Zazi 18:14-23

¹⁴Meke sari ka lima tie pu ele piko nia sa popoa pa vari likohae nia sa vasileana Laisi, si zama la koari na turaṉadia, “Gilania tugo gamu sapu keke koari na vetu hire, si koa nana si keke beku huda, sapu ta pokoe siliva? Meke kaiqa beku pule, meke na poko hiama hopena, si koadia vasina. Mi balabala ia gamu sapu gua leana pude kaqu tavetia gita.”

¹⁵Ke nuquru la si arini pa vetu te Maika, vasina koa sa tie Livae, sa tie vaqura, meke nanasia rini, sapu vegua si asa.

¹⁶Ba sari ka onomo gogoto tie varipera pa butubutu Dani, saripu korapa kopu meke taṉini rini sari na dia tiṉitoṉa varipera, si korapa turu dia pa sasada bara.

¹⁷Nuquru toṉoto la pa korapa vetu sari ka lima tie piko, meke taṉini vagia sa beku huda, sapu poko ia na siliva meke sari kaiqa beku pule, meke sa poko hiama hopena. Sa hiama si korapa koa nana tu koari ka onomo gogoto tie varipera koasa sasada bara.

¹⁸Sipu vagi ri na tie pa korapa vetu te Maika sari na tiṉitoṉa hopedi, si nanasa la i sa hiama si arini, “Nasa si tavetia gamu,” gua si asa.

¹⁹Tozi nia rini si asa, “Mokomoko, lopu zama. Mae luli gami pude na mami hiama meke na tamamami si goi. Nasa si leana hola koa goi, pude na hiama tanisa keke butubutu pa korapana sa butubutu Izireli, babe tanisa keke tie koasa nana tatamana mo?”

²⁰Qetu hola nia sa hiama sapu gua asa, ke paleki sa sari na tiṉitoṉa hopedi meke luli la koa rini si asa.

²¹Taluarae si arini, meke sari na dia koburu meke sari na dia pinausu kurukuru ṉame meke sari doduru dia likakalae, meke ene kekenu la koa rini.

²²Sipu ele ene va seu si arini koasa vetu si tioki Maika sari na turaṉana, pude hadu luli la i, meke kamoi rini, meke hiva varipera koari na tinoni pa butubutu Dani,

²³meke kukili la si arini koa rini. Liṉana sari na tie pa butubutu Dani meke nanasa la koe Maika, “Nasa si ta evaṉa sana? Pude vegua sa minate vinaripera lavata sana?” gua si arini.