LEVITIKO 11:4-30

⁴Ḡau tamona, unuhetomadia haida na basio ani. Kamelo na basio ania; badina be ana aniani e ḡauaia loumu, to imana aena palapaladia asieme parara; ia na helaḡa emui ai.

⁵Koni danu basio ania; badina be ana aniani e ḡauaia loumu, to imana aena palapaladia asieme parara; ia na helaḡa emui ai.

⁶Hea danu basio ania; badina be ana aniani e ḡauaia loumu, to imana aena palapaladia asieme parara; ia na helaḡa emui ai.

⁷Boroma danu basio ania; badina be imana aena palapaladia eme parara, to ana aniani se ḡauaia loumu.

⁸Hidiodia basio ani, bona masedia ai basio daudia toho; idia na hehelaḡa umui emui ai.

⁹Ranu ai e nohomu ḡaudia na iboudiai basio ani, a ini mo bavani: mai taiadia bona mai unadia davara ai bona sinavai ai vada bavani;

¹⁰a asi taiadia bona asi unadia ḡaudia ranu ai e maurimu bona e loamu, davara ai eiava sinavai ai, na basio ani.

¹¹Ba dadaraidia vaitani: hidiodia basio ani, bona masedia ai basio daudia toho; idia na hehelaḡa emui ai.

¹²Ranu ai e nohomu ḡaudia asi taiadia bona asi unadia na ba dadaraidia vaitani.

¹³Ba dadaraidia manudia bini: basio ani, badina be idia na hehelaḡa emui ai. Ḡaudia bini: ugava-bada bona larata bona ugava maraḡina,

¹⁴bona bogibada bona pivai, idia bamodia manudia ida;

¹⁵mukou danu, mai ia bamona manudia iboudiai ida;

¹⁶bona kokokoko bona kito bona kanaḡe bona kipa, idia bamodia manudia ida;

¹⁷bona baimumu bona manubada bona gadomanu;

¹⁸bona kema bona boebedi bona lokoru,

¹⁹bona boḡe, bona noko mai ia bamona manudia ida, bona turumu, bona sisiboi.

²⁰Mai hanidia bona mai imadia aedia ḡaudia, imadia bona aedia amo tanobada ai e loamu, na ba dadaraidia;

²¹a mai hanidia bona mai imadia aedia ḡaudia haida, aedia na lalata bena aedia amo e roho e laomu,

²²unu na bavani: una dainai kwadi idau-idau iboudiai na bavani diba.

²³A mai hanidia bona mai imadia aedia ḡaudia oredia iboudiai na ba dadaraidia.

²⁴Ini ese bae hataubumui; masedia ai baine daudia toho tauna na baine taubu ela bona dina baine diho;

²⁵bona tau-anidia baine abi loaloa taunana ena dabua baine huri bona baine taubu ela bona dina baine diho.

²⁶Imana aena palapaladia eme auka to asieme parara ḡauna, eiava ena aniani asine ḡauaia loumu ḡauna, na helaḡa umui emui ai: bona baine daua toho tauna na taubu.

²⁷Bona imadia aedia palapaladia eme manoka to imadia aedia amo e rakamu ḡaudia danu hehelaḡa umui emui ai; masedia ai baine daudia toho tauna baine taubu ela bona dina baine diho;

²⁸bona tau-anidia baine hua tauna na ena dabua baine huri bona baine taubu ela bona dina baine diho. Unu ḡau na hehelaḡa umui emui ai.

²⁹Ini tano ai e raumu ḡaudia danu na hehelaḡa emui ai: uda pusina, bona bita, bona ariha, mai ia bamona ḡaudia ida;

³⁰bona vaboha bona siha bona hohoduka bona variga bona gesoa.