Taha Bapare Sâcmutâc 11:4-30

⁴Kike râqâc‐jeŋic fâuckekicne fuambiŋ me nânâ ŋâc hepie wefume nâeŋgopieŋ jaŋeraonec sifu kecʒiŋuc jaŋe mi nâcjopanʒepieŋ: Kamele e nânâ ŋâc heme wefume nâekac, mâc kike râqâc‐ticne mi fâuckekicnere manacnepie wâwânâŋhec ezejec.

⁵Erâ qowi moc ʒâŋene roki beʒe e nânâ ŋâc heme wefume nâekac, mâc kike râqâc‐ticne mi fâuckekicnere manacnepie qowi wâwânâŋhec ezejec.

⁶Me qowi moc ʒâŋene hea, e nânâ‐ticne ŋâc heme wefume nâekac, mâc kike râqâc‐ticne mi fâuckekicnere manacnepie wâwânâŋhec ezejec.

⁷Erâ bec e kike râqâc‐ticne fâuckekicne, mâc nânâ nâhuc ŋâc mi heekacte manacnepie wâwânâŋhec jaha ezejec.

⁸Qowi i jaŋere hâcne manapie wâwânâŋhec eha mi nâcjopanʒepieŋ â qâŋɋâŋ‐jeŋic ba bâuac wâc mi enʒepieŋ.

⁹“Opâo qowi juŋgopieŋ gâcne kecʒiŋuc nâcjopazo murâ nâcjopanʒepieŋ: Hâwecko me opâo qowi dipa â garac‐jeŋichec sasawa juŋgopieŋ jaŋe sâcne nâcjopaniŋmu.

¹⁰Qowi wiac gâcne gâcne hâwecko me opâo dipa â garac tâmiric gerec gerec bahuc juŋgopieŋ jaŋere ine manapie wiac mamakâcne ezejec.

¹¹Eme jaŋe mamakâcne jaha juhapie biuc‐jeŋic mi nânʒepieŋ â qâŋɋâŋ‐jeŋic honepie mamakâcne jaha ezejec.

¹²Opâ qowi dipa â garac tâmiric sasawa honec‐jopapie mamakâcne efârenʒepieŋ.

¹³“Wipe jaŋeraonec ine kecʒiŋuc jaŋere mamakâc‐ŋopame mi nâcjopanʒepieŋ, jaŋe wiac mamakâcne hâcne. Tucwipe, mombaŋ, keŋ,

¹⁴bicqâreŋ, mebâroŋ â wipe iŋucne gâcne,

¹⁵kâec kâec â wipe iŋucne gâcne,

¹⁶qera, ŋafe wipe, kâte kaiŋɋaŋ, piʒu piʒu â wipe iŋucne gâcne,

¹⁷bioc bioc, gararaweŋ, ɋâreŋ hâmoc,

¹⁸mebâ, baro gâgâpâc, qeri,

¹⁹qeʒo, baro qaŋqaŋ, bikuaŋ erâ mindi mindi.

²⁰“Gisic wiac fafakec‐jeŋichec â mekike‐jeŋic 4‐zi rac warec eeŋgopieŋ jaŋere manapie wiac mamakâcne jaha ezejec.

²¹Mâc gisic wiac gâcne fakec‐jeŋichec â mekike‐jeŋic 4‐zi rac warec eeŋgopieŋ erâ kike‐jeŋic gâcnezi mâreŋko tara he ehuc raeŋgopieŋ jaŋe ine nâcjopazo murâ sâcne nâcjopaniŋmu.

²²Ʒiŋuc jaŋe sâcne nâcjopaniŋmu hâcne: Hâpic fuŋne fuŋne, ɋâuc bisirec fuŋne fuŋne, ɋirikiŋ fuŋne fuŋne, erâ hefuac fuŋne fuŋne.

²³Gisic wiac gâcne gâcne fakec‐jeŋichec â mekike‐jeŋic 4 jaŋere ine manapie wiac mamakâcne ezejec.

²⁴“Ŋoŋe qowi â gisic iŋucne nâhuc wâwânâŋhec eniŋmu hâcne; eme moc e qâŋɋâŋ‐jeŋic ba bâuac ehuc wâwânâŋhec erâ juha hae ŋafeocmu.

²⁵Me moc e qâŋɋâŋ‐jeŋic tofane moc rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu.

²⁶Qowi kike râqâc‐jeŋic dâkâpeaŋ fâuckekicne fuambiŋ, me nânâ nâhuc ŋâc mi heeŋgopieŋ jaŋere manapie wâwânâŋhec ezejec. Irec moc e ba bâuac ejarerâ wâwânâŋhec eocmu.

²⁷Erâ qowi me kike tape‐jeŋic 4‐zi rac warec eeŋgopieŋ jaŋere wâc manapie wâwânâŋhec ezejec. Ehame moc e qâŋɋâŋ‐jeŋic ba bâuac ejareocmu e wâwânâŋhec erâ juha hae ŋafeocmu.

²⁸Me moc e qâŋɋâŋ‐jeŋic rorâ baraocmu e ŋaqi‐ticne ʒurezejec, e jahacne ine wâwânâŋhec erâ juha hae ŋafeocmu. Ŋoŋe qowi iŋucne hâcne honec‐jopapie wâwânâŋhec enʒepieŋ.

²⁹“Wiac kecʒiŋuc jaŋe mâreŋko guru sâko jueŋgopieŋ jaŋere wâc manapie wâwânâŋhec ezejec: Qâqâto, ʒuc, fârio fuŋne fuŋne,

³⁰râoŋ, gugume, rekâ, gurac erâ kambarec.