Solomon 2:8-17

⁸Pren bilong mi i kam long mi. Em i kalap kalap na i ran i kam antap long ol maunten na mi harim nek bilong en.

⁹Em i spit tumas olsem wanpela strongpela wel abus. Em i kam pinis na sanap ausait long haus, na i lukluk i kam insait long windo.

¹⁰Na em i toktok long mi. Yangpela man i singim song olsem Naispela pren bilong mi, yu kam ausait, na yu kam wantaim mi.

¹¹Yu no ken pret long ren. Taim bilong ren i pinis.

¹²Nau ol plaua i kamap pinis long olgeta hap, na em i taim bilong singsing. Ol pisin i wok long singsing nabaut long bus.

¹³Ol diwai fik i stat long karim kaikai. Na olgeta rop bilong bus i putim plaua, na ol plaua i gat gutpela smel. Naispela pren bilong mi, yu kam ausait, na yu kam wantaim mi.

¹⁴Yu stap insait long haus bilong yu olsem pisin i save hait insait long liklik hul long ples nogut bilong maunten. Kam ausait na mi lukim naispela pes bilong yu na mi harim gutpela nek bilong yu.

¹⁵Holimpas dispela ol liklik weldok. Nogut ol i kam insait long gaden bilong yumi na bagarapim ol plaua bilong diwai wain.

¹⁶Dispela pren em i man bilong mi na mi meri bilong em. Em i kisim ol meme bilong en i go namel long ol naispela plaua na ol i wok long kaikai gras.

¹⁷Bai em i was long ol i go inap long san i go daun na ples i kol. Gutpela pren bilong mi, mi laik yu kam bek kwik olsem wanpela gutpela wel abus i ran i kam antap long ol bikpela maunten.