Rom kimbi 10:1-16

¹O urumeleŋ alaurupni, nöŋön nani könagesöurupnan uruŋini meleŋmegöra awöweŋgömakzal. Anutunöŋ amöt qem eŋgimapköra uruni qezaköba yeŋgöra aka Anutu köuluköm waŋgimakzal.

²Yeŋgö könaŋamŋinan kewö ahöza: Yeŋön Anutugöra urukönöp ahakzemö, mi gukmaulem qakŋe ahakze. Yeŋgö keuŋini mewö naŋgöba jizal.

³Anutunöŋ keunini jim teköiga solanizini, miaŋgö könaŋi qahö möt yaköba nanŋinanök esapköba solanŋi akingö kapaŋ kölakze. Mewö aka Anutunöŋ keunini jim teköiga solanibingö jimakzawi, keu miaŋgö bapŋe qahö anda qaköba öne laŋ malje.

⁴Kraistnöŋ nanŋök Köna keu wuataŋgöm teköyök. Nini tosatŋan mi osiba Kraist möt nariba urunini meleŋjini, mewö mönö Kraistköra aka Anutugö jeŋe solaniba dop köljin. Mewö.

⁵Mosesnöŋ Köna keu wuataŋgöba mewö miaŋön solanŋi akingö keuŋi mi kewö ohoi ahöza, “Köna keu wuataŋgöm tekömawaŋön mönö miaŋgöra aka mal köhöima.”

⁶Keu mewö ahözapmö, urunini meleŋda möt nariinga Anutunöŋ keunini jim teköiga solanimakzini, Mosesnöŋ miaŋgöra keu kewö jii ahöza, “Urugan kewö mötmöriba jibanbuk: Azi daŋön mönö Suep mire öŋgöbawak?” Ambazipnöŋ mi Kraist waŋgita etmapköra laŋ jiget.

⁷me “Azi daŋön mönö kömup mirigö dutŋe gebawak?” Ambazipnöŋ mi Kraist waŋgita kömupnöhök wahötmapköra laŋ jiget.

⁸Mewö jiba toroqeba kewö jiyök, “Buŋa keu mi köröwen qahöpmö, mönö göhö numbuge aka uruge ahöza.” Buŋa keu mi möt naribingöra aka ahöza. Neŋön keu miaŋön ambazip uru kuŋgum eŋgiba kewö jim asarim eŋgimakzin:

⁹Anutunöŋ Jisös mem gulii kömupnöhök wahörök. Göŋön keu mi urugan möt nariba numbu jitkan “Jisösnöŋ Kembuni akza,” mewö jim miwikŋaizan ewö, mönö amöt qem gihiiga letotman.

¹⁰Gi urugan Buŋa keu möt narinöŋga Anutunöŋ keugi jim teköiga solaniman aka numbu jitkan Jisös jim miwikŋainöŋga amöt qem gihiiga letotman.

¹¹Buŋa Kimbigö keu kun kewö jiget ahöza, “Daŋön i möt narim waŋgimawi, yaŋön mönö gamu qahö miwikŋaima.”

¹²Anutunöŋ Juda ambazip qahö neŋgek soriba kantri tosatŋi qahö qepureim eŋgimakza. Kembu mohot yaŋön mönö körek neŋgö Kembunini aka dop mohotnöŋ kewöt neŋgimakza. Ambazip i qeta köulukömakzini, yaŋön mönö kötumötuetŋi nini körek keleŋ-maleleŋ neŋgimakza.

¹³Miaŋgö keuŋi mi Buŋa Kimbinöŋ kewö ahöza, “Ambazip denike yeŋön Kembugö qetŋi qeta köulukömei, yaŋön mönö i körek amöt qem eŋgiiga letotme.”

¹⁴Ambazipnöŋ Kembu qahö möt narim waŋgiba yaŋgö qetŋi mönö denöwö qeta köuluköbeak? Yaŋgö könaŋi qahö jiget mötkeri, i mönö denöwö möt narim waŋgibeak? Kunŋan Buŋa keu qahö jim asarima ewö, yeŋön mi mönö denöwö mötpeak?

¹⁵Ambazip kun Buŋa keugöra qahö melaibin ewö, yaŋön mönö denöwö anda mi jim asaribawak? Miaŋgö keuŋi Buŋa Kimbinöŋ kewö ohoget ahöza, “Ambazip Buŋa keu ölöpŋi memba kamakzei, yeŋgö köna ötöŋini möringa qetpuk sorokŋi akza.”

¹⁶Mewö ohoget ahözapmö, nöŋgö Israel könagesö ölŋi yeŋön Ölöwak Buŋa qahö tem köla malje. Miaŋgö keuŋi mi kezapqetok azi Aisaianöŋ kewö jii ahöza, “O Kembu, nini Buŋa keu jim sehiinga daŋön mönö uruŋi meleŋda mi möt naribawakto?”