5À yãdìlɛ Yakↄbu buiↄnɛ, à a ikoyã dà Isailiↄnɛ. A ò wá deziↄnɛ aa tó ń nɛ́ↄ dↄ̃,
6i gↄ̃ ń bui pↄ́ kpɛ́ↄnɛ fɛlɛkaa ũ, aai fɛlɛ dada ń nɛ́ↄnɛ sↄ̃,
7kɛ́ aa e Lua náaikɛ, kɛ́ Lua yãkɛaↄ su sã́ńguo, aaiↄ aà yãdilɛaↄ kũa,
8kɛ́ aasu wàↄ dɛ lán ń deziↄwao, asa aa swã́gbãakɛ̀ aa gì Lua yã́i, an sↄ̃ ku Luawao, aa náai vĩɛ̀o.
9Ɛflaiũ buiↄá kàzunaↄnɛ, ↄ̃ aa kpɛkpà zĩ guu.
10Aai zɛ ń Luabaakuańnↄoo, aa gì tɛ́i aà ikoyãi.
11Aà yãkɛaↄ sã̀ńgu ń aà yãbↄnsaɛ pↄ́ a ↄ̀lↄnɛ́ↄ.
12À dabudabuↄ kɛ̀ an deziↄ wáa Zoã wɛ̃́lɛu, Egipi bùsuu.
13À ísia zↄ̃̀ɛ à bùańnↄ, à í bĩ́ibò.
14À dↄ̀aanɛ́ tɛlu guu fãanɛ, gwãasĩna sↄ̃ ń tɛ́ gupuao.
15À gbɛsi pàa guwaiwaiu, à í kpàmá zↄ̃ↄ lán ísia íwa.
16A tò í bↄ̀nɛ́ gbɛu, ípi bàalɛ̀ lán swadawa.
17Ɔ̃ aa gì tɛ duunawa, aa gì Musude yãmai guwaiwaiu.
18Aa gí kɛ̀ aa Lua lɛwɛ, aa ń pↄeã blɛ gbɛ̀awà.
19Aa Lua bɛ̃̀ɛbò aa mɛ̀: A fↄ̃ ↄpi'i dilɛwɛ̃ɛ sɛ̃u lae?
20Gwa, à gbɛ lɛ̀, í bↄ̀ dàgua mɛ! A fↄ̃ blɛ ge nↄ̀ↄ kpáwá sↄ̃a?
21Kɛ́ Dii yã́pi mà, aà pↄ pà, ↄ̃ tɛ́ kũ̀ Yakↄbu buiↄwa, à pↄkũmabↄ̀bↄ Isailiↄwa.
22Asa aai Lua yã́ sio, aa aà gbɛ̃́ suabaa gbãa náai vĩo.
23À yãdà bàlumaɛ, à zɛwɛ̃̀ musu,
24ↄ̃ mana kwɛ̀nɛ́ blɛ ũ, à musu pↄ́wɛna gbↄ̃ yònɛ́.
25Aa malaikaↄ blɛ blè, à kũ̀sũakɛ̀nɛ́, à dìńla.
26A tò ĩ́an gbãa bↄ̀ gukpɛ, ń aà gbãao à bↄ̀ gɛↄmidↄkĩi oi lↄ,
27ↄ̃ à nↄ̀ↄ kwɛ̀nɛ́ lán luutɛ̃wa, bãↄ lìńla lán ísialɛ ũfãawa.
28A tò aa kwɛ̀ ń bòou, aa gↄ̃̀ kálɛa liaa ń kpɛ́ↄi.
29Lua pↄ́ pↄ́ aa a ni vĩ kpàmá, ↄ̃ aa sò aa kã̀ pã́upãu.
30E a ni àↄ gɛ́ bↄińla, gↄↄ pↄ́ blɛpi da ń lɛ́u,
31Lua fɛ̀lɛ fɛ̃̀ńnↄ, à Isaili gↄ̃gbãaↄ dɛ̀dɛ, à ń ɛ̀waasoↄ kwɛ̀.
32Gia ń beeo aa gì tɛ duunawaɛ, ń aà yãbↄnsaɛkɛaↄ aai aà náaikɛo.
33Ɔ̃ à ń wɛ̃ni kɛ̀nɛ́ lán lɛ́'ĩanawa, a tò ↄ̃̀ↄnɛkɛa ń mìdɛ.
34Tó à ń pisabò, aaì aà aɛya, aaì ɛa wà aà kĩ́i wɛɛlɛ ń wãao.
35Aa dↄ̃̀ sa Lua mɛ́ ń gbɛsi ũ, Lua Musude mɛ́ ń Mìsina ũ.
36Ãma aaì lɛ́mawà, aaì ɛɛtoɛ̀,
37an sↄ̃ kuwào, aa aà bàakuańnↄ yã́ gbòo.
38Aàpi sↄ̃ à ń wɛ̃nagwà, à ń duuna kɛ̃̀má, i ń midɛo. Ìↄ azĩa zùukɛ mↄ̀ↄmↄↄɛ, i a pↄkũmabↄbↄmá píio.
39À ń gbɛ̃nazĩnkɛ dↄ̃̀má, asa aaì gɛ̃zɛa susai lán ĩ́anawaɛ.
40Aa swã́gbãakɛ̀ guwaiwaiu gɛ̃n ũma'ũma! Aa aà pↄ yàɛ̀ sɛ̃u we à kɛ̀ zài.
41Aa Lua lɛwɛ, aa Lua lɛwɛ, aa Isailiↄ Lua pↄ́ a kua adoa fɛ̃̀.
42Aà iko gbãa sã̀ńgu, lá à ń sí ń ibɛɛↄwa,
43lá à dabudabuↄ kɛ̀ Egipi, mɛ́ à yãbↄnsaɛↄ kɛ̀ Zoã bùsuu.
44À ń swa'iↄ lìlɛ au ũ, ↄ̃ aai fↄ̃ aa a imì lↄo.
45À ũsĩnaↄ kàńgu, aa ń soso, ń blↄↄↄ lↄ, aa yãyìamá.
46A tò kwaↄ ń pↄ́wɛnaↄ blè, à kwasutɛ̃ kà ń buapↄ́ↄu.
47A tò lougbɛ ń vɛ̃ɛbuↄ kɛ̀ kɛ́lɛkɛlɛ, a zàa'ĩana ń kaa líↄ ɛ̀'ɛ.
48À ń pↄtuoↄ músikɛ̀ ń lougbɛpio, lua sù ń kpàsaↄwa.
49À a pↄkũma zↄ̃ↄ bↄ̀bↄmá, à ĩ́isɛ̀ńnↄ ń pↄfɛ̃o ń kpɛ̃nɛo, à músi malaikaↄ gbàɛmá.
50À a pↄkũma gbà zɛ́, i zɛzↄ̃ gaɛ lↄo, à gagyãkàńgu.
51À Egipi nɛgↄ̃ɛ sɛ̃́iaↄ dɛ̀dɛ píi, Haũ bui gↄ̃sakɛ nɛ́piↄ gàga.
52À bↄ̀ ń a gbɛ̃́ↄ lán sãↄwa, à dↄ̀aanɛ́ guwaiwaiu lán sã waiↄwa.
53A bɛńnↄ, aa ku dↄdↄa vĩasai, an ibɛɛↄ sↄ̃, ísia kũ̀aamá.
54À kàńnↄ a bùsu zↄ̃lɛu, gusĩsĩde pↄ́ a sì ń a gbãaopiu.
55À buipãleↄ yànɛ́, ↄ̃ à ń bùsu kpaalɛ̀nɛ́ ń pↄ́ ũ, à uakpàkpa Isaili buipiↄnɛ.
56Ɔ̃ aa Lua lɛwɛ aa gì aà yãmai, aa Musude yãdilɛaↄ kũao.
57Aa kpɛkpà aa bↄ̀ aà kpɛ lán ń maeↄwa, aa náai vĩo lán sá gia baiwa.
58Aa aà pↄ fɛ̀lɛɛ̀ ń ń sa'okĩio, aa aà zafɛ̃̀ɛ̀ ń ń tã́aↄ.
59Kɛ́ Lua è màa, ↄ̃ aà pↄ pà, à ↄzↄ̃̀ Isailiↄzi pãsĩpãsĩ.
60À a zwã̀akpɛ tò Silo we, aà bɛ pↄ́ a kpà gbɛ̃nazĩnaↄ guupi.
61A tò an wɛ̀lɛↄ mↄ̀ a kpagolo sɛ̀, ↄ̃mɛ aà gbãa ń aà gawio kúkĩi ũ.
62A tò wà a gbɛ̃́ↄ dɛ̀dɛ ń fɛ̃ndao, aà pↄ pà bui pↄ́ a sɛ̀pizi.
63An ɛ̀waasoↄ tɛkũ̀ zĩ guu, an wɛ̃́ndiaↄ i zãkɛlɛ dↄ̃ lↄo.
64Wà ń sa'onaↄ dɛ̀dɛ ń fɛ̃ndao, an gyaaↄ i fↄ̃ ↄ́ↄlↄ̀o.
65Ɔ̃ Dii vù ń io sa, lán gↄ̃sa pↄ́ vù ń wɛ̃'iowa.
66À ń wɛ̀lɛↄ gbɛ̃̀, aa kpɛkpà, a tò aa gↄ̃̀ ń wío gↄↄpii.
67Ɔ̃ à gì Ɛflaiũ buiↄzi, i Yosɛfu buipi sɛ lↄo.
68Yuda bui ↄ̃ a sɛ̀ sa ń Siↄna gbɛ̀sĩsĩ pↄ́ á yeio.
69À a kúkĩi dↄ̀ musumusu we, aↄ ku gↄↄpii lán dṹnia kálɛawa.
70Ɔ̃ à a zↄ̀blena Davidi sɛ̀, à aà bↄ̀ sã kaau.