San Lucas 20:7-21

⁷Niꞌr gulubiꞌë didzaꞌ, taꞌnë́ꞌ: ―Cutu nö́zituꞌ nuzxa naꞌ bsölaꞌ Juan.

⁸Niꞌr Jesús rëꞌ lequëꞌ: ―Nedaꞌ caꞌ cutu gyëpaꞌ lbiꞌiliꞌ bi yöl‑laꞌ uná bëꞌ rúnidaꞌ cni.

⁹Niꞌr laꞌ gzu lautëꞌ Jesús ruíꞌlenëꞌ bunách nacuáꞌ niꞌ didzaꞌ, runëꞌ lsaquiꞌ, rnëꞌ: ―Zoëꞌ bönniꞌ bdëꞌë laꞌ yël queëꞌ yuguꞌ lba uva, atiꞌ budödëꞌ laꞌ yël naꞌ lu naꞌquëꞌ bönniꞌ huen dxin lun gatsjëꞌ len lëꞌ le luziꞌë, atiꞌ gyijëꞌ ziꞌtuꞌ ga niꞌ bugaꞌnëꞌ xtsey.

¹⁰Catiꞌ bdxin dza luchibëꞌ laꞌ yël naꞌ, bsölëꞌë tuëꞌ bönniꞌ gbaz queëꞌ ga naꞌ nacuꞌë huen dxin naꞌ quië siꞌë uláz queëꞌ qui le luziꞌë, san glundëꞌ lëꞌ ziꞌ huen dxin naꞌ, len gulusölëꞌë lëꞌ caꞌz.

¹¹Leyúbl bsölëꞌë yetúëꞌ gbaz queëꞌ, atiꞌ lequëꞌ glundëꞌ lëꞌ caꞌ ziꞌ, len gluꞌë döꞌ queëꞌ, atiꞌ gulusölëꞌë lëꞌ caꞌz.

¹²Leyúbl bsölëꞌë quequëꞌ bönniꞌ bunn gbaz queëꞌ, atiꞌ guludxíëꞌ caꞌ lëꞌ huëꞌ, len gulubijëꞌ lëꞌ niꞌl laꞌ yël naꞌ.

¹³’Niꞌr gzaꞌ ladxëꞌë xani laꞌ yël naꞌ, gnëꞌ: “¿Nacx guntsaꞌ? Gsölaꞌa quequëꞌ zxiꞌnczaꞌ nadxiꞌidaꞌ‑biꞌ. Catiꞌ laꞌléꞌinëꞌ‑biꞌ, nazx caꞌ lunëꞌ‑biꞌ ba laꞌn.”

¹⁴Niꞌr, catiꞌ gulaléꞌinëꞌ‑biꞌ huen dxin naꞌ, glun xtídzaꞌquëꞌ laꞌ légaczëꞌ, taꞌnë́ꞌ: “Biꞌi ni gaqui queëbiꞌ laꞌ yël ni. Gul‑dá, gdö́diruꞌ‑biꞌ, quië gaqui queëruꞌ le ral‑laꞌ gaqui queëbiꞌ.”

¹⁵Gulubijëꞌ‑biꞌ niꞌl laꞌ yël naꞌ, guludöddëꞌ‑biꞌ. ’Naꞌa, ¿nacxcz gunëꞌ quequëꞌ xani laꞌ yël naꞌ?

¹⁶Guidëꞌ len gdöddëꞌ yuguꞌ huen dxin naꞌ, atiꞌ udödëꞌ laꞌ yël queëꞌ lu naꞌgac bunách yubl. Catiꞌ gulayöni lë ni bunách nacuáꞌ niꞌ, gulanë́ꞌ: ―Dios cugnë́ꞌ gac cni.

¹⁷Niꞌr buyúëꞌ lequëꞌ Jesús, rnëꞌ: ―¿Bizxa rëꞌni gna lë naꞌ nayúj lu guich laꞌy, rna: Guiöj naꞌ gularuꞌnëꞌ bönniꞌ huen zöꞌö, Guiöj ni chnac guiöjlen squin zöꞌö?

¹⁸Nútiꞌtëz nu gbix lahui guiöj ni, quitsj nu naꞌ, atiꞌ nu bönniꞌ tsajbagaꞌ lëꞌ guiöj ni, uzxúzxj lëꞌ.

¹⁹Laꞌ dza niꞌz, gulazú gulaböꞌë laꞌzönëꞌ Jesús yuguꞌ bxuz uná bëꞌ len bönniꞌ gdauꞌ tuꞌsëdi, le táquibeꞌinëꞌ gnëꞌ quequëꞌ lë naꞌ benëꞌ lsaquiꞌ, san gládxinëꞌ bunách zian nacuáꞌ niꞌ.

²⁰Niꞌr guluyutsquëꞌ Jesús, len gulasölëꞌë bönniꞌ lubijëꞌ Lëꞌ didzaꞌ, luluíꞌ cuinquëꞌ ca bönniꞌ tsahuiꞌ, quië lunëꞌ ga bi gnëꞌ Jesús, quië gac ludödëꞌ Lëꞌ lu nëꞌë bönniꞌ rna béꞌinëꞌ lequëꞌ.

²¹Quië lunëꞌ cni, gulanabnëꞌ Jesús, taꞌnë́ꞌ: ―Bönniꞌ Usëdi, nö́zituꞌ le nacz rnauꞌ, len le nacz rusëdnuꞌ, len cutu rbequi xbeynuꞌ ca nac le tuꞌluíꞌz lahui bunách, san gdutë li nac ca rusëdnuꞌ zxba queëꞌ Dios.