Luku 20:7-21

⁷Dopa latala dokaitame Jisasa lamaiyoo, “Apimi pina leape lao masala naelyamanona,” leami-pyaa.

⁸Dopa leaminopa Jisasame dokaita lamaiyoo, “Dopa tamo doko, nambame kalai pilyo datupa dokonya pii minao pilyo lao nyakama langya nayatoakana,” lea-pyaa.

⁹Dopa latala baame kongali pii mende endakali dupa dapa lao lamaiya-pyaa: “Akali mendeme getepe ee mende pokea-pyaa. Dopa petala akali mendapuame ee doko isakao katena latala baa koto longo nepao yuu londati mendakaita pao katea-pyaa.

¹⁰Maitakao getepe wambu pingi gii doko ipateamopa akali ee tange dokome baanya kendemane mendeme ee isakamaingi akali dupa kateamisa pupala getepe dii mendapua lyao peekena lao nyakala pena lea-pyaa. Kendemane doko pateamopa ee isakamaingi akali dutupame baa pyapala getepe dii lyao maiyakamaiya nayao mee pena leami-pyaa.

¹¹Maitakao ee tange dokome baanya kendemane waka mende pena lea-pyaa. Pena leamoaka doko, dokaitame akali doko apata pyao indyepala mana koo elya pipae mendapua baa-kisa minatala getepe dii lyao maiya naenya mee pena leami-pyaa.

¹²Dee paa tepo pyoo ee tange dokome kendemane mendeaka pena leamopa, dokaitame baa pyao indyepala kamalyatena pyale leami-pyaa.

¹³Dokopa ee tange dokome lao pituu, ‘Dee nambame aipa pitoo laape? Dokaitame nambanya ikiningi mona setenge doko andanda semaitamino nakandenyana nambame baa pena latoana,’ lao masetala pena lea-pyaa.

¹⁴Pena leamoaka doko, akali ee isakamaingi dutupame akali dokonya ikiningi doko epeamo kandatala nyakamalapo lao pituu, ‘Akali dakeme takangenya moya nyepengena, moya dake naimanya jina lao baa pyao kumasemana!’ leami-pyaa.

¹⁵Dopa latala dokaitame getepe ee dokonya baa kamalyatena soo pyale latala pyao kumasiami-pyaa. “Dopana, akali ee tange dokome dokaita aipa pitape?

¹⁶Baame ipupala ee isakamaingi dokaita pyao kumasetala, getepe ee doko akali waka mendapuame isakao katena latana,” lea-pyaa. Dopa leamopa dokaitame sepala lao pituu, “Anematupa! Baame dopa napinako!” leami-pyaa.

¹⁷Dokopa Jisasame dokaita lengeme kandatae katao lao pituu, “‘Anda pingi akali dupame anda pingina daa latala nepeamino doko pingina mupa jeteana,’ lao pepa pyapae silyamo dokonya tenge aki palelyape?

¹⁸Endakali mende kana doko-ketae lombapae sepala baa indyuu tale pita. Dee kana dokome endakali mende pyao takyembatamo kandao doko, endakali doko etete kunguma jetana,” lea-pyaa.

¹⁹Dokopa mana setapae masingi akalipi pitisa mupapi dupame, “Kongali pii doko naima kandao lalumuna,” lao masiami-pyaa. Dopa lao masetala gii dokopaka baa puu lao minalanya piami-pyaa. Dopaka doko, endakali kateamino dupa paka kayapala kayami-pyaa.

²⁰Dopa petala baa minapenge gii mende malisoo katao Jisasa doko kapomane andake doko-kisa yakinatamanopa dokome baa anjinalena lao masiami-pyaa. Dopa lao masetala akali mendapuame sambo mee paele lao payao baa kosimi lapenge pii mendapua Jisasa-kisa sala pena leami-pyaa.

²¹Akali dutupame pupala Jisasa lamaiyoo, “Mana Lenge Akali, embame piipi manapi dupa tolao lao endakali dupa mana lamaingina lao masilyamano. Dee embame endakali itange kandao mokosala nayao, embame kiningi pii lao Goteme endakali dupame pipimili lao masingili pyoo mana lamailino lao masilyamano.