SOLOMON ENA ANE 2:8-17

⁸Egu lalokau tauna gadona! A itaia, ia na e maimu; ororo badadia ai e roho daemu, ororo maraḡidia ai e roho laomu.

⁹Egu lalokau tauna na uda nanina eiava dia natuna na heto. A itaia, emai ruma murimurinai e ginimu, gaba-mauruna amo e ha-igomu, makamaka amo e igo vareaimu.

¹⁰Egu lalokau tauna ese e hereva henigumu, ini e gwau tomamu: Egu lalokau e, a tore isi! Hane namo e, aitala!

¹¹Keru negana vada e ore; medu vada e doko.

¹²Tano heraheradia vada e tubu; ane-abi negana vada e kau; bona pune na e taimu eda tano ai.

¹³Suke huahuadia e dobimu, vine buredia e papamu, bonadia na e daemu. Egu lalokau e, a tore isi! Hane namo e, aitala!

¹⁴Egu pune e, oi na nadi matudia ai; oi na haga kohuadia ai. Vairamu bama itaia, bona gadomu bama kamonai; badina be gadomu na namo, bona vairamu na mai hairaina. *****

¹⁵Aoma, mariboi baita idoadia, ena be mamaragi to idia ese vine imeadia e hadikamu, badina na eda vine buredia e papamu. *****

¹⁶Ia na egu lalokau, lau be ena lalokau; ia ese ena mamoe e ubudiamu, sosana bogaragidiai.

¹⁷Egu lalokau taumu e, a kerehai, uda nanina eiava dia natuna ororo gabaedia ai na heto; ela bona dina baine keruma, bona hanua baine boi.