Solomon 2:8-17

⁸Edao! Eno abagi wali bidi enaba asobao. Suao! Aga sasa mano dulu te bulu dabedu ugaba udada asobao, tama eno aga dogonidu wabo po odalio.

⁹Aga te umagia mu uda wali, te bomai bulu uni hasa me deli udabo tiwai yali. Aga aselama da, te be bulu badu dolagaselama, te be dedage windodu tomoba tonanio.

¹⁰Tama agai ena dali e po wali. “Eno abagi we sawi yai we mu, nage buluba teda asao, te nage ena wali asao.

¹¹Nage te tulubagede wi me elamuo. Te tulubage be yali sogo silalio.

¹²Megi da, tigidali badu plaua dabe pedela silalio, te balia po wabo sogo pedelali. Te ba hi dabego bulude balia po ola pabo sę ebao.

¹³Te ni kaya du walobo gagalali. Te buside tigidali bonogo duduli pedelama, tama te plaua dabego wiegi yai denami ebao. Eno sawia pai we abagi mu, nage buluba teda asao, tama nage ena dali asao.

¹⁴Nago naga be tomode bidali, te ba te bulu du dwai madi dedage dwasianu tomode geme dualalubo tiwai elaluali. Te buluba dįą soao, te eno nago sawi yai gesabidi sulama, tama nago wiegi yai dogonigo po wabo eno odaibao.

¹⁵Te dwasianu bulu uni yowi dabe nogo pageabi elama, tola sao. Tiyu, augwali dago gi tomoba aselama, te wain ni duduli walobo plaua dolidalio,” wali.

¹⁶Te abagi eno bidi da, tama ena agai we da. Agai te aga meme kibu dabe te sawi yai plaua dabe tomoba sela pelama, tama augwali te nosai tubo sę ebo dao.

¹⁷Te agai augwali tonalubadi, te giliga dega siguluboba usu nama, te bulu kedau ebo dao. Eno wiegi yai abagi, eno homugo nage polo ma asomainu homu ebao, te wiegi yai bulu uni hasa me deli te genuai bulu duba uga udada asobo tiwai ebo dao.