, fala noyo hamu‑yo airi nkati ya kumwijiwa.

³Kamana awejiwa ukamilifu ulawa ka Mwenyezimungu, ila wasakula kubainisha ukamilifu wawo wanyewe. Kwa javyo, awasaka kupokerera ukamilifu wakulawa ka Mwenyezimungu.

⁴Kamana Almasihi ndi kusudi ya shariya, impa ukamilifu kila mwenyé kumwamini.

⁵Musa kandika kuhusu ukamilifu ulawa julu ya kufulata shariya. Kaamba javi: “Mwenyé kufulata ámuri za shariya, áinshi julu yake.”

⁶Fala ukamilifu julu ya kumwamini Mwenyezimungu ukwamba: “Usambe mmoyo mwako: ‘Asáka kukwera mbinguni nani?’ ” Kwamba javyo, Almasihi umwisusa.

⁷“Wala: ‘Asáka kwisukira mahala ka wafwi nani?’ ” Konta eco Almasihi kunlamusa ka wafwi.

⁸Musa kankwamba kinani? Iye akwamba javi: “Usemi uwa karibu yako, nkanywa mwako na mmoyo mwako.” (Mana ake ndi usemi watitangaza, kuwa tijuzi timwamini Mwenyezimungu.)

⁹Kamana ukisowera na kanywa yako kuwa Insa ndi Mwenye, na ukamini mmoyo mwako kuwa Mwenyezimungu kanfufula nkifo, ukuja kuvushiwa.

¹⁰Kamana mmoyo munu akamini, apata kwakikishiwa. Julu ya kusema na kanywa yake, apata kuvushiwa.

¹¹Konta Mandiko akwamba javi: “Munu asáka kuwa onse akimwamini Mwenyezimungu, aimpata aibu.”

¹²Akupo kusiyana nkati ya Mayahudi na Sawari-Mayahudi. Mwenye mmoja ndi Mwenye wa wanu piya, na iye ndi mwenyé utajiri ka piya wenye kunlebela.

¹³Kamana “Munu asaka kuwa onse anlébela Mwenye akuja kuvushiwa.”

¹⁴Fala wanu wanlebelaja sawanamba kumwamini? Na wamwaminija sawanasikira akitamburiwa? Na wasikiraja sawerepo munu wakuwereza Habari Ngema?

¹⁵Na wanu wokaja kwereza sawaperekiwe? Kamba vyandikiwe Mandiko Matakatifu: “Namuna vyasitawire maulu a ware wapita wakereza Habari Ngema.”

¹⁶Fala siyo kuwa Mayahudi piya wafulata Habari Ngema. Kamana Izaya kasema javi: “Mola, amíni habari zetu nani?”