Tukpɔɠaaleʋe Nuiti 18:14-23

¹⁴Zunu lɔɔlugɔi niiti ti liini Layise yooi zuʋɛtɛsu, naati ti ɠɛni ti-wɔɔlaiti ma: «Wo suɠwɛɛ nɛi ɓaa, ga zalaɠa ɠula zeɠei ɠa pɛlɛi nii ta wu, ta pɛlɛ wu zaleiti, ta vololibai, ta kɔɔɠɔ ganigi taɠili, nii é ga kɔlu ɠaawuungai? À naa leve, nii wa kɛ.»

¹⁵Ti ɠaleni ma miná, ti lɛ Leevi zunu loungoi ná-pɛlɛi wu, Mika ná-pɛlɛi wu, ti tuʋɔgi wo.

¹⁶Názu niina, Dan mavofodaiti, nu undɔzitai (600) niiti kɔɔɠɔ zɔɔlai ɠɛni ti ya, ti ɠɛʋele ɓɛtɛai kɔɔɠɔ vai ma, naati ti ɠɛni loni pɛlɛlaʋɛ.

¹⁷Zunu lɔɔlugɔi niiti ti liini zooi zuʋɛtɛsu, naati ti lɛɛni, ti vololibai zeɠe, ta zalaɠa ɠula zeɠei, ta pɛlɛ wu zaleiti, ta kɔɔɠɔ ganigi, nii é ɠɛni ga kɔlu ɠaawuungai. Zalaɠa ɠula nui ɠɛni loni pɛlɛlaʋɛ ta nu undɔzitaiti (600) niiti kɔɔɠɔ zɔɔlai ɠɛni ti ya.

¹⁸Zalaɠa ɠula nui zɔiti kaai ma, ti lɛ Mika ná-pɛlɛi wu, ti vololibai zeɠe, ta zalaɠa ɠula zeɠei, ta pɛlɛ wu zaleiti, ta kɔɔɠɔ ganigi é ga kɔlu ɠaawuungai, é ɠɛni ti ma: «Leeni ɠa wo kɛɛzu miná?»

¹⁹Ti gooɠaaʋoteni, ti ɠɛ ma: «Maaɠɛ kpɔ! Yeeʋɛɛ la, è ʋilɛ gi ʋolu, ɠɛ ga ɠɛɛɠɛi gi ʋɛ, ta zalaɠa ɠula nui. Fizɔgɛ è ma nɛi ɓaa, è ɠɛ ga zalaɠa ɠula nui zunu ɠilagi nɔ ʋɛ, ɓaa è ɠɛ ga zalaɠa ɠula nui bolodai ʋɛ, ta pɛlɛyeɠei ʋɛ, Izelayɛle yooi zu?»

²⁰Zalaɠa ɠula nui wola ɠoozunɛ naama vai zu. É zalaɠa ɠula zeɠei zeɠeni, ta pɛlɛ wu zaleiti, ta vololibai, é ʋilɛ nuɓusɛiti saama.

²¹Ti pele zoni, ti ɗa li, ti doungoiti toni luɠɔ, ta toganiiti, ta kasɔiti.

²²Ti maaɠoozaai ma Mika ná-pɛlɛi ʋa, Mika zeiɲɔɠɔiti ti ɓɔɠɔ lolini, ti ʋilɛ Dan ná-nuiti polu.

²³Ti ɠɛni kpeei loozu Dan ná-nuiti polu, naati ti ɠaleni ma, ti ɠɛ Mika ma: «Leeni ɠa kɛai, è toligi wosu ɠana?»