3 Ɠɔoɠɔ GALAGI ɠaazuʋɛ ɠa adaʋɛ pɛ, é ɗa nu ɲɔiti ta nu ʋagɔiti sumɔ.
4 Nu laawoo ʋagɔiti kɛɛʋɛ eɠɛ zɛnvu wulu wolai, kɛlɛ faa ɲɔu ɠɛ nɛgi ɠa ɗa ziiɠoloɠologi ɠɛ.
5 Ɠimalala nui ɠa ɗa kɛɛɠɛ ná-tɛnɛ gooiti pɛlɛʋɛlɛ, kɛlɛ zɔi é yeezeizu zelilomai wu, naa ɠa ɓɔɠɔ lɛɛzu ga ɠima nu.
6 Naavolo mɔinmɔin ka é telebo nui ná-pɛlɛi wu, kɛlɛ nii kpein nu ɲɔi sɔlɔɔsu, toɠa ɗa ɠɛ ga ziizoolɛi ma ungi.
7 Ɠima nuiti daawooi ɠa ɗa faaɠwɛgi vaza, kɛlɛ faaɠaaɠaalala nuiti ziimaʋɛ la ɠana.
8 Ɠɔoɠɔ GALAGI maaɲɛɛi ɠa ga faa ɲɔu ɠɛ nuiti ta-zalaɠaiti, kɛlɛ sɔle nuiti ta-ƓALA maanɛɛnɛ wooiti nɛɛʋɛ bɛ.
9 Ɠɔoɠɔ GALAGI maaɲɛɛi ɠa ga faa ɲɔu ɠɛ nui ziɛ ʋelei, kɛlɛ naama nui nɛɛʋɛ bɛ, nii é ʋilɛsu telebodai ʋolu.
10 Zɔi é zeɠezu faa ʋagɔi ʋolu, faa wola ɠa la ma ga maaɠolo, zɔi é zelilomai wɔinzeɠezu, naa undaa ɠa ʋili.
11 Ɠɔoɠɔ GALAGI gɔvɛalaazu ta undaaʋili zeɠezaɠai, zu vaiti kpein kwɛɛ, nuɓusɛiti zii ɠwɛɛ fai ɠa ga leeni tɔun bɛ!
12 Waso nui nɛɛbɛ vaa la ga nu zelii lo ma, é la ɗa ga li ɠima nuiti pɔ bɛ.
13 Koozunɛɛi ɠa ɗa nu ɠaazuʋɛ volo, kɛlɛ ziiɓɔlɔi ɠa ɗa nu ɠaalɛi.
14 Keleɠele nui ɠa ɗa ɠaaɓa faa maaɠɔli vai ma yeenɔpɛ, kɛlɛ ɠimalala nui ɠɔnɔgi ɠa ɗa ɠɛ ga ɠimalala vaiti nɔ.
15 Maanɔɠɔ nui zii ma voloi kpein ɲɔuʋɛ, kɛlɛ zɔi undaanɛai, naa ɠa ɗa ɠɛ fɛti ɠula vai laawu nɔ ɠɔ.
16 Fizɔgɛ nu ɗa ani go nɔ zɔlɔɔ, è ɠɛ ga Ɠɔoɠɔ GALAGI ɠaazuluaba nu, è ʋa li naavolo wola zɔlɔɔsu, nii ziiɓɔlɔi polu.
17 Fizɔgɛ nu tufa wuulugi ma laamii wo, kpɛtɛai nɛɛbɛi zu, è ʋa li nikɛ wulɔi miizu, ni wɔinzeɠemai ɠa ná.
18 Ziiɠula nui ɠa ɗa kpɔɛiti suwɔɔlɔ, kɛlɛ zɔi ziiɠaa la wana fala, naa ɠa ɗa sakpegiti gaayei.
19 Ɲaka nui ná-pelei ɠɛɛʋɛ eɠɛ ɠain sasai, kɛlɛ sɔle nuiti ta-ʋelei ɠaa ɠa sɔli.
20 Ɠima loun zunui ɠa ɗa kɛɛɠɛ ɠoozunɛ, kɛlɛ faaɠaaɠaalala zunui ɠa ɗa dee ʋɛlɛʋili.
21 Ɠimalalai ɠa ga koozunɛɛi naama nui ʋɛ, nii balagai faaɠaaɠai ma, kɛlɛ zunui keleɠelegai, toɠa ɗa ziɛ sɔledai zu.
22 Faa mɔinmɔin ka ɗa ɠazaʋi, ti la zolooga tɔɔzei gaazaɠatalai ʋa, kɛlɛ ti zu ɠa ɗa ɓɛtɛ, ni tɛnɛbo nua ta ná.
23 Koozunɛ vaa ʋe zunui ʋɛ, siɛgi zu é ɓɔɠɔ wooɠaaʋotegi veezu la, ziilɛi faa ʋe, ni kpɔɛi a wona ga bo yeeɠɛɠala!
24 Keleɠele nui ɠa ɗa ziɛ ga pelei, nii é lɛɛzu geezuʋɛ zɛnvui ʋɔ bɛ, naa ɠa kizosu gɔvɛalaazu ma, nii é buu ʋelei.
25 Ɠɔoɠɔ GALAGI ɠa ɗa waso nuiti ta-ʋɛlɛi ɠoloɠolo, kɛlɛ toɠa ɗa ɓaa poanzai ɠɔligiti maazu.
26 Ɠɔoɠɔ GALAGI maaɲɛɛi ɠa ga kisiɛ ɲɔiti, kɛlɛ kpɔɛ ʋagɔiti ka a ɗa va ti wu.
27 Zɔi é wɔinni ʋele-o-ʋele, é ɓɛtɛ, toɠa ɗa ná-pɛlɛyeɠei lɔ kpɔlɔi zu, kɛlɛ zɔi é lobɛanii wɔinzeɠezu, naa zii zu ɠa ɠooza.
28 Telebo nui ɠa ɗa ɠigaiziɛ, aisa é ʋa gooɠaaʋotegi ve, kɛlɛ faa ɲɔu ɠɛ nuiti ta ɗa faa ɲɔi vaza ga laaʋɛ.
29 Ɠɔoɠɔ GALAGI maaɠoozaʋɛ faa ɲɔu ɠɛ nuiti ba, kɛlɛ toɠa ɗa woilo telebo nuiti ta-maanɛɛnɛ wooiti ma.
30 Nuɓɔɠɔlai ma ɠaazuʋɛ ɠa ɗa koozunɛɛi ve, nui a woo niinɛ ʋagɔi mɛnina, toɠa ɗa iɲɔdɔ, é zeeli ma ɠaeiti ma.
31 Zɔi é woilosu tɛnɛ gooiti ma, ta ɓɔ ba etea ziɛi zu, naa zeizu ɠa ɠima nuiti saama.
32 Zɔi é ɠɛlɛzu ga zelii mina lo ma, naa ɠa ɓɔɠɔ ʋɛlɛʋɛlɛsu, kɛlɛ zɔi é woilosu tɛnɛ gooiti ma, naa ɠa ɠi pagɔiti sɔlɔɔ.
