Tukpɔɠaaleʋe Nuiti 1:19-34

¹⁹Ɠɔoɠɔ GALAGI ɓɔɠɔi ɠɛni ti ʋa, naa ɠa é kɛɛni Zuda nuiti ti zoo, ti gize yooi zo. Kɛlɛ ti la ɠɛni zooni, ti ʋa pɛtugi zu nuiti kpɛ, mazɔlɔɔ naati, kɔɔɠɔ wotoloiti ti ɠɛni naati zea, nii é ga kɔlu geleiti.

²⁰Kalɛɓe Ɠeeɓelɔn zɔlɔɔni, eɠɛʋelei Moize ma levei veeni la. É Anake mavofoda saʋagɔiti kpɛɛni ná.

²¹Ɓɛnzamɛn mavofodai la ɠɛni Yeeɓuse nuiti kpɛɛni, niiti ti ɠɛni zeini Zeeluzalɛme, naati ta dɛ zeini Zeeluzalɛme zaaɠaza, ta Ɓɛnzamɛn mavofodai.

²²Zozɛfe mavofodai ɓalaa liini, é laalɛ Ɓeetɛle wu, Ɠɔoɠɔ GALAGI ɠɛni ti ʋa.

²³Ti nuiti teʋeni ga ti Ɓeetɛle taai ʋɛtɛ, nii mɔungi daaseigi ɠɛni ga Luze.

²⁴Keelaiti ti zunu ɠila kaani, é ɗa ɠula taazuʋɛ, ti ɠɛni ma: «Pele lɛ ga giye, ʋɛ gá lɔ ná taazuʋɛ, gá faanɛɛ ɠɛ è ʋɛ.»

²⁵Pelei ta lɛɛ la taazuʋɛ, é naa lɛɛni ga tiye. Ti taa nuiti kpein paani, kɛlɛ ti zunui naa ta ná-pɛlɛyeɠei yɛni ná, naati ti li.

²⁶Zunui naa liini Ɠɛte nuiti ta-yooi zu, é taai loni ná, é daasei pɛɛni ga Luze, daaseigi naa ɠa é ba zaaɠaza.

²⁷Manasee nuiti ti la ɠɛni Ɓɛte-Seyan nuiti kpɛɛni, ta Taanake nuiti, ta Dɔɔl nuiti, ta Yiɓeleyame nuiti, ta Megido nuiti, ta ti-ʋaalobaiti kpein. Kanaan nui naati ti yɛni zeini ma yooi zu.

²⁸Siɛgi zu Izelayɛle nuiti sɛbɛi wɔɔlɔni la, ti ɠɛni boti ɓaagi veezu ti ya, ti ɗa kɛ, kɛlɛ ti la ɠɛni ti ɓɛɛni.

²⁹Efelayime nuiti ti la ɠɛni Kanaan nuiti kpɛɛni, niiti ti ɠɛni zeini Geezɛɛl, naati ti yɛni zeini Efelayime nuiti saama.

³⁰Zaɓulɔn nuiti ti la ɠɛni zooni ti ʋa Kitelon nuiti kpɛ, ta Naɠalɔle nuiti. Kanaan nui naati ti yɛni zeini Zaɓulɔn nuiti saama, kɛlɛ naati ti ɠɛni boti ɓaagi veezu ti ya, ti ɗa kɛ.

³¹Asɛɛl nuiti ti la ɠɛni Ako nuiti kpɛɛni, ta Sidɔn nuiti, ta Aalaɓe nuiti, ta Akeziɓe nuiti, ta Ɠɛleɓa nuiti, ta Afike nuiti, ta Leɠɔɓe nuiti.

³²Asɛɛl mavofodaiti ti zeini Kanaan nui naati saama, niiti ti ɠɛni zeini zooi naa zu, mazɔlɔɔ ti la ɠɛni ti ɓɛɛni.

³³Nɛfetali nuiti ti la ɠɛni Ɓɛte-Seemɛse nuiti kpɛɛni, ta Ɓɛte-Anate, ti yɛni zeini Kanaan nui naati saama, niiti ti ɠɛni zeini zooi naa zu. Kɛlɛ ti ɠɛni boti ɓaagi veezu taa wola felegɔi naati su nuiti zea, ti ɗa kɛ.

³⁴Amɔɔl nuiti, ti Dan ná-nuiti kpɛɛni, ti lɛ gize yooi zu, ti la ɠɛni vaani bu ga ti yei nɛmɛi zu.