Rome 10:1-16

¹Ghau rana taluutuni, inau tu ghanaghana oli ngangata ta nigua na kokoeliulivuti vania God, ge gaia ke vavolara rana vure ni Jew.

²Inau tu ghilala didira na ghanaghana mava vania God, hauva me mua maemane didira na manaha.

³Ma gaira tara mua ghanaghana kalea na puku ni halautuna God ge ke talu maemanera na lei tinoni tana matana. Hauva mara tabe ngasilia ge kara lutu maemane itatana God nia na taoniana nina vetena Moses, keri ge ra mua taonia na halautuna God.

⁴Christ te taonighi tua na lei vetena udolu. Mi taeni gaia na halautu vaolu ge rahei kara taluutunia, Christ ke va talu maemanera tana matana God.

⁵Tana bona Moses te gerea eni te vagha na halautu na lei tinoni te va maemane tana matana God, me bosaa ilokana na Gegere Tabu, Ke vagha tau liona ge kau holaa na vola kasila, kau taonighi mughua na lei vetena udolu God te vaheghita.

⁶Hauva na hava na Gegere Tabu te talutatea na nilabu ge ka maemanea na pukuna ta taluutunia Christ te dutuvighita, te vagha eni, Kau bei nongia tana ghanaghanamiu, “?Ahei ke dato ikokou?” (Na pukuna taho siki sakai ke dato ge ke lavi horua mai Christ ge ke va maemaneghita.)

⁷Me ghoi ghaghua, Bei nongia te vagha, “?Ahei ke horu tana komudira na lei tinoni mate?” (na pukuna taho siki sakai ke ghoi volaolia Christ.)

⁸Na halautu vanighita ge ka maemane itatana God nia na taluutuniana Christ ke, te mua vahola ge ka sodoa. Te vagha na Gegere Tabu te ghaghua, Mana rongorongo te dutuvighita tua, me ghaha tana ghidumiu mi tana tobamiu. Aeni gaia na rongorongo tai tughunitatea.

⁹Ma ge ko tughuniladai nia na mangamu gaia Jesus te Lord, mo ko taluutunia tana tobamu ge ke tughuruvaghinia tana mate, ge God ke volagho.

¹⁰Tana bona to taluutuni tana tobamu ke, God ke va talu maemanegho tua tana matana. Mi tana bona ko tughunitatea mughua tana mangamu, ge God ke volagho.

¹¹Te vagha na Gegere Tabu te bosaa, Arahei kara taluutunia kara mua nia maa.

¹²Na vure ni Jew mana vure tara mua Jew tara sakai na vata vamua ta God. Gaira udolu tara loghoa a sakai na Lord vamua, ma gaia te vautora rahei tara nongia ge ke hangara.

¹³Te vagha na Gegere Tabu te bosaa, Rahei kara holoa na ahana Lord, God ke volara.

¹⁴?Mi vei kara nea na holoana ge ke vavolara ke vagha kara mua taluutunia? ?Mi vei kara nea na taluutuniana ge ta kara mua rongovia mua nina rongorongo? ?Mi vei kara nea na rongoviana ge te ke taho ahei ke tughunitatea vanira?

¹⁵?Mi vei ke ghaghua siki sakai ge ke tona me ke tughunitatea vanira ke vagha God ke mua nira vetena? Aeni na Gegere Tabu te bosa, Te uto ngangata ge ka righira rahei tara mai, tughunitatea na rongorongo uto

¹⁶Ma mua rana Jew udolu tara lavipangotia na rongorongo uto, te vagha Isaiah na prophet te bosa me ghaghua, ?Lord, ahei tua te taluutunia nimami na rongorongo?