Taha Bapare Sâcmutâc 5:13-19

¹³Taha bapa eki ŋic e wiac i me i ehuc sâqocne bâfuawec ere kiwiric rome sâqocne tâtâmire fuacnezejec. Ehame taha bâzire ekicne sâc ijaha ehapie poroŋ tiwânezi taha bapare biŋe ezejec.”

¹⁴Wofuŋzi Mose dâŋ ʒiŋuc âzâcnewec:

¹⁵“Ŋic moczi mi mana tarahuc wiac moc Wofuŋte biŋe bâtirikicne i sâctiri râeocmu ine kiŋ tatara tahare biŋe lamafâc‐ticne jaŋeraonec ŋicne biaŋne moc Wofuŋtao râezejec. Furi‐ticne ine tiri ficte siliwa moneŋ fokac irec sâcko muzemec, wiac i kiŋ tatarare taha hâcne.

¹⁶Wiac bâtirikicne sâckoa mi râewec irec okacne bârisiezejec, erâ i sawa mâcne, wiac fiuc rowec irec 5‐konec wâŋ ʒuhuckerâ taha bapa râcnezejec. Eme taha bapa e lama ŋicne kiŋ tatara tahare biŋe râehuc kiwiric jâoc rome sâqocne bâbâtâmire fuacnezejec.

¹⁷“Wofuŋzi wiac ebac ezore sâcmutâc râewec i ŋic moczi mi mana tarahuc huckerâ sâqocne bâfuaocmuo ine sifu kiŋ hotâckeocmu.

¹⁸Irec ŋic e goki mutâcnecnecmu irec sâc lamafâc‐ticne jaŋeraonec ŋicne biaŋne moc kiŋ tatara tahare biŋe taha baparao bafisizejec. Eme taha bapa eki, ŋic mi mana tarahuc bahac bâfuawec ere kiwiric jâoc rome sâqocne bâbâtâmire fuacnezejec.

¹⁹Ŋic e Wofuŋte maio kiŋ bâfuawecte taha izi kiŋ tatara taha ekac hâcne.”